Bɛdwazole Kunlavolɛ Bie Ara

Mekɛ mɔɔ ɛnee ezule ɛndɔ la, Gyihova zele Yilaegya kɛ: ‘Kɔ Zalefate. Kunlavolɛ bie bamaa wɔ aleɛ.’ Mɔɔ Yilaegya dwule sua ne anlenkɛ kpole ne anloa la, ɔyiale kunlavolɛ bie mɔɔ ɛlɛsesa ɛyɛne la. Ɔhanle kɛ ɔmaa ye nzule ɔmaa ɔnlo. Mɔɔ raalɛ ne ɛlɛkɔ la, Yilaegya eza hanle kɛ: ‘Mesɛlɛ wɔ anrɛɛ bɛlɛ me paano ekyi.’ Noko kunlavolɛ ne buale ye kɛ: ‘Menlɛ paano. Yeha me esamo ekyi nee me nwole ekyi mɔɔ me nee me ra ne bali a.’ Yilaegya hanle kɛ: ‘Gyihova se saa ɛto paano ne bie ɛmaa me a, wɔ esamo ne nee wɔ nwole ne ɛnrɛwie kɔkpula kɛ ezule kɛdɔ bieko la.’

Yemɔti kunlavolɛ ne hɔle sua nu na ɔdonle paano ne bie ɔmaanle Gyihova ngapezonli ne. Kɛ mɔɔ Gyihova hanle la, amgba raalɛ ne nee ɔ ra nrenyia ne nyianle aleɛ lile wɔ ɛhɔne mekɛ ne anu. Ye esamo ne nee ye nwole ne anwie ɛlɛ.

Noko alɔbɔlɛ edwɛkɛ bie zile. Kunlavolɛ ne ara nrenyia ne anwo dole ye na ɔwule. Ɔkpale Yilaegya kyɛlɛ kɛ ɔboa ye. Yemɔti Yilaegya vale kakula ne dole ɔ sa zo hɔle sua ne ati zo ekpumgbunli bie anu. Ɔvale ye ɔdole ɛkpa zo na ɔyɛle asɔne kɛ: ‘Gyihova, mesɛlɛ wɔ maa kakula ne ɛzia ɛrɛla ngoane nu bieko.’ Ɛnee ɛhye bayɛ nwanwane debie kpalɛ! Ɛze deɛmɔti ɔ? Ɔluakɛ ɛnee bie ɛtɛsile ɛlɛ. Eza ɛnee kunlavolɛ ne nee ɔ ra ne ɛnle Yizilayɛma bɔbɔ.

Noko kakula ne rale ngoane nu bieko na ɔbɔle ɔ bo ɔliele ɛnwomenle! Yilaegya zele raalɛ ne kɛ: ‘Nea! Ɛ ra ne ɛra ngoane nu.’ Ɔ nye liele kpole na ɔzele Yilaegya kɛ: ‘Ɛle Nyamenle sonla amgba. Menwu kɛ edwɛkɛ biala mɔɔ Gyihova kɛha la yɛɛ ɛyɛ a.’