Belemgbunlililɛ Ne Anu Hyɛle Nwiɔ

Mekɛ ala mɔɔ ɛnee Sɔlɔmɔn sonle Gyihova la, Yizilayɛma nyianle anzodwolɛ. Noko Sɔlɔmɔn gyale mraalɛ dɔɔnwo mɔɔ vi maanle gyɛne nu mɔɔ bɛsonle awozonle la. Yemɔti ngyikyi ngyikyi Sɔlɔmɔn adwenle hakyile na ɔbɔle ɔ bo kɛ ɔsonle awozonle. Gyihova vale ɛya. Ɔzele Sɔlɔmɔn kɛ: ‘Bɛbade Yizilayɛma bɛavi wɔ abusua ne anwo na bɛ nu ahyɛ nwiɔ. Mebava foa ne mɔɔ bɛ nwo zonle la meamaa wɔ sonvolɛ ne mɔ ko, na foa ne mɔɔ bɛ nwo anzo la ayɛ wɔ abusua ne ɛdeɛ.’

Eza Gyihova maanle bɛnwunle ye kpɔkɛzilɛ ne wɔ adenle fofolɛ zo. Ɛnee Sɔlɔmɔn sonvolɛ bie mɔɔ bɛfɛlɛ ye Gyɛlɔbowam la ɛlɛtu adenle, ɔyiale ngapezonli Ahaegya. Ahaegya suosuanle ye tɛladeɛ mɔɔ ɔwula la anu azinli 12, na ɔzele Gyɛlɔbowam kɛ: ‘Gyihova balie Yizilayɛ belemgbunlililɛ ne avi Sɔlɔmɔn abusua ne asa anu na yeahyɛ nuhua nwiɔ. Die azinli bulu ɔluakɛ ɛbayɛ mbusua bulu azo belemgbunli.’ Mɔɔ Belemgbunli Sɔlɔmɔn dele ɛhye la, ɔyɛle kɛ ɔku Gyɛlɔbowam! Yemɔti Gyɛlɔbowam nriandile hɔle Yigyibiti. Nzinlii, Sɔlɔmɔn wule na ɔ ra Rilihɔbowam rayɛle belemgbunli. Akee Gyɛlɔbowam nwunle kɛ ɔbahola yeazia yeahɔ Yizilayɛ bieko.

Yizilayɛ mgbanyima zele Rilihɔbowam kɛ: ‘Saa ɛ nee menli ne di ye boɛ a, bɛbali nɔhalɛ bɛamaa wɔ.’ Noko Rilihɔbowam agɔnwo mɔ mgbavolɛ dule ye folɛ kɛ: ‘Ɔwɔ kɛ ɛmaa menli ne anwo kyele bɛ! Maa bɛyɛ gyima ɛsesebɛ!’ Rilihɔbowam diele ɔ gɔnwo mɔ mgbavolɛ folɛdulɛ ne. Ɔ ti yɛle se wɔ menli ne anwo, yemɔti menli ne dele atua. Bɛyɛle Gyɛlɔbowam mbusua bulu ne azo belemgbunli na bɛvɛlɛle ye Yizilayɛ belemgbunlililɛ. Bɛvɛlɛle ekpunli nwiɔ ne mɔɔ hale la Dwuda belemgbunlililɛ, na bɛlile nɔhalɛ bɛmaanle Rilihɔbowam. Akee Yizilayɛ mbusua ekpunli 12 ne anu ɛhyɛ nwiɔ.

Ɛnee Gyɛlɔbowam ɛngulo kɛ ye menli ne kɔsonle wɔ Gyɛlusalɛm mɔɔ wɔ Rilihɔbowam tumililɛ bo la. Ɛze deɛmɔti ɔ? Ɛnee ɔsulo kɛ menli ne badwazo atia ye na bɛahɔli Rilihɔbowam anzi. Yemɔti ɔyɛle nvutuke ɛnlankɛ mralɛ nwiɔ na ɔzele menli ne kɛ: ‘Gyɛlusalɛm wale somaa. Bɛbahola bɛazonle wɔ ɛke ala.’ Menli ne bɔle ɔ bo zonlenle nvutuke nlankɛ mralɛ ne mɔ na bɛ rɛle vile Gyihova bieko.