Gyɛfeta Ɛwɔkɛ Ne

Yizilayɛma eza dele Gyihova anwo atua na bɛzonlenle adalɛ nyamenle. Mekɛ mɔɔ Amɔnoma vale konle doale bɛ la, adalɛ nyamenle ɛhye mɔ amboa bɛ. Yemɔti Yizilayɛma nwunle amaneɛ ɛvolɛ dɔɔnwo. Akee bɛzele Gyihova kɛ: ‘Yɛyɛ ɛtane. Yɛsɛlɛ wɔ die yɛ fi yɛ agbɔvolɛ asa anu.’ Yizilayɛma zɛkyele bɛ ananze ne mɔ na bɛzonlenle Gyihova bieko. Ɛnee Gyihova ɛngulo kɛ bɛkɔ zo bɛnwu amaneɛ.

Gyihova kpale Gyɛfeta mɔɔ ze konle nye zo kpalɛ la ɔmaanle ɔlile ye menli ne anyunlu na bɛ nee Amɔnoma honle. Ɔhanle ɔhilele Gyihova kɛ: ‘Saa ɛmaa yɛdi konim wɔ konle ɛhye anu na mesia meba sua nu a, awie biala mɔɔ kɛlimoa kɛvi me sua nu ɛkɛ ne kɛvinde kɛrayia me la bayɛ wɔ ɛdeɛ.’ Gyihova diele Gyɛfeta asɔneyɛlɛ ne na ɔboale ye ɔmaanle ɔlile konim.

Mɔɔ Gyɛfeta ɛlɛba sua nu la, ɔ ra raalɛ kokye ne mɔɔ ɔlɛ la a rayiale ye a. Ɛnee ɔlɛ akɛya ɔ sa nu na ɔlɛbɔ yeazi agole. Duzu a Gyɛfeta yɛle a? Ɔhakyele ye ɛwɔkɛ ne na ɔhanle kɛ: ‘O me ra raalɛ ye! Wɔde me ɛbolɛ! Mebɔ Gyihova ɛwɔkɛ na ɔwɔ kɛ medi zo. Ɔwɔ kɛ memaa ɛkɔsonle wɔ ɛdanlɛsua ne anu wɔ Hyaelo.’ Noko, ɔ ra raalɛ ne zele ye kɛ: ‘Egya, saa wɔbɔ Gyihova ɛwɔkɛ a ɛnee di zolɛ. Mɔɔ mesɛlɛ la a le kɛ maa me siane nwiɔ maa me nee me gɔnwo mɔ mbɛlɛra ɛhɔ awoka ne mɔ azo lɔ na akee meahɔ.’ Gyɛfeta ara raalɛ ne lile nɔhalɛ na ɔzonlenle wɔ ɛdanlɛsua ne anu wɔ ye ngoane mekɛ kɔsɔɔti anu. Ɛvolɛ biala, ɛnee ɔ gɔnwo mɔ mbɛlɛra kɔkpɔla ye wɔ Hyaelo.