Gyihova Dendɛle Hilele Samoɛle

Ɛsɔfo Kpanyinli Yilae lɛ ɔ mra mrenyia nwiɔ mɔɔ bɛsonle wɔ ɛdanlɛsua ne anu ɛkɛ a. Bɛfɛlɛ bɛ Hɔfenae nee Fenɛhaze. Ɛnee bɛnli Gyihova mɛla ne mɔ azo yɛɛ bɛ ti yɛ se wɔ menli ne anwo. Saa Yizilayɛma fa nane ba kɛ bɛfa bɛabɔ afɔle a, Hɔfenae nee Fenɛhaze sa bɛ die nane ne ɛleka kpalɛ ne. Yilae dele mɔɔ ɔ mra ne mɔ ɛlɛyɛ la, noko yeanyɛ nwolɛ ɛhwee. Asoo Gyihova bamaa bɛahɔ zo bɛayɛ ɛhye ɔ?

Ɛnee Samoɛle le kakula, noko yeanzukoa Hɔfenae nee Fenɛhaze. Gyihova anye liele Samoɛle anwo. Kenle ko nɔɔzo mɔɔ ɛnee Samoɛle ɛla la, ɔdele kɛ ɛnelɛ bie ɛlɛfɛlɛ ye. Ɔdwazole ɔhɔhanle ɔhilele Yilae kɛ: ‘Medame ɛne!’ Noko Yilae buale kɛ: ‘Metɛfɛlɛle wɔ. Sia kɔla.’ Samoɛle ziale hɔlale. Ɛnelɛ ne vɛlɛle ye bieko. Mɔɔ Samoɛle dele ɛnelɛ ne fane nsa ne azo la, Yilae nwunle kɛ Gyihova a ɛlɛfɛlɛ Samoɛle a. Yemɔti ɔhanle ɔhilele Samoɛle kɛ saa ɛnelɛ ne fɛlɛ ye bieko a, ɔha kɛ: ‘Gyihova tendɛ! Wɔ sonvolɛ ɛlɛtie.’

Samoɛle ziale hɔlale. Akee ɛnelɛ ne vɛlɛle kɛ: ‘Samoɛle! Samoɛle!’ Ɔbuale kɛ: ‘Tendɛ na wɔ sonvolɛ ɛlɛtie.’ Gyihova zele ye kɛ: ‘Ka kile Yilae kɛ mebahwe ɔdaye nee ye abusua ne anzo. Ɔze ɛtane mɔɔ ɔ mra ne mɔ ɛlɛyɛ wɔ me ɛdanlɛsua ne anu la, noko ɔnyɛ nwolɛ ɛhwee.’ Aleɛ hyenle la, Samoɛle hɔbukele ɛdanlɛsua ne nlenkɛ ne mɔ kɛ mɔɔ ɔyɛ ye dɛba la. Ɛnee ɔsulo kɛ ɔbaha Gyihova edwɛkɛ ne yeahile ɛsɔfo kpanyinli ne. Noko Yilae vɛlɛle ye na ɔbizale ye kɛ: ‘Me ra, duzu edwɛkɛ a Gyihova hanle hilele wɔ a? Ka debie biala kile me.’ Yemɔti Samoɛle hanle edwɛkɛ ne amuala hilele ye.

Mɔɔ Samoɛle ɛlɛnyi la, ɛnee Gyihova nee ye lua dahuu. Akee Yizilayɛma kɔsɔɔti mɔɔ wɔ maanle ne ɛleka biala la nwunle kɛ Gyihova ɛkpa Samoɛle kɛ ngapezonli nee ndɛnebuavolɛ.