Hana Yɛle Asɔne Kɛ Nyamenle Ɛmaa Ɔwo

Ɛnee Yizilayɛnli bie mɔɔ bɛfɛlɛ ye Ɛlekeena la gya mraalɛ nwiɔ. Bɛfɛlɛ bɛ Hana yɛɛ Pɛnena, noko ɛnee ɔkulo Hana kpalɛ. Kɛmɔ Pɛnena wole dɔɔnwo na Hana ɛtɛwole la ati, ɛnee ɔgolo Hana anwo dahuu. Ɛvolɛ biala, ɛnee Ɛlekeena nee ye abusua ne kɔsonle wɔ Hyaelo. Mekɛ bie mɔɔ bɛhɔle Hyaelo la, ɔnwunle kɛ ye kulovolɛ Hana ɛlɛdi nyane. Ɔzele ye kɛ: ‘Hana, mmasu bieko. Mewɔ ɛke yɛɛ mekulo wɔ.’

Nzinlii, Hana angome hɔle kɛ ɔkayɛ asɔne. Ɔvale ɛzunlɛ ɔzɛlɛle Gyihova kɛ ɔboa ye. Ɔbɔle ɛwɔkɛ kɛ: ‘Gyihova, saa ɛmaa mewo kakula nrenyia a, mebava ye meamaa wɔ na yeazonle wɔ wɔ ye ngoane mekɛ kɔsɔɔti anu.’

Ɛsɔfo Kpanyinli Yilae nwunle kɛ Hana ɛlɛsu la, ye adwenle yɛle ye kɛ Hana ɛbo. Hana hanle kɛ: ‘Me menle, metɛbole. Melɛ ngyegyelɛ kpole na yemɔ a melɛka nwolɛ edwɛkɛ meahile Gyihova a.’ Yilae nwunle kɛ ɔtɛbole, yemɔti ɔzele Hana kɛ: ‘Nyamenle ɛva mɔɔ ɛkpondɛ la ɛmaa wɔ.’ Hana arɛle kyekyele na ɔhɔle sua nu. Yeandwu ɛvolɛ ko yɛɛ ɔwole ralɛ nrenyia a, na ɔdonle ye Samoɛle. Ɛnea a, Hana anye liele ɔ?

Hana arɛle anvi ɛwɔkɛ mɔɔ ɔbɔle Gyihova la. Mɔɔ ɔpɛle Samoɛle nyɛfonlɛ ala la yɛɛ ɔvale ye ɔhɔle ɛdanlɛsua ne anu a. Ɔhanle ɔhilele Yilae kɛ: ‘Kakula ne mɔɔ ɛnee melɛyɛ nwolɛ asɔne la ɛne. Meva ye memaa Gyihova bɔkɔɔ.’ Ɛnee Ɛlekeena nee Hana kɔkpɔla Samoɛle ɛvolɛ biala na bɛmaa ye adɛladeɛ fofolɛ. Nzinlii, Gyihova maanle Hana wole ngakula nnu bieko, mrenyia nsa yɛɛ mraalɛ nwiɔ.