TILE 12
Yɛboa Belemgbunlililɛ Gyima Ne Wɔ Ɛleka Biala
AMAA Gyisɛse ngapezo mɔɔ fale awieleɛ mekɛ ne anwo ara nu la, Gyihova Alasevolɛ ɛva edwɛkpa ne ɛhɔ “azɛlɛ ye azo ɛleka biala.” (Gyi. 1:8; Mat. 24:14) Amaa bɛayɛ ɛhye la, bɛfi bɛ ɛhulolɛ nu bɛfa bɛ mekɛ nee bɛ anwosesebɛ bɛyɛ sunsum nu ninyɛne. Kɛmɔ bɛlɛ anwodozo kɛ Gyihova banlea menli mɔɔ le ɔ gɔnwo mɔ gyimayɛvoma la ati, bɛkɔ zo bɛfa Nyamenle Belemgbunlililɛ ne bɛdimoa bɛ ɛbɛlabɔlɛ nu. (Mat. 6:25-34; 1 Kɔl. 3:5-9) Mɔɔ ɛvi nu ɛra la maa ɔda ali wienyi kɛ Gyihova die bɛ to nu yɛɛ ɔlɛyila bɛ.
KƐZI BƐTUA BELEMGBUNLILILƐ GYIMA NE ANWO KAKƐ LA
2 Saa menli nwu ndenle mɔɔ yɛdua zo yɛka edwɛkɛ ne yɛɛ Baebolo nee Baebolo nwo mbuluku mɔɔ yɛfa yɛmaa mɔɔ yɛndɔne bɛ la a, bie mɔ biza kɛ: “Kɛzi bɛkola bɛyɛ ɛhye mɔ amuala ɛ?” Nɔhalɛ nu, bɛbɔ kakɛ dɔɔnwo wɔ Baebolo nee Baebolo nwo mbuluku ɛyɛlɛ nwo. Bɛtɛle azua mɔɔ bɛsi na bɛaziezie bɛamaa azonvolɛ mɔɔ yɛ gyima wɔ ɛleka mɔɔ bɛpelente mbuluku, bɛnea edwɛkɛhanlɛ gyima ne azo na bɛyɛ gyima ngakyile amaa edwɛkpa ne anyia anyuhɔlɛ la noko hyia ezukoa. Eza bɛmaa maangyebakyi zo neavolɛma, edwɛkpatɛlɛvolɛma, adekpakyelɛ titilima nee menli gyɛne mɔɔ bɛwɔ dahuu ɛzonlenlɛ gyima titili ne anu la nwonane afoa nu moalɛ ekyi amaa yeaboa bɛ yeamaa bɛadoa bɛ gyima ne azo. Ɔda ali kɛ, amaa yɛahola yɛaha edwɛkpa ne wɔ yɛ mekɛ ye anu wɔ ɛleka mɔɔ yɛde anzɛɛ ewiade amuala la, yɛbɔ kakɛ kpole kpalɛ. Na nienwu a ezukoa ne amuala fi ba a?
3 Menli dɔɔnwo mɔɔ bɛ nye die Baebolo ngilehilelɛ gyima mɔɔ Gyihova Alasevolɛ yɛ anwo la fa anyelielɛ ye ndoboa boa ewiade amuala gyima ne. Noko Alasevolɛ ne mɔ mumua ne a fi bɛ ɛhulolɛ nu ye ndoboa boa gyima ne a. Bie mɔ fa bɛ ndoboa ne nwa Gyihova Alasevolɛ ɔfese ne mɔɔ wɔ bɛ maanle ne anu la. Bɛda tunwomaa sunsum ne mɔɔ Nyamenle tete azonvolɛ mɔɔ vile bɛ ahonle nu boale maanle bɛzile Gyihova ɛzonlenlɛsua ne lale ye ali la bie ali. (Ɛzɛ. 35:20-29; 1 Ek. 29:9) Bie mɔ yɛ wele fa bɛ azua kyɛ, yɛɛ ndoboa ngyikyi noko fi awie mɔ, asafo ne mɔ yɛɛ maangyebakyi ne mɔ ɛkɛ ne ba. Ahyɛlɛdeɛ ɛhye mɔ amuala maa yɛnyia ezukoa mɔɔ yɛfa yɛyɛ ɛzonlenlɛ gyima ne la.
Gyihova Alasevolɛ bu ye kɛ ɔle nwolɛ adenle kɛ bɛbava bɛ ezukoa nee bɛ agyapadeɛ bɛaboa edwɛkɛhanlɛ gyima ne
4 Gyihova Alasevolɛ bu ye kɛ ɔle nwolɛ adenle kɛ bɛbava bɛ ezukoa nee bɛ agyapadeɛ bɛaboa edwɛkɛhanlɛ gyima ne. Ɛnee Gyisɛse nee ye ɛdoavolɛma ne lɛ ezukoa ɛlɛka mɔɔ bɛye ezukoa bɛfi nu bɛtɔ debie a. (Dwɔn 13:29) Baebolo ne ka mraalɛ mɔɔ zonlenle Gyisɛse nee ye ɛdoavolɛma ne la anwo edwɛkɛ kile yɛ. (Maake 15:40, 41; Luku 8:3) Ɛzoanvolɛ Pɔɔlo vale anyezɔlɛ liele nwonane afoa nu ninyɛne mɔɔ menli mɔɔ bɛ nye die kɛ bɛbadɛlɛ edwɛkpa ne anu yɛɛ ɛnee bɛkulo kɛ bɛka edwɛkɛ ne bie la vile ɛlɔlɛ nu vale maanle ye la. (Fel. 4:14-16; 1 Tɛs. 2:9) Gyihova Alasevolɛ kɔ zo di mɔdenlebɔlɛ nee nyeleyɛlɛ nwo neazo ɛhye mɔ mɔɔ tete amra ne yɛle la anzi. Ɔti, yɛhola yɛmaa ahonlekpalɛma mɔɔ wɔ ɛleka biala la “ngoane nzule mɔɔ [bɛndua] ɛhwee a.”—Yek. 22:17.
KƐZI BƐDI ASAFO NE ANU NGYIANLƐ NWO GYIMA LA
5 Ndoboa mɔɔ bɛfi bɛ ɛhulolɛ nu bɛye la a bɛfa bɛtua kakɛ mɔɔ asafo ne bɔ la a. Bɛndo kɔlɛhyɛne; anzɛɛ bɛmpɛ bolɛ bɛmmaa awie yɛɛ bɛnzɛlɛzɛlɛ ezukoa. Bɛfa ndoboa nlɛka bɛsiezie nyianu ɛleka ne mɔ amaa awie biala ahola ava “mɔɔ yezuzu nwo wɔ ye ahonle nu” la ado nu.—2 Kɔl. 9:7.
6 Bɛdimoa bɛfa ndoboa ne bie bɛtua Belemgbunlililɛ Asalo ne anwo kakɛ. Mgbanyima ne mɔ bahola abɔ kpɔkɛ kɛ bɛfa ezukoa ne bie bɛanwa Bɛtɛle bɛamaa bɛava bɛadɛlɛ ewiade amuala gyima ne anu. Ɔwɔ kɛ asafo ne die kpɔkɛbɔlɛ ɛhye to nu. Wɔ adenle ɛhye azo, asafo dɔɔnwo ye ndoboa dahuu boa ewiade amuala gyima ne. Saa asafo ne anu amra amuala nwu ngyianlɛ mɔɔ wɔ asafo ne anu la a, ɔnrɛhyia kɛ bɛbada bɛabɔ ndoboa ɛyelɛ nwo nolo.
KƐZI BƐNEA NDOBOA NE MƆ AZO LA
7 Saa bɛkpɔne debiezukoalɛ biala a, mediema mrenyia nwiɔ ye ezukoa biala mɔɔ wɔ ndoboa nlɛka ne mɔ anu la na bɛyɛ nwolɛ kɛlɛtokɛ. (2 Arl. 12:9, 10; 2 Kɔl. 8:20) Mgbanyima eku ne bayɛ ngyehyɛleɛ mɔɔ fɛta mɔɔ bɛbava bɛabɔ ezukoa ɛhye mɔ anwo bane kɔkpula kɛ bɛbava bɛanwa Bɛtɛle anzɛɛ bɛali asafo ne ngyianlɛ nwo gyima la. Siane biala, adiema ne mɔɔ nea asafo ne ezukoa nwo mgbondabulɛ zo la yɛ nwolɛ kɛlɛtokɛ na ɔfa ɔto asafo ne anyunlu, yɛɛ siane nsa biala mgbanyima avinli ngitanwodivolɛ ne yɛ ngyehyɛleɛ maa bɛneɛnlea ezukoa nwo kɛlɛtokɛ ne mɔ anu.
KAKƐ MƆƆ MAANGYEBAKYI NE BƆ LA
8 Alasevolɛ mɔɔ wɔ maangyebakyi bie anu la ndoboa a bɛfa bɛtua maangyebakyi nyianu nwo kakɛ nee kakɛ gyɛne mɔɔ maangyebakyi ne bɔ la a. Bɛfa ndoboa nlɛka bɛsiezie nyianu bo amaa bɛavi bɛ ɛhulolɛ nu bɛaye ndoboa bɛaboa maangyebakyi ne. Bieko, ɔdwu mekɛ ne bie a asafo ne mɔ ye ndoboa maa bɛtua kakɛ bie mɔ.
9 Bɛfa maangyebakyi nyianu ne abo ezukoa ne bɛtua nyianu ne anwo kakɛ, na saa bie ka a bɛfa bɛboa ewiade amuala gyima ne. Saa maangyebakyi ne ɛnlɛ ezukoa mɔɔ sa nyianu ne anzɛɛ nyianu bieko mɔɔ bɛbayɛ la anwo kakɛ mɔɔ le kɛ ezukoa mɔɔ bɛtua bɛalie ɛleka bɛayɛ nyianu ne la tua a, bie a maangyebakyi zo neavolɛ ne bahola aha kɛ bɛbɔ asafo ne mɔ amaneɛ bɛmaa bɛye ndoboa. Mgbanyima eku biala bazuzu edwɛkɛ ne anwo na bɛanlea ndoboa mɔɔ asafo ne bahola aye aboa maangyebakyi ne la. Akee bɛbalua kpɔkɛbɔlɛ zo bɛaye ndoboa ɛhye.
10 Saa ezukoa nwo edwɛkɛ ba mɔɔ ɔwɔ kɛ mgbanyima mɔɔ wɔ maangyebakyi ne anu la di nwolɛ gyima a, bɛbayɛ maangyebakyi mgbanyima ayia wɔ kenle mɔɔ bɛlɛyɛ maangyebakyi nyianu ne la. Saa ɛye maangyebakyi ne anwo kakɛ mɔɔ ɔwɔ kɛ bɛtua la ɛsie ahane a, ɔwɔ kɛ mgbanyima ne mɔ die kakɛ gyɛne biala mɔɔ bɛbadua la anwo kpɔkɛbɔlɛ to nu kolaa na bɛadua. Mekɛ biala mɔɔ bɛbava maangyebakyi ne ezukoa bɛayɛ debie la, ɔwɔ kɛ bɛkɛlɛ kpɔkɛbɔlɛ ne nee ezukoa fɔɔnwo ne bɛmaa bɛdie bɛto nu.
11 Ɔvi mekɛ mɔɔ kɔ mekɛ la, bɛyɛ ngyehyɛleɛ bɛmaa bɛneɛnlea maangyebakyi ne ezukoa nwo mgbondabulɛ nu.
KƐZI BƐNEA EHYIAVOLƐMA LA
12 Bodane titili ko mɔɔ ɔti ɛnee Gyisɛse nee ye ɛdoavolɛma ne lɛ ezukoa ɛlɛka la a le kɛ bɛfa bɛaboa ehyiavolɛma. (Maake 14:3-5; Dwɔn 13:29) Kilisienema ɛzonlelilɛ zɔhane tɛkɔ zo, ɔluakɛ Gyisɛse hanle kɛ: “Bɛ nee ehyiavolɛma de dahuu.” (Maake 14:7) Kɛzi Gyihova Alasevolɛ di ɛzonlelilɛ ɛhye anwo gyima ɛnɛ ɛ?
13 Ɔdwu mekɛ ne bie a, ɔlua kpanyinliyɛlɛ, anwodolɛ anzɛɛ tɛnlabelɛ bie mɔɔ bɛngola nwolɛ ɛhwee yɛ la ati, nɔhavoma mɔɔ wɔ asafo ne anu la bɛahyia nwonane afoa nu moalɛ. Bɛ abusua ne anu amra, bɛ nwo amra anzɛɛ awie mɔ mɔɔ bɛbanwu tɛnlabelɛ ne la bɛahola aboa. Ɛhye nee ɛdoavolɛ Dwɔn edwɛkɛ ɛhye yia: “Awie biala mɔɔ lɛ ewiade ye anu ninyɛne na ɔnwu ɔ diema mɔɔ ɛhyia, na ɔ kunlu ɛnyelɛyela ye ɛmmaa ye la, ɛnee kɛzi Nyamenle ɛlɔlɛ ne de ye nu ɛ? Ngakula, bɛmmamaa yɛfa yɛ edwɛkɛhanlɛ anzɛɛ yɛ nloa mgbane yɛkulo menli, emomu bɛmaa yɛyɛ ye wɔ nyɛleɛ nee nɔhalɛ nu.” (1 Dwɔn 3:17, 18; 2 Tɛs. 3:6-12) Nɔhavoma mɔɔ hyia nwonane afoa nu moalɛ mɔɔ yɛnea bɛ la boka nɔhalɛ ɛzonlenlɛ nwo.—Gye. 1:27; 2:14-17.
14 Ɛzoanvolɛ Pɔɔlo hilehilele kɛzi bɛbaboa menli mɔɔ fɛta la anu wɔ ye kɛlata mɔɔ limoa mɔɔ ɔhɛlɛle Timote la anu. Ɛbahola wɔagenga ye folɛdulɛ ne wɔ 1 Timote 5:3-21. Ɔle Kilisienenli biala ɛzonlelilɛ titili kɛ ɔbanlea ye sua nu amra. Ɔwɔ kɛ awie mɔɔ ɛyɛ kpanyinli anzɛɛ ɛnlɛ anwosesebɛ la amra, nlɔnra anzɛɛ mbusuafoɔ mɔɔ bikye ye la a nea ye a. Ɔyɛ a arane anzɛɛ sua ne azo amra fa moalɛ maa, yemɔti mbusuafoɔ anzɛɛ awie mɔ bahola aboa ahenle mɔɔ hyia moalɛ ne la bɛamaa yealie bie. Tɛnlabelɛ bie bahola ara mɔɔ ɔbahyia kɛ asafo ne anu amra amuala suzu nwo na bɛfa moalɛ bɛmaa mediema bie mɔ mɔɔ bɛva nɔhalɛlilɛ bɛzonle wɔ ɛvolɛ dɔɔnwo anu la. Saa menli ɛhye mɔ ɛnlɛ mbusuafoɔ anzɛɛ bɛ nwo amra mɔɔ bɛaboa bɛ na arane noko ɛnlɛ moalɛ biala ɛmmaa bɛ a, mgbanyima eku ne bahola ava nzuzulɛ mɔɔ bɛaboa bɛ la amaa. Kilisienema bu ye kɛ ɔle nwolɛ adenle kɛ bɛbava bɛ nwonane afoa nu ninyɛne bɛaboa menli mɔɔ bɛhyia moalɛ la.
15 Bie a kpɔdekpɔdeyɛlɛ, konle, azɛlɛkpusulɛ, azuyilɛ, ɛhɔne anzɛɛ ngyegyelɛ gyɛne mɔɔ ɛbu wɔ mekɛ ɛsesebɛ ɛhye anu la bamaa menli bie mɔ ahyia moalɛ. (Mat. 24:7-9) Bie a asafo ne mɔ anu amra ɛnlɛ ninyɛne mɔɔ bɛbahola bɛava bie bɛaboa bɛ nwo a, ɔti Neazo Eku ne fa nwolɛ edwɛkɛ to mediema mɔɔ wɔ ɛleka gyɛne la anyunlu ɔmaa bɛboa. Ɛhye nee adenle mɔɔ Kilisienema mɔɔ ɛnee wɔ Ehyea Ekyi luale zo vale aleɛ hɔmaanle bɛ mediema mɔɔ wɔ Dwudiya wɔ ɛhɔne mekɛ nu la yia. (1 Kɔl. 16:1-4; 2 Kɔl. 9:1-5) Yɛdi bɛ neazo ne anzi yɛda ɛlɔlɛ ali yɛkile yɛ mediema yɛfa yɛkile kɛ yɛle Gyisɛse Kelaese nɔhalɛ ɛdoavolɛma.—Dwɔn 13:35.
MBULUKU ƐHYƐLƐ
16 Baebolo nee Baebolo nwo mbuluku boa maa yɛtɛlɛ Belemgbunlililɛ edwɛkpa ne anu kpalɛ. Asafo nu sonvolɛ mɔɔ mgbanyima eku ne bakpa ye la a ta nea asafo ne mbuluku zo a. Mediema mɔɔ bɛkɛva gyimalilɛ ɛhye bɛkɛwula bɛ sa nu la fa ye anyebolo zo. Bɛyɛ mbuluku ne mɔ anwo kɛlɛtokɛ kpalɛ amaa dahuu bɛanyia bie mɔɔ baza asafo ne la.
17 Kɛ Kilisienema mɔɔ yɛyila yɛ nwo zo la, yɛze kɛ yɛ mekɛ, yɛ adwenle nee yɛ anwosesebɛ, yɛ mɔdenlebɔlɛ, nwonane afoa nu ninyɛne yɛɛ yɛ ngoane bɔbɔ le ahyɛlɛdeɛ mɔɔ vi Nyamenle ɛkɛ a, na ɔkpondɛ kɛ yɛfa yɛsonle ye. (Luku 17:10; 1 Kɔl. 4:7) Saa yɛfa yɛ ninyɛne kɔsɔɔti yɛdi gyima kpalɛ a, ɛnee yɛlɛda ɛlɔlɛ kpole mɔɔ yɛlɛ yɛmaa Gyihova la ali. Yɛlɛ ɛhulolɛ kɛ yɛbava yɛ ninyɛne mɔɔ sonle bolɛ la yɛali Gyihova eni ɔluakɛ yɛze kɛ ɔ nye die ahyɛlɛdeɛ biala mɔɔ yɛfi yɛ ɛkɛla muala anu yɛfa yɛmaa ye la anwo. (Mrɛ. 3:9; Maake 14:3-9; Luku 21:1-4; Kɔl. 3:23, 24) Gyisɛse hanle kɛ: “Bɛnyianle ye mgbane, bɛva bɛmaa mgbane.” (Mat. 10:8) Saa yɛfa yɛ nwo amuala nee yɛ agyapadeɛ yɛmaa wɔ Gyihova ɛzonlenlɛ nu a, yɛ nye balie kpalɛ.—Gyi. 20:35.