Kɛzi Ɛbadɛlɛ Wɔ Ɛzonlenlɛ Gyima Ne Anu La

MEKƐ dwule mɔɔ Gyisɛse soa ye ɛdoavolɛma kɛ Belemgbunlililɛ nolobɔlɛma la, ɔzele bɛ kɛ: “Ma ɛdelɛ gyima ne le kpole, noko gyimayɛvoma ne le ekyi.” Ɛnee bɛbayɛ gyima dɔɔnwo, ɔti ɔdoale zo kɛ: “Bɛzɛlɛ ma ɛdelɛ gyima ne Amenle kɛ ɔmaa gyimayɛvoma ɛrɛla ye ma ɛdelɛ gyima ne anu.” (Mat. 9:37, 38) Gyisɛse hilele bɛ kɛzi ɔwɔ kɛ bɛyɛ bɛ ɛzonlenlɛ gyima ne la. Ye edwɛkɛ ne kile kɛ ɔwɔ kɛ bɛyɛ gyima ne ndɛndɛ: “Meka meahile bɛ kɛ, bɛnrɛwie Yizilayɛ azua kɔsɔɔti azo kɔ na sonla Ra ne ara.”​—Mat. 10:23.

² Ɛnɛ noko, yɛlɛ gyima dɔɔnwo yɛyɛ ye wɔ daselɛlilɛ gyima ne anu. Ɔwɔ kɛ bɛbɔ edwɛkpa ne nolo kolaa na awieleɛ ne ara, noko mekɛ ne ɛlɛwie! (Maake 13:10) Yɛ tɛnlabelɛ ne le kɛ Gyisɛse nee ye ɛdoavolɛma ne ɛdeɛ ne la, noko kɛmɔ egyinli ne a le ewiade ye la ati, yɛ gyima ɛdeɛ ne le kpole kpalɛ. Saa ɛfa yɛ ɛto menli mgbe mgbe dɔɔnwo mɔɔ wɔ ewiade ye anu la anwo a, yɛle ekyi bie noko yɛdie yɛdi kɛ Gyihova baboa yɛ. Bɛbaha Belemgbunlililɛ edwɛkpa ne wɔ aleɛabo amuala, na saa Gyihova mekɛ ne dwu a, awieleɛ ne bara. Asoo yɛbava Nyamenle Belemgbunlililɛ ne yɛalimoa yɛ ɛbɛlabɔlɛ nu amaa yɛayɛ yɛ ɛzonlenlɛ gyima ne kpalɛ ɔ? Ɔti, teokelase bodane boni mɔ a yɛbahola yɛapele yɛadwu nwo a?

³ Gyisɛse ka mɔɔ Gyihova kpondɛ kɛ Ye azonvolɛ mɔɔ bɛdu bɛ nwo bɛmaa ye yɛ anwo edwɛkɛ la, ɔhanle kɛ: “Fa wɔ ahonle muala nee wɔ ɛkɛla muala nee wɔ adwenle muala nee wɔ anwosesebɛ muala kulo Gyihova wɔ Nyamenle ne.” (Maake 12:30) Ɔwɔ kɛ yɛfi yɛ ahonle nu yɛsonle Nyamenle. Yɛda ye ali kɛ yɛdu yɛ nwo yɛmaa Gyihova kpalɛ yɛɛ yɛyila yɛ nwo zo nɔhalɛ nu, ɔlua biala mɔɔ yɛbahola ye yɛ mɔɔ yɛyɛ ye wɔ ye ɛzonlenlɛ nu la azo. (2 Tim. 2:15) Nwolɛ adenle bie mɔ ɛbuke ɛmaa yɛ nuhua ko biala, kɛ mɔɔ yɛ tɛnlabelɛ nee yɛ anwosesebɛ de la. Suzu nwolɛ adenle ɛhye mɔ bie anwo, na si teokelase bodane mɔɔ ɛbahulo kɛ ɛdwu nwolɛ amaa wɔayɛ wɔ ɛzonlenlɛ gyima ne kpalɛ la anwo kpɔkɛ.

YƐ NOLOBƆLƐNLI WƆ ASAFO NE ANU

⁴ Awie biala mɔɔ balie nɔhalɛ ne la lɛ nwolɛ adenle kɛ ɔbabɔ edwɛkpa ne nolo. Ɛhye a le gyima titili mɔɔ Gyisɛse vale maanle ye ɛdoavolɛma kɛ bɛyɛ a. (Mat. 24:14; 28:19, 20) Saa awie bayɛ Gyisɛse Kelaese ɛdoavolɛ a, ɔbɔ ɔ bo ɔka edwɛkpa ne mɔɔ yede la anwo edwɛkɛ ɔkile awie mɔ ɛkɛ ne ala. Ɛhye a Andelu, Felepe, Kɔnileɛse yɛɛ menli gyɛne yɛle a. (Dwɔn 1:40, 41, 43-45; Gyi. 10:1, 2, 24; 16:14, 15, 25-34) Asoo ɛhye kile kɛ awie bahola aha edwɛkpa ne ahile awie mɔ kolaa na bɛazɔne ye ɔ? Ɛhɛe! Saa awie fɛta kɛ nolobɔlɛnli mɔɔ bɛtɛsɔnenle ye wɔ asafo ne anu ala a, ɔkola ɔkɔ daselɛlilɛ. Eza ɔbahola yeayɛ daselɛlilɛ gyima ne foa ngakyile ne mɔ bie, kɛ mɔɔ ye anwosesebɛ nee ye tɛnlabelɛ ne de la.

⁵ Saa bɛsɔne awie a, ɔda ali kɛ ɔkulo kɛ ɔbɔ mɔdenle kpalɛ ɔboa menli gyɛne ɔmaa bɛte edwɛkpa ne. Mrenyia nee mraalɛ amuala lɛ nwolɛ adenle kɛ bɛbayɛ edwɛkɛhanlɛ gyima ne bie. Saa yɛkola yɛyɛ debie ekyi bie ala bɔbɔ yɛtɛlɛ Belemgbunlililɛ gyima ne anu a, ɔle nyilalɛ kpole. Awie biala mɔɔ bahola ayɛ ɛzonlenlɛ gyima ne foa ngakyile ne mɔ bie aboka ye ɛdeɛ ne anwo yeava yeadɛlɛ ye ɛzonlenlɛ gyima ne anu la anye balie kpalɛ.

ƐLEKA MƆƆ BƐHYIA MOALƐ KPOLE LA

⁶ Bie a bɛyɛ wɔ asafo ne azɛlɛsinli ne anu gyima fane dɔɔnwo na asɛɛ awie biala ɛde edwɛkɛ ne. Saa ɔle zɔ a, bie a ɛbade nganeɛ kɛ ɔwɔ kɛ ɛkɔtɛlɛ wɔ ɛzonlenlɛ gyima ne anu wɔ ɛleka mɔɔ bɛhyia moalɛ kpole la. (Gyi. 16:9) Saa ɛle kpanyinli anzɛɛ sonvolɛ a, bie a ɛkɔboa asafo gyɛne bie a bɛ nye balie nwo. Wɔ maangyebakyi zo neavolɛ ne bahola ava kɛzi ɛbahola wɔaboa asafo gyɛne mɔɔ wɔ maangyebakyi ne anu la anwo nzuzulɛ amaa wɔ. Saa ɛkulo kɛ ɛsonle wɔ maanle ne anu ɛleka gyɛne a, ɛbahola wɔade nwolɛ edwɛkɛ dɔɔnwo wɔavi Bɛtɛle.

⁷ Ɛkulo kɛ ɛkɔsonle wɔ maanle gyɛne zo ɔ? Saa ɔle zɔ a, ɔwɔ kɛ ɛsuzu adendulɛ ɛhye anwo kpalɛ. Duzu ati a ɛ nee wɔ asafo ne anu mgbanyima ɛnzuzu nwo ɛ? Kpɔkɛzilɛ ɛhye banyia wɔ nee awie biala mɔɔ ɛ nee ye bahɔ la anwo zo tumi. (Luku 14:28) Noko saa ɛnrɛhyɛ a, ɔbayɛ kpalɛ kɛ ɛbazonle wɔ wɔ maanle ne anu.

⁸ Wɔ maanle bie mɔ anu, mediema mrenyia mɔɔ bɛmaa bɛ neavolɛ gyima la ɛtɛkyɛle nɔhalɛ ne anu kpalɛ. Mediema mrenyia mɔɔ bɛlɛ bɛ nwo aze la bahulo kɛ mgbanyima gyɛne mɔɔ lɛ anwubielɛ mɔɔ vi asafo fofolɛ nu bɛara bɛ asafo ne anu la bɛali bɛ nyunlu. Saa ɛle kpanyinli na ɛkulo kɛ ɛkɔ maanle zɛhae bie anu a, kakye kɛ tɛ wɔ bodane a le kɛ ɛkalie mediema ne mɔ gyima wɔayɛ. Emomu, ɛ nee bɛ kazonle. Boa bɛ maa bɛkpondɛ ɛzonlelilɛ dɔɔnwo wɔ asafo ne anu na bɛyɛ. (1 Tim. 3:1) Saa bɛnyɛ ninyɛne kɛ asafo ne mɔɔ ɛnee ɛwɔ nu la anu a, nyia abotane. Fa anwubielɛ mɔɔ ɛlɛ kɛ kpanyinli la boa mediema ne mɔ kpalɛ. Na saa kenle bie ɔwɔ kɛ ɛfi ɛkɛ ɛsia ɛkɔ wɔ maanle nu a, mediema ne mɔ ahola anlea asafo ne azo kpalɛ.

⁹ Kolaa na Bɛtɛle amaa wɔanwu asafo mɔɔ ɛbahola wɔaboa bɛ la, ɔwɔ kɛ wɔ Asafo Ɛzonlenlɛ Kɔmatii ne kɛlɛ ɛ nwo nganvolɛ kɛlata. Saa ɛle kpanyinli, sonvolɛ, adekpakyelɛnli anzɛɛ nolobɔlɛnli bɔbɔ a, ɔwɔ kɛ bɛkɛlɛ kɛlata ɛhye. Ɛzonlenlɛ kɔmatii ne bava nganvolɛ kɛlata ne mɔɔ bɛhɛlɛle yɛɛ mɔɔ ɛkpondɛ kɛ ɛkɔyɛ la anwo kɛlata anwa maanle ne mɔɔ ɛkulo kɛ ɛkɔsonle wɔ nu la Bɛtɛle ne.

DASELƐLILƐ WƆ ANEƐ GYƐNE NU

¹⁰ Amaa wɔahola wɔadɛlɛ wɔ ɛzonlenlɛ gyima ne anu la, bie a ɔwɔ kɛ ɛsukoa aneɛ gyɛne mɔɔ mumule aneɛ boka nwo la. Saa ɔle wɔ bodane kɛ ɛsukoa aneɛ fofolɛ na wɔava wɔali daselɛ a, duzu ati a ɛnga ɛngile mgbanyima ne mɔ nee maangyebakyi zo neavolɛ ne ɛ? Bɛbahola bɛahile wɔ mɔɔ ɔwɔ kɛ ɛyɛ la na bɛamaa wɔ anwosesebɛ. Bɛtɛle ɛmaa maangyebakyi bie mɔ ɛyɛ aneɛ ɛzukoalɛ nwo ngyehyɛleɛ ɛmaa nolobɔlɛma nee adekpakyelɛma mɔɔ bɔ mɔdenle la amaa bɛali daselɛ wɔ aneɛ gyɛne nu.

ADEKPAKYELƐ GYIMA

¹¹ Ɔwɔ kɛ nolobɔlɛma kɔsɔɔti nwu ninyɛne mɔɔ bɛkpondɛ bɛavi awie mɔɔ kulo kɛ ɔyɛ adekpakyelɛ boavolɛ, dahuu adekpakyelɛnli, adekpakyelɛ titili yɛɛ dahuu ɛzonlenlɛ gyima gyɛne ne mɔ bie ɛkɛ la. Ɔwɔ kɛ adekpakyelɛnli yɛ Kilisienenli mɔɔ bɛzɔne ye mɔɔ ɔyɛ neazo kpalɛ na ye tɛnlabelɛ ne maa ɔkola ɔfa dɔnehwele fɔɔnwo mɔɔ ɔwɔ kɛ adekpakyelɛma fa ka edwɛkɛ ne yɛ gyima la. Asafo Ɛzonlenlɛ Kɔmatii ne a die adekpakyelɛ boavolɛ nee dahuu adekpakyelɛ ademizalɛ ne mɔ to nu a, yɛɛ Bɛtɛle noko a kpa adekpakyelɛ titilima a.

¹² Adekpakyelɛ boavolɛma bahola ava siane ko, siane dodo bie anzɛɛ mekɛ tendenle biala mɔɔ bɛ tɛnlabelɛ ne kɛmaa bɛ adenle la azonle. Belemgbunlililɛ nolobɔlɛma dɔɔnwo anye die kɛ bɛbayɛ adekpakyelɛ boavolɛma wɔ mekɛ titili le kɛ Ngakyelɛlilɛ mekɛ anzɛɛ wɔ maangyebakyi zo neavolɛ ɛkpɔlalɛ mekɛ ne anu. Bie mɔ noko yɛ bie wɔ siane mɔɔ bɛnva bɛngɔ gyima la anu. Saa bɛmaa sukulu adenle a, nolobɔlɛma mɔɔ kɔ sukulu mɔɔ bɛzɔne bɛ la bahola ayɛ adekpakyelɛ boavolɛma. Nolobɔlɛma bahola ava dɔnehwele ne mɔɔ bɛde zo la ayɛ adekpakyelɛ boavolɛ wɔ March nee April biala yɛɛ siane mɔɔ maangyebakyi zo neavolɛ ne barakpɔla bɛ la anu. Kɛzi wɔ tɛnlabelɛ ne de biala la, saa ɛda subane kpalɛ ali na ɛbahola wɔayɛ ngyehyɛleɛ wɔava siane ko anzɛɛ mɔɔ bo zɔ la wɔayɛ adekpakyelɛ boavolɛ a, mgbanyima ne mɔ anye balie kɛ bɛbamaa wɔayɛ bie.

¹³ Saa wɔ tɛnlabelɛ ne bamaa wɔahola wɔadwu ɛvolɛ biala dɔnehwele ne anwo a, ɛbahola wɔafɛta kɛ dahuu adekpakyelɛnli. Kɛ dahuu adekpakyelɛnli la, ɔwɔ kɛ ɛ nee asafo mɔɔ ɛwɔ nu la bɔ nu yɛ gyima. Adekpakyelɛma le nyilalɛ maa asafo ne, bɛnyia ɛhulolɛ bɛmaa daselɛlilɛ gyima ne na bɔbɔ bɛmaa awie mɔ anwosesebɛ kɛ bɛyɛ adekpakyelɛ gyima ne bie. Kolaa na wɔahola wɔayɛ dahuu adekpakyelɛnli la, ɔwɔ kɛ ɛyɛ nolobɔlɛnli mɔɔ yɛ neazo kpalɛ mɔɔ bɛzɔnenle wɔ la yedwu siane nsia a.

¹⁴ Dahuu adekpakyelɛma mɔɔ bɛla ye ali kɛ bɛbɔ mɔdenle wɔ ɛzonlenlɛ gyima ne anu la bie mɔ a bɛta bɛkpa bɛ kɛ adekpakyelɛ titilima a. Ɔwɔ kɛ bɛkola bɛsonle wɔ ɛleka biala mɔɔ Bɛtɛle bazoa bɛ la. Fane dɔɔnwo ne ala, bɛfa bɛ bɛkɔ ɛleka mɔɔ te ɔ nwo mɔɔ bɛbahola bɛanyia anyelielɛma na bɛade asafo fofolɛ la. Ɔyɛ a bɛfa adekpakyelɛ titilima bɛkɔ asafo mɔɔ hyia moalɛ amaa bɛahola bɛayɛ bɛ azɛlɛsinli ne anu gyima la anu. Saa asafo mɔɔ le ngyikyi la ɛngyia gyimayɛvoma dɔɔnwo wɔ daselɛlilɛ nu bɔbɔ a, bɛmaa adekpakyelɛ titilima bie mɔ mɔɔ eza bɛle mgbanyima la kɔboa bɛ. Bɛmaa adekpakyelɛ titilima ezukoa ekyi amaa bɛava bɛali bɛ ngyianlɛ nwo gyima. Ɔyɛ a bɛmaa adekpakyelɛ titilima bie mɔ yɛ gyima wɔ mekɛ ezinra nu.

EDWƐKPATƐLƐVOLƐMA

¹⁵ Neazo Eku ne Ɛzonlenlɛ Kɔmatii ne a kpa edwɛkpatɛlɛvolɛma a, yɛɛ Ɔfese Kɔmatii ne noko maa bɛkɔsonle wɔ ɛleka mɔɔ menli dɔɔnwo wɔ la. Bɛmaa edwɛkɛhanlɛ gyima ne nee asafo ne anu gyimayɛlɛ nyia anyuhɔlɛ. Fane dɔɔnwo ne ala bɛtete edwɛkpatɛlɛvolɛma wɔ Belemgbunlililɛ Edwɛkpakavolɛma Sukulu ne anu. Bɛmaa bɛ sua nee ezukoa ekyi mɔɔ bɛbava bɛali bɛ ngyianlɛ nwo gyima la.

MAANGYEBAKYI NU GYIMA

¹⁶ Kolaa na Neazo Eku ne akpa maangyebakyi zo neavolɛma la, bɛmaa bɛdimoa bɛkɔgyinla maangyebakyi zo neavolɛma bie mɔ agyakɛ anu bɛyɛ gyima wɔ mekɛ bie mɔ anu bɛfa bɛtete bɛ. Mrenyia ɛhye mɔ kulo daselɛlilɛ gyima ne nee bɛ mediema Kilisienema. Bɛle adekpakyelɛma mɔɔ bɔ mɔdenle, bɛsukoa Baebolo ne kpalɛ yɛɛ bɛle tendɛvolɛma nee kilehilevolɛma kpalɛ. Bɛda sunsum ne ma ne ali kpalɛ, bɛ nye la ɛkɛ, bɛlɛ ndelebɛbo nee nwunu. Saa adiema ne ɛgya a, ɔwɔ kɛ ɔ ye yɛ adekpakyelɛnli mɔɔ yɛ neazo kpalɛ wɔ ye nyɛleɛ nee kɛzi ɔ nee awie mɔ di la anu. Ɔle edwɛkpakavolɛ mɔɔ bɔ mɔdenle. Eza ɔwɔ kɛ ɔbɛlɛ ɔ nwo aze kɛ Kilisienenli yelɛ, ɔnlie ɔ hu anloa edwɛkɛ ɔnga anzɛɛ ɔnlie adawubɔlɛ ɔnva. Maangyebakyi zo neavolɛma nee bɛ ye mɔ gyima ne yɛ se, yemɔti ɔwɔ kɛ bɛdabɛ mɔɔ bɛlɛkpondɛ ɛzonlenlɛ nwo adenle ɛhye la yɛ menli mɔɔ lɛ kpɔkɛdelɛ kpalɛ. Adekpakyelɛma ɛngɛlɛ ademizalɛ kɛlata kɛ bɛkpondɛ kɛ bɛyɛ maangyebakyi zo neavolɛ. Emomu, ɔwɔ kɛ bɛka nwolɛ edwɛkɛ bɛkile bɛ maangyebakyi zo neavolɛ ne, na ɔkile bɛ mɔɔ ɔwɔ kɛ bɛyɛ la.

TEOKELASE SUKULU NGAKYILE

¹⁷ Belemgbunlililɛ Edwɛkpakavolɛma Sukulu: Bɛhyia Belemgbunlililɛ edwɛkpakavolɛma dɔɔnwo mɔɔ bɛbayɛ gyima wɔ azɛlɛsinli mɔɔ bɛnda bɛnyɛ nuhua gyima la anu na bɛaboa asafo ne mɔ wɔ sunsum nu. Ɛhye ati, mediema mrenyia nee mraalɛ mɔɔ bɛtɛgyale nee agyalɛma bahola abiza nwolɛ adenle ahɔ Belemgbunlililɛ Edwɛkpakavolɛma Sukulu ne bie. Saa sukoavoma wie sukulu ne a, bɛmaa bɛkɔsonle kɛ dahuu adekpakyelɛma wɔ ɛleka mɔɔ bɛhyia moalɛ dɔɔnwo wɔ bɛ maanle ne anu la. Eza bɛbahola bɛamaa bie mɔ gyima gyɛne wɔ bɛ maanle ne anu anzɛɛ maanle gyɛne zo. Bɛbahola bɛamaa bɛ nuhua ekyi ayɛ mekɛ ezinra nu adekpakyelɛ titilima anzɛɛ adekpakyelɛ titilima. Adekpakyelɛma mɔɔ anye die sukulu ɛhye anwo la bahola ade nwolɛ edwɛkɛ wɔ nwolɛ ayia mɔɔ bɛyɛ ye wɔ maanzinli nyianu bo la anu.

¹⁸ Ɛzinzalɛ Arane Geleade Baebolo Sukulu: Ɔwɔ kɛ mediema mrenyia nee mraalɛ mɔɔ bɛtɛgyale nee agyalɛma mɔɔ bahɔ sukulu ɛhye bie la kola ka Nrelenza na bɛlɛyɛ dahuu ɛzonlenlɛ gyima titili ne bie. Ɔwɔ kɛ bɛyɛ menli mɔɔ bɛbahola bɛatoto gyima mɔɔ bɛyɛ ye wɔ daselɛlilɛ nu anzɛɛ Bɛtɛle la anwo ngyehyɛleɛ ne mɔ boɛ a. Bɛla ye ali dɛba kɛ bɛ nye die nwo kɛ bɛbazonle bɛ mediema na bɛkola bɛdua ɛbulɛ adenle zo bɛmaa awie mɔ sukoa kɛ bɛbali Baebolo nee teokelase adehilelɛ nzi. Ɔfese Kɔmatii ne to ɛsalɛ fɛlɛ sukoavoma mɔɔ fɛta la kɛ bɛva nwolɛ ademizalɛ kɛlata bɛrɛla. Bɛmaa menli mɔɔ kɛwie sukulu ɛhye la kɔyɛ gyima wɔ azɛlɛsinli ne anu anzɛɛ kɔsonle wɔ Bɛtɛle wɔ bɛ maanle nu anzɛɛ maanle gyɛne zo.

BƐTƐLE ƐZONLENLƐ

¹⁹ Ɔle nwolɛ adenle kpole kɛ ɛbazonle wɔ Bɛtɛle. Duma Bɛtɛle kile “Nyamenle Sua Nu,” na duma ɛhye fɛta azua ɛhye mɔ mɔɔ bɛyɛ teokelase gyima wɔ ɛkɛ la. Mediema mɔɔ sonle wɔ Bɛtɛle la yɛ gyima titili boa wɔ Baebolo mbuluku ɛyɛlɛ, bɛ bo ɛhilelɛ nee bɛ ɛhyɛlɛ nu. Bɛ gyima ne anwo hyia Neazo Eku ne mɔɔ nea asafo mɔɔ wɔ ewiade amuala azo na eza ɔkile bɛ adenle la kpalɛ. Bɛtɛlema dɔɔnwo mɔɔ kile edwɛkɛ bo la de ɔfese ne azɛlɛsinli ne ɛleka mɔɔ bɛka aneɛ ne mɔɔ bɛkile ɔ bo la yɛɛ bɛyɛ gyima ne wɔ ɛkɛ. Ɛhye maa bɛte aneɛ ne mɔɔ bɛka ye alehyenlɛ biala la. Eza ɔmaa bɛnwu ye saa menli ne te kɛzi bɛhile aneɛ ne abo wɔ mbuluku ne mɔ anu la abo a.

²⁰ Gyima dɔɔnwo mɔɔ bɛyɛ ye Bɛtɛle la hyia anwosesebɛ. Ɛhye ati, mediema mrenyia mɔɔ bɛle mgbavolɛ mɔɔ bɛdu bɛ nwo bɛmaa, bɛzɔne bɛ, bɛte kpɔkɛ na bɛ nwo yɛ se la a bɛta bɛfɛlɛ bɛ wɔ Bɛtɛle a. Saa bɛhyia menli wɔ ɔfese ne mɔɔ nea gyima ne azo wɔ wɔ maanle ne anu la na ɛkulo kɛ ɛkɔsonle wɔ Bɛtɛle a, ɛbahola wɔanwu mɔɔ bɛkpondɛ bɛavi wɔ ɛkɛ ne la wɔavi wɔ asafo nu mgbanyima ne mɔ ɛkɛ.

SUAZILƐ GYIMA

²¹ Teokelase azua ɛzilɛ gyima ne le kɛ Sɔlɔmɔn ɛzonlenlɛsua ne ɛzilɛ la, na ɔboka ɛzonlenlɛ nwuanzanwuanza nwo. (1 Arl. 8:13-18) Mediema mrenyia nee mraalɛ dɔɔnwo bɔ mɔdenle kpalɛ tu bɛ nwo maa fa bɛ mekɛ nee bɛ ninyɛne boa wɔ gyima ɛhye ɛyɛlɛ nu.

²² Ɛbahola wɔaboa ɔ? Saa ɛle nolobɔlɛnli mɔɔ bɛzɔne wɔ na ɛkulo kɛ ɛyɛ gyima ɛhye bie na ɛnze gyima ne anye zo kpalɛ bɔbɔ a, mediema mɔɔ nea suazilɛ gyima ne azo wɔ ɛleka mɔɔ ɛwɔ la anye balie kɛ ɛkpondɛ kɛ ɛboa la na bɛbahile wɔ gyima ne ɛyɛlɛ. Duzu ati a ɛnga ɛngile mgbanyima ne mɔ kɛ ɛkulo kɛ ɛboa ɛ? Nolobɔlɛma bie mɔ mɔɔ bɛfɛta la ɛhola ɛdu bɛ nwo ɛmaa wɔ teokelase azua ɛzilɛ gyima ne anu wɔ maanle gyɛne zo bɔbɔ.

²³ Suazilɛ gyima nwo adenle dɔɔnwo wɔ ɛkɛ mɔɔ ɛbahola wɔayɛ bie a. Nolobɔlɛma mɔɔ bɛzɔne bɛ mɔɔ bɛyɛ neazo kpalɛ na bɛlɛ adwinlililɛ nwo adwenle ekyi mɔɔ bɛbahola bɛaboa suazilɛ gyima bie mɔɔ bikye bɛ la bahola azonle kɛ Local Design/Construction volunteers (Maanle Ye Anu Suazilɛ/Ngyehyɛleɛ nwo tunwomaa gyimayɛvoma). Bie mɔ noko kola boa wɔ suazilɛ gyima mɔɔ wɔ moa la anu wɔ mekɛ ezinra nu, na Bɛtɛle kpa bɛ maa bɛsonle kɛ construction volunteers (suazilɛ tunwomaa gyimayɛvoma) ɔvi dapɛne nwiɔ kɔdwu siane nsa. Bɛfɛlɛ menli mɔɔ bɛkpa bɛ bɛmaa bɛyɛ gyima ɛhye bɛkyɛ la kɛ suazilɛ azonvolɛ. Bɛfɛlɛ suazilɛ sonvolɛ mɔɔ yɛ gyima wɔ maanle gyɛne zo la maanle gyɛne zo suazilɛ sonvolɛ. Local Design/Construction volunteers ne nee asafo ne anu amra mɔɔ tu bɛ nwo maa la boa Suazilɛ Ekpunli ne mɔɔ di gyima biala anyunlu la. Suazilɛ Ekpunli ne wie gyima ko a ɛnee bɛhɔ fofolɛ zo wɔ maanle ne anu.

SUNSUM NU BODANE BONI MƆ A GYI Ɛ NYE ZO A?

²⁴ Saa wɔyila ɛ nwo zo wɔmaa Gyihova a, ɛnee ɛkulo kɛ ɛsonle ye dahuu. Noko sunsum nu bodane boni mɔ a gyi ɛ nye zo a? Saa sunsum nu bodane gyi ɛ nye zo a, ɔbamaa wɔava wɔ anwosesebɛ nee ninyɛne gyɛne wɔali gyima kpalɛ. (1 Kɔl. 9:26) Bodane zɛhae mɔ mɔɔ ɛbava wɔazie ɛ nye zo la bamaa wɔanyi sunsum nu na bɛbaboa wɔ bɛamaa wɔava wɔ adwenle wɔazie ninyɛne mɔɔ hyia kpalɛ la azo wɔ mekɛ mɔɔ ɛlɛkpondɛ ɛzonlenlɛ nu nwolɛ adenle bieko la.​—Fel. 1:10; 1 Tim. 4:15, 16.

²⁵ Wɔ yɛ Nyamenle ɛzonlenlɛ nu, ɛzoanvolɛ Pɔɔlo yɛle neazo kɛnlɛma mɔɔ yɛbahola yɛazukoa a. (1 Kɔl. 11:1) Pɔɔlo bɔle mɔdenle kpalɛ wɔ Gyihova ɛzonlenlɛ nu. Ɔnwunle kɛ Gyihova ɛbuke nwolɛ adenle dɔɔnwo ɛmaa ye. Pɔɔlo hɛlɛle Kɔlente mediema ne mɔ kɛ: “Bɛbuke anlenkɛ kpole bie mɔɔ bamaa meayɛ gyima dɔɔnwo la bɛmaa me.” Asoo ɛhye ɛnle zɔ wɔ yɛ afoa nu ɔ? Ɔle zɔ, yɛnyia nwolɛ adenle dɔɔnwo kɛ yɛ nee asafo ne babɔ nu azonle Gyihova, titili wɔ Belemgbunlililɛ edwɛkpa ne nolobɔlɛ nu. Noko kɛ mɔɔ bie dole Pɔɔlo la, “anlenkɛ kpole” ne anu ɛvalɛ nwo “dwazotiama dɔɔnwo” wɔ ɛkɛ na ɔwɔ kɛ yɛko yɛtia bɛ. (1 Kɔl. 16:9) Ɛnee Pɔɔlo kulo kɛ ɔkomo ɔ nwo zo. Kakye kɛ ɔhanle kɛ: “Mekile me nwonane ne nyane na meyɛ ye kɛ akɛlɛ.” (1 Kɔl. 9:24-27) Yɛlɛ adwenle zɔhane bie ɔ?

²⁶ Bɛlɛmaa awie biala anwosesebɛ kɛ ɔnlea kɛzi ye tɛnlabelɛ ne de la na ɔpele ɔdwu sunsum nu bodane bie mɔ anwo. Menli dɔɔnwo ɛlɛyɛ dahuu ɛzonlenlɛ gyima ne foa bie ɛnɛ ɔluakɛ bɛvale teokelase bodane bɛziele bɛ nye zo ndɛ. Bɛle ngakula bɔbɔ la, bɛ awovolɛ nee awie mɔ maanle bɛ anwosesebɛ kɛ bɛyɛ ye zɔ. Ɛhye ati, bɛlɛyɛ gyima mɔɔ yɛ ahunlundwolɛ wɔ Gyihova ɛzonlenlɛ nu​—bɛtɛnunle bɛ nwo. (Mrɛ. 10:22) Bodane gyɛne mɔɔ anwo hyia la a le kɛ ɛbahɔ daselɛlilɛ dapɛne biala, ɛbabɔ sua nu Baebolo ɛzukoalɛ bo na wɔayɛ anzɛɛ ɛbava mekɛ dɔɔnwo wɔaziezie ɛ nwo wɔamaa debiezukoalɛ ne mɔ. Na mɔɔ hyia kpalɛ la a le kɛ yɛbagyinla kpundii na yɛawie yɛ ɛzonlenlɛ gyima ne bɔkɔɔ. Saa yɛyɛ ye zɔ a, yɛbawula Gyihova anyunlunyia na yɛadwu yɛ bodane titili ne mɔɔ yemɔ a le Gyihova mɔɔ yɛkulo kɛ yɛsonle ye dahuu la anwo.​—Luku 13:24; 1 Tim. 4:7b, 8.