Ahyehyɛdeɛ Mɔɔ Yɛ Gyihova Ɛhulolɛdeɛ

WƆ EWIADE amuala, yɛlɛ ɛzonlenlɛ, maanyɛlɛ, gualilɛ nee ahyehyɛdeɛ dɔɔnwo mɔɔ bɛ nyɛleɛ, bɛ bodane, bɛ adwenle nee bɛ nzuzulɛ le ngakyile a. Noko ɔda ali kɛ ahyehyɛdeɛ ko bie le ngakyile fi mɔɔ ɛha la amuala anwo. Nyamenle Edwɛkɛ ne kile kɛ yemɔ a le Gyihova Alasevolɛ.

² Ɔyɛ anyelielɛ kɛ ɛwɔ Gyihova ahyehyɛdeɛ ne anu la. Ɛlɛyɛ Nyamenle ɛhulolɛdeɛ kɛkala ɔluakɛ wɔzukoa wɔnwu ye. (Edw. 143:10; Wlo. 12:2) Ɛle sonvolɛ mɔɔ bɔ mɔdenle, na ɛ nee ɛ gɔnwo mɔ diedima mɔɔ wɔ ewiade amuala na bɛlɛ ɛlɔlɛ la a ɛlɛsonle a. (2 Kɔl. 6:4; 1 Pita 2:17; 5:9) Kɛ mɔɔ Nyamenle Edwɛkɛ ne ka la, ɛhye maa ɛnyia nyilalɛ dɔɔnwo na ɛ nye die kpalɛ. (Mrɛ. 10:22; Maake 10:30) Saa ɛfa nɔhalɛlilɛ ɛyɛ Gyihova ɛhulolɛdeɛ kɛkala a, ɛnee ɛlɛsiezie ɛ nwo wɔamaa kenle bie asetɛnla mɔɔ yɛ anyelielɛ la.​—1 Tim. 6:18, 19; 1 Dwɔn 2:17.

³ Yɛ Bɔvolɛ Kpole ne lɛ ewiade amuala ahyehyɛdeɛ mɔɔ bɛnea zo wɔ teokelase adenle zo a. Ɛhye kile kɛ Gyihova mɔɔ le debie biala Ati la a nea zo a. Yɛlɛ ye nu anwodozo bɔkɔɔ. Ɔle yɛ Ndɛnebuavolɛ, Mɛla Maavolɛ nee yɛ Belemgbunli. (Aye. 33:22) Ɔle anzodwolɛ Nyamenle, yemɔti yeyɛ ngyehyɛleɛ amaa yɛ nee ‘ye abɔ nu ayɛ gyima’ na yeali ye bodane nwo gyima.​—2 Kɔl. 6:1, 2.

⁴ Mekɛ mɔɔ ewiade ɛhye awieleɛ ne ɛlɛbikye kpalɛ la, ɛnee yɛlɛnyia anyuhɔlɛ wɔ Belemgbunli Kelaese Gyisɛse mɔɔ bɛkpa ye la adehilelɛ bo. (Aye. 55:4; Yek. 6:2; 11:15) Gyisɛse hanle kɛ ye ɛdoavolɛma bɛayɛ gyima mgbole adɛla mɔɔ ɔyɛle wɔ mekɛ mɔɔ ɔyɛ ye azɛlɛ ye azo ɛzonlenlɛ gyima ne la. (Dwɔn 14:12) Ɛhye bayɛ zɔ ɔluakɛ, Gyisɛse ɛdoavolɛma anwo bazo na bɛava mekɛ tendenle bɛayɛ bɛ gyima ne wɔ azɛlɛsinli dɔɔnwo anu. Bɛbabɔ Belemgbunlililɛ edwɛkpa ne nolo bɛahɔdwu azɛlɛ ye azo ɛleka biala.​—Mat. 24:14; 28:19, 20; Gyi. 1:8.

⁵ Ɛhye ɛra nu. Noko kɛ mɔɔ Gyisɛse hanle la, saa Gyihova mekɛ mɔɔ yehile la dwu a bɛbagyakyi edwɛkpa ne nolobɔlɛ. Nyamenle ngapezo Edwɛkɛ ne amuala kile kɛ Gyihova kenle kpole anu ɛzulolɛ ne ɛbikye.​—Dww. 2:31; Zɛf. 1:14-18; 2:2, 3; 1 Pita 4:7.

⁶ Kɛmɔ yɛnwu Gyihova ɛhulolɛdeɛ wɔ awieleɛ mekɛ ɛhye anu la ati, ɔwɔ kɛ yɛbɔ mɔdenle yɛyɛ mɔɔ Nyamenle kpondɛ kɛ yɛyɛ la. Ɔti ɔwɔ kɛ yɛnwu kɛzi Nyamenle ahyehyɛdeɛ ne yɛ gyima la na yɛ nee ye yɛ ko wɔ debie biala anu. Baebolo ngyinlazo, mɛla, adehilelɛ, ngyehyɛleɛ nee ngilehilelɛ mɔɔ wɔ Nyamenle Edwɛkɛ ne anu la a ahyehyɛdeɛ ne nea nwo yɛ gyima a.​—Edw. 19:7-9.

⁷ Saa Gyihova menli di adehilelɛ ɛhye mɔ azo a, ɔmaa bɛbɔ nu bɛtɛnla na bɛfa anzodwolɛ nee koyɛlɛ bɛyɛ gyima. (Edw. 133:1; Aye. 60:17; Wlo. 14:19) Duzu a maa abusuabɔlɛ mɔɔ yɛ nee yɛ mediema lɛ la anu mia a? Ɛlɔlɛ ɔ. Yemɔ a ka yɛ maa yɛyɛ debie biala a. (Dwɔn 13:34, 35; Kɔl. 3:14) Ɛhye ati, yɛ nee Gyihova ahyehyɛdeɛ ne foa mɔɔ wɔ anwuma la dua.

GYIHOVA AHYEHYƐDEƐ NE FOA MƆƆ WƆ ANWUMA

⁸ Ayezaya, Yizikeɛle nee Daneɛle mɔɔ ɛnee bɛle ngapezoma la yɛɛ ɛzoanvolɛ Dwɔn nwunle Gyihova ahyehyɛdeɛ ne foa mɔɔ wɔ anwuma la anwo ɛnyelɛzodeɛnwunlɛ. (Aye., tile 6; Yiz., tile 1; Dan. 7:9, 10) Dwɔn hanle nwolɛ edwɛkɛ ekyi hilele yɛ wɔ Yekile buluku ne anu. Ɔnwunle Gyihova kɛ ɔde anyunlunyia belemgbunli ebia zo yɛɛ anwumabɔvolɛma ɛbɔ ye ɛyia na bɛlɛka kɛ: “Nwuanzanwuanza, nwuanzanwuanza, nwuanzanwuanza a le Gyihova Nyamenle, Tumivolɛ Bedevinli ne, mɔɔ ɛnee wɔ ɛkɛ, na ɔtɛbɔ ɛkɛ na ɔlɛba la.” (Yek. 4:8) Dwɔn eza nwunle kɛ, “boaneralɛ bie . . . [gyi] belemgbunli ebia ne . . . avinli,” Nyamenle Boaneralɛ ne, Gyisɛse Kelaese.​—Yek. 5:6, 13, 14; Dwɔn 1:29.

⁹ Gyihova mɔɔ de belemgbunli ebia zo la anwo ɛnyelɛzodeɛnwunlɛ ɛhye kile kɛ ɔdaye a ɔle ahyehyɛdeɛ ɛhye Ati a. Bɛha ye gyinlabelɛ ne mɔɔ kpogya la anwo edwɛkɛ wɔ 1 Edwɛkɛsisilɛ 29:11, 12 kɛ: “O Gyihova, kpoleyɛlɛ nee tumi nee kɛnlɛma nee anyunlunyia yɛɛ enililɛ le wɔ ɛdeɛ, ɔluakɛ debie biala mɔɔ wɔ anwuma nee azɛlɛ ye azo la le wɔ ɛdeɛ. O Gyihova, belemgbunlililɛ ne le wɔ ɛdeɛ. Ɛdawɔ a ɛkpogya ɛ nwo zo wɔ debie biala azo a. Anwonyia nee anyunlunyia vi wɔ ɛkɛ, na ɛdi debie biala azo belemgbunli yɛɛ tumi nee kpoleyɛlɛ wɔ ɛ sa nu, na ɛ sa kola maa awie yɛ sonlakpole na ɛmaa menli kɔsɔɔti anwosesebɛ.”

¹⁰ Kɛ Gyihova agɔnwo gyimayɛvolɛ la, Gyisɛse Kelaese lɛ gyinlabelɛ mɔɔ kpogya la wɔ anwuma yɛɛ bɛmaa ye tumi kpole. Nyamenle ‘vale ninyɛne kɔsɔɔti wulale ɔ gyakɛ abo na ɔyɛle ye ninyɛne mɔɔ wɔ asafo ne anu la amuala ati.’ (Ɛfɛ. 1:22) Ɛzoanvolɛ Pɔɔlo hanle Gyisɛse anwo edwɛkɛ kɛ: “Nyamenle kpogyale ye zo na ɔmaanle ye dibilɛ kpole kpalɛ na ɔlole ye ɔmaanle ye duma mɔɔ tɛla duma biala la, yemɔti ɔwɔ kɛ awie biala koto wɔ Gyisɛse duma nu​—bɛdabɛ mɔɔ bɛwɔ anwuma nee azɛlɛ ye azo nee azɛlɛ bo la amuala​—na ɔwɔ kɛ awie biala ka ye baguase kɛ Gyisɛse Kelaese le Awulae ɔfa ɔwula Nyamenle Selɛ ne anyunlunyia.” (Fel. 2:9-11) Ɛhye ati, yɛbahola yɛanyia anwodozo wɔ Gyisɛse Kelaese tumililɛ ne mɔɔ tenrɛ la anu.

¹¹ Ngapezonli Daneɛle nwunle ɛnyelɛzodeɛnwunlɛ bie kɛ Mɔɔ Ye Mekɛ Vi Tete la de ye belemgbunli ebia nu, na anwumabɔvolɛma kɛyɛ “apenle mɔnwo apenle kɔ zo sonle ye yɛɛ apenle bulu mɔnwo apenle bulu gyigyi ɔ nyunlu ɛkɛ.” (Dan. 7:10) Baebolo ne ka bɛ nwo edwɛkɛ kɛ “sunsum mɔɔ bɛyɛ gyima nwuanzanwuanza, mɔɔ bɛsoa bɛ bɛmaa bɛkɔboa bɛdabɛ mɔɔ bɛbalie bɛ ngoane la.” (Hib. 1:14) Bɛmaa anwumabɔvolɛ ɛhye mɔ amuala dibilɛ wɔ Nyamenle ahyehyɛdeɛ ne anu.​—Kɔl. 1:16.

¹² Saa yɛnyia mekɛ yɛsuzu ninyɛne mɔɔ wɔ Gyihova ahyehyɛdeɛ ne foa mɔɔ wɔ anwuma la anwo kpalɛ a, yɛbahola yɛade mɔɔ Ayezaya yɛle la abo. Wɔ ɛnyelɛzodeɛnwunlɛ ne anu, ɔnwunle “Gyihova kɛ ɔde belemgbunli ebia kpole bie anu,” na “ɛnee sɛlafen gyigyi ɔ ti zo anwuma.” Ayezaya hanle kɛ: “Medame, me gyakɔ! Mewu mewie, ɔluakɛ mele sonla mɔɔ me nloa anu edwɛkɛ nwo ɛnde, yɛɛ mede menli mɔɔ bɛ nloa anu edwɛkɛ nwo ɛnde la avinli; ɔluakɛ meva me nye menwu Belemgbunli ne, ɛlɔne Gyihova mumua ne!” Mɔɔ Ayezaya nwunle kɛzi Gyihova ahyehyɛdeɛ ne kpole si de la, ɔ nwo bubule ye na ɔbɛlɛle ɔ nwo aze. Ɛhye hanle Ayezaya kpole yemɔti mekɛ mɔɔ ɔdele ɛnelɛ bie ɔvile anwuma kɛ bɛkpondɛ awie bɛazoa ye bɛamaa yeahɔbɔ Gyihova ndɛnebualɛ ne nolo la, ɔhanle kɛ: “Mewɔ ɛke! Soa me.”​—Aye. 6:1-5, 8.

¹³ Saa Gyihova menli nwu ye ahyehyɛdeɛ ne na bɛkile nwolɛ anyezɔlɛ a, ɔmaa bɛdabɛ noko anwosesebɛ. Mekɛ mɔɔ ahyehyɛdeɛ ne ɛlɛkɔ ɔ nyunlu la, yɛbɔ mɔdenle kɛ yɛ nee ye balua. Yɛbɔ mɔdenle kɛ yɛbanyia Gyihova ahyehyɛdeɛ ne anu anwodozo ɛnɛ.

GYIHOVA AHYEHYƐDEƐ NE ƐLƐKƆ Ɔ NYUNLU

¹⁴ Bɛyɛ Gyihova anwo nvoninli wɔ Yizikeɛle ngapezo ne anu wɔ tile 1 ne kɛ ɔlɛka anwuma ehwili totohyia bie. Zɛhae anyunlunyia ehwili ne gyi ɛkɛ maa Gyihova ahyehyɛdeɛ ne foa mɔɔ wɔ anwuma la. Ɔfi atiakunlukɛnlɛma nu ɔka ehwili ɛhye, ɔkile ye adenle na ɔfa ɔdi gyima wɔ adenle mɔɔ nee ye bodane ne mɔ yia la azo.​—Edw. 103:20.

¹⁵ Ehwili ɛhye agyakɛ ko biala lɛ ko mɔɔ vea nu a​—bɛ mgbole sɛ yɛɛ ko vea ko anu. Adenle ɛhye ala azo a ehwili ne kola kɔ “afoa nna ne ɛleka biala” a. (Yiz. 1:17) Ehwili ne kola pɛne ɔ nwo arɛlevilɛ nu. Noko, ɛhye ɛngile kɛ ɔnlɛ awie mɔɔ ze nrɛlɛbɛ mɔɔ kile ye adenle a. Gyihova ɛmmaa ye ahyehyɛdeɛ ne ɛndwazo ala ɛngɔ ɛleka biala mɔɔ ɔkulo kɛ ɔkɔ la. Yizikeɛle 1:20 ka kɛ: “Bɛkɔ ɛleka biala mɔɔ sunsum ne kɛhile bɛ kɛ bɛhɔ” la. Ɛhye ati, Gyihova a dua ye sunsum ne azo maa ye ahyehyɛdeɛ ne kɔ ɛleka biala mɔɔ ɔkulo kɛ ɔkɔ la a. Ɔwɔ kɛ yɛbiza yɛ nwo kɛ, ‘Me nee ye lua ɔ?’

¹⁶ Debiezukoalɛ nee daselɛlilɛ ɛhɔlɛ angomekye ɛngile kɛ yɛ nee Gyihova ahyehyɛdeɛ ne lua. Emomu, ɔkile kɛ ɔwɔ kɛ yɛnyia anyuhɔlɛ na yɛnyi sunsum nu. Ɔwɔ kɛ yɛbɔ mɔdenle yɛnwu “ninyɛne mɔɔ hyia kpalɛ la” na yɛdi sunsum nu aleɛ mɔɔ ba dahuu la. (Fel. 1:10; 4:8, 9; Dwɔn 17:3) Eza ɔwɔ kɛ yɛkakye kɛ ɛleka mɔɔ ngyehyɛleɛ wɔ la, ngitanwolilɛ kpalɛ nee koyɛlɛ wɔ ɛkɛ. Yemɔti ɔwɔ kɛ yɛnwu kɛzi ɔhyia kɛ yɛfa sunsum nu nee nwonane afoa nu ninyɛne mɔɔ Gyihova ɛva ɛmaa yɛ la yɛdi gyima kpalɛ amaa yɛahola yɛayɛ ye gyima ne la. Saa yɛ nee Gyihova anwuma ehwili ne lua a, yɛ ɛbɛlabɔlɛ nee edwɛkɛ ne mɔɔ yɛbɔ ye nolo la bayia.

¹⁷ Ɔlua Gyihova ahyehyɛdeɛ ne moalɛ zo, yɛlɛnyia anyuhɔlɛ wɔ Nyamenle ɛhulolɛdeɛ ɛyɛlɛ nu. Kakye kɛ Gyihova a le anwuma ehwili ɛhye Kavolɛ a. Ɛhye ati, ye ehwili ne mɔɔ yɛ nee ye lua la kile kɛ yɛbu Gyihova, yɛɛ yɛlɛ yɛ Bodane ne anu anwodozo. (Edw. 18:31) Baebolo ne bɔ ɛwɔkɛ kɛ: “Gyihova bamaa ye menli ne anwosesebɛ. Gyihova bava anzodwolɛ ayila ye menli ne.” (Edw. 29:11) Ɛnɛ, kɛmɔ yɛwɔ Gyihova ahyehyɛdeɛ ne anu la ati, yɛnyia anwosesebɛ nee anzodwolɛ mɔɔ ɔfa ɔmaa ye menli mɔɔ yehyehyɛ bɛ la bie. Amgba, saa yɛyɛ Gyihova ɛhulolɛdeɛ ɛnɛ nee dahuu a, yɛbanyia nyilalɛ dɔɔnwo.