Kɛlata Mɔɔ Vi Neazo Eku Ne Ɛkɛ

Yɛ Mediema Nolobɔlɛma Mɔɔ Ka Edwɛkpa Ne:

Nea nwolɛ adenle kɛnlɛma mɔɔ yɛnyia kɛ yɛbɔ nu yɛlɛsonle Gyihova, nɔhalɛ Nyamenle kokye ne a! Ɔle “yɛ gɔnwo gyimayɛvo” na yeva ngoanelielɛ gyima nwuanzanwuanza ne mɔɔ le ye Belemgbunlililɛ ne anwo edwɛkpa ne nolobɔlɛ nee ye ɛhilehilelɛ la yewula yɛ sa nu. (1 Kɔl. 3:9; Mat. 28:19, 20) Amaa yɛayɛ ewiade amuala gyima ɛhye wɔ anzodwolɛ nee koyɛlɛ nu la, ɔwɔ kɛ bɛyɛ nwolɛ ngyehyɛleɛ kpalɛ.​—1 Kɔl. 14:40.

Buluku ɛhye bamaa wɔanwu kɛzi Kilisiene asafo ne yɛ ye gyima ɛnɛ la. Kɛ Gyihova Dasevolɛ la, ɔbamaa wɔanwu nwolɛ adenle nee ɛzonlelilɛ mɔɔ ɛlɛ la. Saa nwolɛ adenle mɔɔ ɛlɛ la sonle bolɛ maa wɔ na ɛdi wɔ ɛzonlelilɛ ne mɔ anwo gyima a, ɛ ‘nwo bayɛ se wɔ diedi ne anu.’​—Gyi. 16:4, 5; Gal. 6:5.

Ɔti, yɛmaa wɔ anwosesebɛ kɛ ɛzukoa buluku ɛhye kpalɛ. Dwenledwenle kɛzi ɛbava edwɛkɛ ne wɔali gyima wɔ wɔ ɛbɛlabɔlɛ nu la anwo. Kɛ neazo la, saa bɔ zo mɔɔ wɔrayɛ nolobɔlɛnli mɔɔ bɛtɛsɔnenle wɔ a, duzu a ɔwɔ kɛ ɛyɛ amaa bɛazɔne wɔ kɛ Gyihova Dasevolɛ a? Saa bɛzɔne wɔ noko a, duzu a ɛbahola wɔayɛ amaa wɔanyi wɔ sunsum nu na wɔadɛlɛ wɔ ɛzonlenlɛ gyima ne anu a? (1 Tim. 4:15) Kɛ ɔkɛyɛ na wɔamaa anzodwolɛ adɛnla asafo ne anu ɛ? (2 Kɔl. 13:11) Kpondɛ kpuya ɛhye mɔ anwo mualɛ wɔ buluku ɛhye anu.

Saa ɛle nrenyia mɔɔ bɛzɔne wɔ a, duzu a ɛbayɛ amaa wɔafɛta kɛ asafo nu sonvolɛ anzɛɛ asafo nu kpanyinli a? Kɛmɔ menli dɔɔnwo ɛlɛba ahyehyɛdeɛ ne anu la ati, bɛhyia mediema mrenyia mɔɔ bɛali asafo ne anyunlu la anwo. Buluku ɛhye bamaa wɔanwu mɔɔ ɔwɔ kɛ ‘ɛyɛ’ amaa wɔadwu sunsum nu bodane ɛhye mɔ anwo la.​—1 Tim. 3:1.

Yɛ nzɛlɛlɛ a le kɛ buluku ɛhye bamaa wɔanwu gyinlabelɛ mɔɔ ɛlɛ ye wɔ Gyihova ngyehyɛleɛ nu la na wɔahile nwolɛ anyezɔlɛ. Yɛkulo bɛ muala edwɛkɛ kpalɛ na yɛkɔ zo yɛyɛ asɔne kɛ bɛboka menli mɔɔ fa anyelielɛ sonle Gyihova, yɛ anwuma Selɛ ne dahuu la anwo.​—Edw. 37:10, 11; Aye. 65:21-25.