Foa 9
Bɛbɔ Nu Bɛzonle Gyihova
‘Bɛzonle Nyamenle mɔɔ bɔle anwuma nee aze.’—Yekile 14:7
Kɛmɔ wɔnwu ye wɔ buluku ɛhye anu la, ngyinlazo dɔɔnwo wɔ Baebolo ne anu mɔɔ baboa wɔ nee wɔ abusua ne a. Gyihova kpondɛ kɛ ɛ nye die. Yebɔ ɛwɔkɛ kɛ saa bɛdumua bɛsonle ye a, “ɔkɛva mɔɔ bɛhyia nwolɛ la ɔkɛmaa bɛ.” (Mateyu 6:33) Ɔkulo kɛ ɔfa wɔ agɔnwolɛ. Bɔ mɔdenle fa wɔ ɛdanlɛ ne bɔ Nyamenle ɛdeɛ ne anloa. Ɛhye tɛla nwolɛ adenle biala mɔɔ dasanli bahola anyia la.—Mateyu 22:37, 38.
1 MIA Ɛ NEE GYIHOVA AGƆNWOLƐVALƐ NE ANU
MƆƆ BAEBOLO NE KA LA: “Mebayɛ bɛ ze, na bɛayɛ me mra mrenya nee mraalɛ,” kɛ Gyihova se la ɛne. (2 Kɔlentema 6:18) Nyamenle kulo kɛ ɛtwe ɛbikye ye. Ɛbahola wɔalua nzɛlɛlɛ zo wɔayɛ ɛhye. Gyihova kulo kɛ ɛyɛ “nzɛlɛlɛ dahuu.” (1 Tɛsalonaekama 5:17) Ɔkulo kɛ ɔtie wɔ ngyegyelɛ nee wɔ nzuzulɛ. (Felepaema 4:6) Saa ɛ nee wɔ abusua ne bɔ nu yɛ nzɛlɛlɛ a bɛbanwu kɛ ɛdie ɛdi kɛ Nyamenle wɔ ɛkɛ amgba.
Eza ɔwɔ kɛ ɛtie Nyamenle. Bɔ mɔdenle sukoa ye Edwɛkɛ ne nee mbuluku mɔɔ ɔgyi Baebolo ne azo la. (Edwɛndolɛ 1:1, 2) Dwenledwenle mɔɔ ɛbazukoa la anwo. (Edwɛndolɛ 77:11, 12) Bieko, Nyamenle kpondɛ kɛ ɛkɔ Keleseɛnema ayia dahuu.—Edwɛndolɛ 122:1-4.
Gyihova anwo edwɛkɛ mɔɔ ɛbaha wɔahile awie mɔ la le adenle bieko mɔɔ ɛbahola wɔalua zo ɛ nee Nyamenle anyia agɔnwolɛvalɛ kpalɛ a. Saa ɛta ɛyɛ ɛhye a, ɛbabikye ye kpalɛ.—Mateyu 28:19, 20.
DUZU A ƐBAHOLA WƆAYƐ A?:
Kpondɛ mekɛ alehyenlɛ biala fa kenga Baebolo ne na yɛ asɔne
Kɛ abusua la, bɛmaa sunsum nu ninyɛne ɛhyia bɛ ɛdɛla anyelielɛ ninyɛne nee bɛ menle ɛlielɛ
2 MAA WƆ ABUSUA ƐZONLENLƐ ƐYƐ ANYELIELƐ
MƆƆ BAEBOLO NE KA LA: “Bɛhwe bɛbikye Nyamenle, na ɔdaye noko ɔkɛbikye bɛ.” (Gyemise 4:8) Ɔwɔ kɛ ɛyɛ abusua ɛzonlenlɛ nwo ngyehyɛleɛ kpalɛ na ɛdi zo. (Mɔlebɛbo 18:19) Tɛ ɛhye angome. Ɛ nee Nyamenle ɛlua alehyenlɛ biala. Ka Nyamenle anwo edwɛkɛ kile wɔ abusua ne ‘wɔ bɛ awuke ne mɔ anu, adenle zo nee mekɛ mɔɔ bɛla anzɛɛ bɛdwazo la.’ Dua ɛhye azo maa wɔ abusua ne nee Nyamenle agɔnwolɛvalɛ ne anu ɛmia. (Mɛla ne 6:6, 7) Bɔ mɔdenle sukoa Dwɔhyua, ɔhanle kɛ: “Mame, me nee me sua nu amra, yɛbazonle [Gyihova].”—Dwɔhyua 24:15.
DUZU A ƐBAHOLA WƆAYƐ A?:
Dwenle wɔ abusua ne anu sonla ko biala ngyianlɛ nwo na yɛ ngyehyɛleɛ fa tete bɛ