ƐZUKOALƐDEƐ 13
Ɛnee Temɔte Kulo Kɛ Ɔboa Menli
Temɔte le kpavolɛ mɔɔ ɛnee ɔ nye die kɛ ɔbaboa menli a. Ɔdule adenle ɔhɔle ɛleka dɔɔnwo ɔhɔboale awie mɔ. Ɛhye ati, ɔ nye liele wɔ ɛbɛlabɔlɛ nu. Ɛkulo kɛ ɛte nwolɛ edwɛkɛ ɔ?—
Temɔte mame nee ye nana hilele ye Gyihova anwo debie
Temɔte nyinle wɔ sua bie mɔɔ bɛfɛlɛ ye Lesetela la azo. Mekɛ mɔɔ ɔle kakula la, ye nana Loyese nee ye mame, Yunaesi, bɔle ɔ bo hilele ye Gyihova anwo debie. Mekɛ mɔɔ Temɔte ɛlɛnyi la, ɛnee ɔkulo kɛ ɔboa menli ɔmaa bɛsukoa Gyihova anwo debie.
Mekɛ mɔɔ Temɔte le kpavolɛ la, Pɔɔlo hanle kɛ ɔmaa bɛdu adenle na bɛhɔha edwɛkɛ ne wɔ ɛleka ngakyile. Temɔte hanle kɛ: ‘Yoo!’ Ɛnee yeziezie ɔ nwo kɛ ɔbahɔ na yeaboa awie mɔ.
Temɔte nee Pɔɔlo hɔle Masidonea sua bie mɔɔ bɛfɛlɛ ye Tɛsalonaeka la azo. Amaa bɛadwu ɛkɛ la, ɛnee ɔwɔ kɛ bɛtia adenle tendenle na akee bɛfo meli. Mekɛ mɔɔ bɛdwule ɛkɛ ne la, bɛboale menli dɔɔnwo bɛmanle bɛzukoale Gyihova anwo debie. Noko menli bie vale ɛya na bɛbɔle mɔdenle kɛ bɛboda bɛ. Yemɔti ɛnee ɔwɔ kɛ Pɔɔlo nee Temɔte fi ɛkɛ na bɛkɔka edwɛkɛ ne wɔ ɛleka fofolɛ.
Temɔte bɔle ɛbɛla mɔɔ yɛ anyelielɛ la
Siane bie anzi, Pɔɔlo hanle hilele Temɔte kɛ ɔzia ɔhɔ Tɛsalonaeka na ɔnlea kɛzi mediema ne mɔ anwo de la. Ɛnee ɔhyia akɛnrasesebɛ na yeahola yeahɔ zɔhane sua ne mɔɔ zolɛ yɛ ɛzulolɛ la azo! Noko Temɔte hɔle ɔluakɛ ɛnee ɔdwenle mediema mɔɔ wɔ ɛkɛ la anwo. Ɔvale amaneɛ fɛlɛko ɔrɛlɛle Pɔɔlo. Ɛnee mediema mɔɔ wɔ Tɛsalonaeka la ɛlɛbɔ bɛ nwo mɔdenle!
Temɔte nee Pɔɔlo luale ɛvolɛ dɔɔnwo. Mekɛ bie Pɔɔlo hɛlɛle kɛ Temɔte a le sonla mɔɔ fɛta mɔɔ ɔbazoa ye yeamaa yeaboa asafo ne mɔ a. Ɛnee Temɔte kulo Gyihova nee menli.
Ɛkulo menli yɛɛ ɛkulo kɛ ɛboa bɛ ɛmaa bɛsukoa Gyihova anwo debie ɔ?— Saa ye zɔhane a, ɛnee ɛbabɔ ɛbɛla mɔɔ yɛ anyelielɛ, kɛmɔ Temɔte yɛle la!