Pɔɔlo Awozoa Ne Nyianle Akɛnrasesebɛ

Maa yɛzukoa kpavolɛ bie mɔɔ liele ye ankele ngoane la anwo debie. Kpavolɛ ne ankele a le ɛzoanvolɛ Pɔɔlo. Yɛnze kpavolɛ ne duma, noko yɛze kɛ ɔyɛle debie mɔɔ hyia akɛnrasesebɛ la. Ɛkulo kɛ ɛte mɔɔ ɔyɛle la anwo edwɛkɛ ɔ?—

Ɛnee Pɔɔlo la efiade wɔ Gyɛlusalɛm. Ɛnee bɛhye ye ɔluakɛ ɔlɛka Gyisɛse anwo edwɛkɛ la ati. Ɛnee menli bie mɔɔ lɛ adwenle ɛtane la kpɔ Pɔɔlo, yemɔti bɛvale ɔ nwo adwenle. Bɛhanle kɛ: ‘Bɛmaa yɛha yɛhile sogya kpanyinli ne kɛ ɔmaa bɛva Pɔɔlo bɛrɛla kɔɔto. Yɛbavea adenle ne anu na Pɔɔlo dwu ɛkɛ a yɛahu ye!’

Pɔɔlo awozoa ne dele kpɔkɛ ɛhye mɔɔ bɛbɔ la. Duzu a ɔbayɛ a? Ɔhɔle efiade ɛkɛ na ɔhanle nwolɛ edwɛkɛ ɔhilele Pɔɔlo. Ɛkɛ ne ala, Pɔɔlo hanle hilele ye kɛ ɔha nwolɛ edwɛkɛ ɔhile sogya kpanyinli ne. Ɛdwenle kɛ ɛnee ɔla aze kɛ Pɔɔlo awozoa ne baha ahile kpanyinli ne ɔ?— Kyɛkyɛ, ɔluakɛ ɛnee kpanyinli ne le sonlakpole. Noko Pɔɔlo awozoa ne nyianle akɛnrasesebɛ na ɔdendɛle ɔhilele kpanyinli ne.

Kpanyinli ne nwunle mɔɔ ɔbayɛ la. Ɔkpondɛle sogyama kɛyɛ 500 ɔmanle bɛbɔle Pɔɔlo anwo bane! Ɔhanle ɔhilele bɛ kɛ bɛva Pɔɔlo bɛhɔ Sizalia zɔhane nɔe ne. Pɔɔlo nyianle ngoane ɔ?— Ɛhɛe, menli mɔɔ nyianle adwenle ɛtane ne la asa anga ye! Bɛ adwenle ɛtane ne anyɛ boɛ.

Duzu a ɛsukoa ɛfi edwɛkɛ ɛhye anu a?— Ɛdawɔ noko ɛbahola wɔanyia akɛnrasesebɛ kɛ Pɔɔlo awozoa ne la. Ɔwɔ kɛ yɛfa akɛnrasesebɛ yɛka Gyihova anwo edwɛkɛ. Ɛbanyia akɛnrasesebɛ na wɔahɔ zo wɔaha Gyihova anwo edwɛkɛ ɔ?— Saa ɛyɛ zɔ a, ɛbalie awie ngoane.