Kɛlata Mɔɔ Vi Neazo EKu Ne Ɛkɛ

Adiema Mɔɔ Kulo Gyihova:

Gyisɛse hanle kɛ: “Bɛbanwu nɔhalɛ ne, na nɔhalɛ ne bamaa bɛanyia bɛ ti.” (Dwɔn 8:32) Nea kɛzi edwɛkɛ ɛhye maa anwosesebɛ a la! Ɛhɛe, “awieleɛ mekɛ” ɛhye mɔɔ anwongyelelɛ dɔɔnwo nee adalɛ ɛbu zo wɔ nu bɔbɔ ka anu, yɛbahola yɛanwu nɔhalɛ ne. (2 Temɔte 3:1) Ɛkakye mekɛ mɔɔ lumua mɔɔ ɛnwunle nɔhalɛ ne mɔɔ wɔ Nyamenle Edwɛkɛ ne anu la ɔ? Nea kɛsi ɛ nye liele la!

Noko akee, kɛmɔ ɔhyia kɛ yɛnyia nɔhalɛ ndelebɛbo na yɛka nwolɛ edwɛkɛ yɛkile awie mɔ dahuu la, zɔhane ala a ɔhyia kɛ yɛbɔ yɛ ɛbɛla yɛmaa ɔ nee nɔhalɛ ne yia a. Amaa yɛahola yɛayɛ zɔ la, ɔwɔ kɛ yɛsie yɛ nwo wɔ Nyamenle ɛhulolɛ ne anu. Duzu a ɛhye kile a? Edwɛkɛ mɔɔ Gyisɛse hanle ye nɔe ne mɔɔ aleɛ kye a ɔbawu la, bua kpuyia ɛhye. Ɔzele ye ɛzoanvolɛ nɔhavoma ne kɛ: “Saa bɛdi me mɛla ne mɔ azo a ɛnee bɛde me ɛhulolɛ ne anu, kɛmɔ meli Selɛ ne mɛla zo na mede ye ɛhulolɛ ne anu la.”​—Dwɔn 15:10.

Yɛ ye nzonlɛ kɛ Gyisɛse luale ɔ Ze ne mɛla mɔɔ ɔlile zo la azo a ɔdɛnlanle Nyamenle ɛhulolɛ ne anu a. Zɔhane ala a ɔwɔ kɛ yɛdayɛ noko yɛyɛ ye ɛnɛ a. Amaa yɛahɔ zo yɛadɛnla Nyamenle ɛhulolɛ ne anu la, ɔwɔ kɛ yɛfa nɔhalɛ ne yɛbɔ yɛ ɛbɛla alehyenlɛ biala. Zɔhane nɔe ne ala, Gyisɛse hanle kɛ: “Kɛkala mɔɔ bɛnwu nɔhalɛ ɛhye la, saa bɛfa bɛyɛ gyima a bɛkɛli fɛlɛko kpole!”​—Dwɔn 13:17.

Yɛ nye la kɛ buluku ɛhye baboa wɔ yeamaa wɔahɔ zo wɔava nɔhalɛ ne wɔabɔ wɔ ɛbɛla na wɔazie ɛ nwo “wɔ Nyamenle ɛhulolɛ ne anu” wɔahendɛ “ngoane ne mɔɔ ɛnlɛ awieleɛ” la.​—Dwuudu 21.