EDWƐKƐ 34
“Kɔ Zo Dua Nɔhalɛ Ne Anu”
“Kɔ zo dua nɔhalɛ ne anu.”—3 DWƆN 4.
EDWƐNE 111 Deɛmɔti Yɛ Nye Die La
MƆƆ YƐBAZUKOAa
1. Saa yɛka kɛzi yɛnwunle “nɔhalɛ ne” la anwo edwɛkɛ a, kɛzi ɔboa yɛ ɛ?
“KƐZI ɛnwunle nɔhalɛ ne ɛ?” Ye biala anu, wɔbua kpuya ɛhye fane dɔɔnwo. Ɛhye le kpuya mɔɔ limoa mɔɔ yɛ mediema ta biza wɔ mekɛ mɔɔ bɛkulo kɛ bɛnwu yɛ kpalɛ la anu ko. Yɛ nye die nwo kɛ yɛbanwu kɛzi yɛ mediema ranwunle Gyihova na bɛhulole ye la, yɛɛ yɛ nye die kɛ yɛbaha kɛzi nɔhalɛ ne sonle bolɛ maa yɛ la anwo edwɛkɛ yɛahile bɛ. (Wlo. 1:11) Adawubɔlɛ ɛhye mɔ maa yɛkakye kɛzi nɔhalɛ ne sonle bolɛ maa yɛ la. Eza ɔmaa yɛbɔ kpɔkɛ kpundii kɛ ‘yɛbahɔ zo yɛalua nɔhalɛ ne anu,’ mɔɔ kile kɛ yɛbahɔ zo yɛabɔ ɛbɛla mɔɔ ɔbamaa yɛanyia Gyihova nyilalɛ na ɔ nye alie yɛ nwo la.—3 Dwɔn 4.
2. Duzu a yɛbazuzu nwo wɔ edwɛkɛ ɛhye anu a?
2 Wɔ edwɛkɛ ɛhye anu, yɛbazuzu deɛmɔti yɛkulo nɔhalɛ ne la bie mɔ anwo. Eza yɛbazuzu kɛzi yɛbahɔ zo yɛahile kɛ yɛkulo ahyɛlɛdeɛ ɛhye mɔɔ sonle bolɛ la anwo. Ye biala anu, ɛhye mɔɔ yɛbazuzu nwo la bamaa yɛahile anyezɔlɛ kpole wɔ mɔɔ Gyihova ɛyɛ amaa yeahwe yɛ yeara nɔhalɛ ne anu la anwo. (Dwɔn 6:44) Eza ɔbamaa yɛanyia ɛhulolɛ kpole kɛ yɛbaha nɔhalɛ ne anwo edwɛkɛ yɛahile awie mɔ.
DEƐMƆTI YƐKULO “NƆHALƐ NE” LA
3. Debie titili mɔɔ ɔti yɛkulo nɔhalɛ ne la a le boni?
3 Ninyɛne dɔɔnwo ati a yɛkulo nɔhalɛ ne a. Mɔɔ tɛla ɔ muala la a le kɛ yɛkulo Gyihova Nyamenle, ahenle mɔɔ nɔhalɛ ne vi ye ɛkɛ la. Ɔlua ye Edwɛkɛ Baebolo ne azo, yɛranwu ye kɛ ɔnle anwuma nee aze Bɔvolɛ mɔɔ lɛ tumi kpole ala, emomu eza ɔle yɛ anwuma Selɛ mɔɔ lɛ ɛlɔlɛ na ɔdwenle yɛ nwo a. (1 Pita 5:7) Yɛze kɛ ɔle “anwunvɔnezelɛ nee ahunluyelɛyelalɛ Nyamenle, ɔkyɛ na yeava ɛya yɛɛ ɛlɔlɛ kpundii nee nɔhalɛlilɛ ɛyi ye tɛkɛɛ.” (Ɛzɛ. 34:6) Gyihova kulo pɛlepɛlelilɛ. (Aye. 61:8) Saa yɛlɛnwu amaneɛ a, ɔyɛ ye nyane na yeziezie ɔ nwo kɛ—ɛhɛe, ɔlɛ ɛhulolɛ kɛ—ɔbamaa amaneɛnwunlɛ kɔsɔɔti abo apɛ wɔ ye mekɛ kpalɛ nu. (Gyɛ. 29:11) Anyelielɛ edwɛkɛ boni ɛne! Ɛhye ati a yɛkulo Gyihova kpalɛ la!
Baebolo Nu Nɔhalɛ Ne Le Kɛ . . . Sɛkɛ
Kɛ mɔɔ sɛkɛ maa ɛlɛne gyinla kpundii la, yɛ anyelazo ne mɔɔ gyi Baebolo ne azo la kola maa yɛgyinla kpundii wɔ sɔnea mekɛ nu. Eza Baebolo ne anu nɔhalɛ ne ka yɛ maa yɛka kenle bie nwo anyelazo mɔɔ yɛlɛ la anwo edwɛkɛ yɛkile awie mɔ (Nea ɛdendɛkpunli 4-7)
4-5. Duzu ati a ɛzoanvolɛ Pɔɔlo vale yɛ anyelazo ne totole sɛkɛ nwo a?
4 Debie bieko mɔɔ ɔti yɛkulo nɔhalɛ ne la a le boni? Nɔhalɛ ne maa yɛnyia nvasoɛ dɔɔnwo. Suzu neazo bie anwo. Baebolo nu nɔhalɛ ne bie a le kenle bie nwo anyelazo mɔɔ yɛlɛ la. Amaa yɛanwu nvasoɛ mɔɔ wɔ anyelazo ɛhye azo la, ɛzoanvolɛ Pɔɔlo hɛlɛle kɛ: “Anyelazo ɛhye mɔɔ yɛlɛ la le kɛ sɛkɛ maa yɛ ɛkɛla, ɔgyi ye pi yɛɛ ɔgyi ye kpundii.” (Hib. 6:19) Kɛ mɔɔ sɛkɛ maa ɛlɛne gyinla kpundii la, zɔhane ala a yɛ anyelazo ne maa yɛgyinla kpundii wɔ mekɛ mɔɔ yɛlɛyia sɔnea wɔ yɛ ɛbɛlabɔlɛ nu la a.
5 Wɔ ɛke, ɛnee Pɔɔlo ɛlɛka anwuma anyelazo ne mɔɔ sonle bolɛ maa Kilisienema mɔɔ bɛkpokpa bɛ la anwo edwɛkɛ. Noko eza ye edwɛkɛ ne fale Kilisienema mɔɔ bɛlɛ anyelazo kɛ bɛbadɛnla aze dahuu wɔ paladaese azɛlɛ ne azo la anwo. (Dwɔn 3:16) Nɔhalɛ nu, dahuu ngoane nwo anyelazo ne mɔɔ yɛzukoa nwolɛ debie la ɛmaa nvasoɛ ɛra yɛ ɛbɛlabɔlɛ zo.
6-7. Kɛzi kenle bie nwo nɔhalɛ ne mɔɔ Yvonne ɛzukoa la ɛboa ye ɛ?
6 Suzu adiema raalɛ bie mɔɔ bɛfɛlɛ ye Yvonne la anwubielɛ ne anwo. Bɛantete ye wɔ nɔhalɛ ne anu, na wɔ ye ngakula nu ɛnee ɔsulo ewule. Ɔkakye edwɛkɛ bie mɔɔ ɔgengale mɔɔ ɔ rɛle anvi ye ɛlɛ la: “Ɔbadwu mekɛ bie la aleɛ ɛnrɛhye bieko.” Ɔhanle kɛ: “Ɔdwu nɔɔzo a, zɔhane edwɛkɛ ne ɛmmaa mengola da na medwenledwenle kenle bie anwo. Menganle ye wɔ me adwenle nu kɛ, ‘Nɔhalɛ nu tɛ ɛbɛlabɔlɛ ne ala ɛne. Duzu ati a mede aze a?’ Ɛnee mengulo kɛ mewu!”
7 Nzinlii mɔɔ Yvonne rayɛle kakula bɛlɛra la, Gyihova Alasevolɛ lile ye daselɛ. Ɔhanle kɛ: “Akee menliele menlile kɛ mebahola meanyia anyelazo kɛ mebadɛnla Paladaese azɛlɛ ne azo dahuu.” Kɛzi nɔhalɛ ne mɔɔ yɛ diema raalɛ ne zukoale la boale ye ɛ? Ɔdoale zolɛ kɛ: “Kɛkala mendwazo nɔɔzo mendwenledwenle kenle bie anzɛɛ ewule nwo bieko.” Ɛkola ɛnwu kɛ, nɔhalɛ ne sonle bolɛ kpalɛ maa Yvonne na ɔ nye die nwo kpalɛ kɛ ɔbaha kenle bie nwo anyelazo mɔɔ ɔlɛ la anwo edwɛkɛ yeahile awie mɔ.—1 Tim. 4:16.
Baebolo Nu Nɔhalɛ Ne Le Kɛ . . . Agudeɛ
Gyihova mɔɔ yɛlɛsonle ye kɛkala nee anyelazo mɔɔ yɛlɛ kɛ yɛbadɛnla aze dahuu wɔ ye Belemgbunlililɛ ne tumililɛ bo la le kɛ agudeɛ. Ɔsonle bolɛ ɔtɛla afɔle biala mɔɔ ɔwɔ kɛ yɛbɔ la (Nea ɛdendɛkpunli 8-11)
8-9. (a) Wɔ Gyisɛse ndonwo ne mɔ ko anu, kɛzi nrenyia bie bule agudeɛ bie mɔɔ ɔnwunle ye la ɛ? (b) Kɛzi nɔhalɛ ne sonle bolɛ maa wɔ ɛ?
8 Eza Baebolo ne anu nɔhalɛ ne bie a le edwɛkpa mɔɔ fale Nyamenle Belemgbunlililɛ ne anwo la. Gyisɛse vale nɔhalɛ ne mɔɔ fale zɔhane Belemgbunlililɛ ne anwo la totole agudeɛ bie mɔɔ vea la anwo. Kɛ mɔɔ bɛhɛlɛ ye wɔ Mateyu 13:40 la, Gyisɛse hanle kɛ: “Anwuma Belemgbunlililɛ ne le kɛ agudeɛ bie mɔɔ vea ɛya nu mɔɔ nrenyia bie nwunle ye na ɔvale ɔveale la; kɛmɔ ɔ nye liele la ati, ɔhɔdɔnenle debie biala mɔɔ ɔlɛ la na ɔhɔdɔle zɔhane azɛlɛ ne.” Yɛ ye nzonlɛ kɛ, ɛnee nrenyia ne ɛnlua agudeɛ ɛkpondɛlɛ. Noko mɔɔ ɔnwunle ye la, ɔvale ninyɛne dɔɔnwo ɔbɔle afɔle amaa ɔ sa aha ye. Nɔhalɛ nu, ɔdɔnenle debie biala mɔɔ ɔlɛ la. Duzu ati ɔ? Ɔluakɛ ɛnee ɔze kɛzi zɔhane agudeɛ ne sonle bolɛ la. Ɛnee ɔsonle bolɛ ɔtɛla debie biala mɔɔ ɔwɔ kɛ ɔfi ɔ sa la.
9 Zɔhane a ɛte nganeɛ wɔ nɔhalɛ ne anwo ɔ? Ɛhɛe! Yɛze kɛ yɛnrɛhola yɛnrɛva debie biala mɔɔ wɔ ewiade anu la yɛnrɛtoto anyelielɛ mɔɔ yɛlɛ kɛ yɛsonle Gyihova kɛkala nee anyelazo mɔɔ yɛlɛ kɛ yɛbadɛnla aze dahuu wɔ kenle bie Belemgbunlililɛ ne tumililɛ bo la anwo ɛlɛ. Nwolɛ adenle mɔɔ yɛnyia kɛ yɛbava Gyihova agɔnwolɛ la sonle bolɛ tɛla afɔle biala mɔɔ ɔwɔ kɛ yɛbɔ la. Mɔɔ maa yɛ nye die kpole la a le kɛ ‘yɛbazɔ ɔ nye bɔkɔɔ.’—Kɔl. 1:10.
10-11. Duzu a hanle Michael maanle ɔyɛle nzenzaleɛ wɔ ye ɛbɛlabɔlɛ nu a?
10 Yɛ nuhua dɔɔnwo ɛva ninyɛne dɔɔnwo ɛbɔ afɔle amaa yɛazɔ Gyihova anye. Yɛ nuhua bie mɔ ɛgyakyi gyima mɔɔ anyunlunyia wɔ nu mɔɔ ɛnee bɛyɛ wɔ ewiade ne anu la. Bie mɔ noko ɛgyakyi anwonyia ɛkpondɛlɛ. Mɔɔ bie mɔ noko zukoale Gyihova anwo debie la, bɛhakyile kɛzi bɛbɔ bɛ ɛbɛla la bɔkɔɔ. Zɔhane a Michael yɛle a. Bɛantete ye wɔ nɔhalɛ ne anu. Mɔɔ ɔle kakula kpavolɛ la, ɔzukoale karate ɛbɔlɛ. Ɔhanle kɛ: “Ɛnee mɔɔ hyia me kpalɛ la a le kɛ mebanwu kɛ dahuu biala mete kpɔkɛ bɔkɔɔ. Ɛnee ɔdwu mekɛ ne bie a mete nganeɛ kɛ awie biala ɛnrɛhola ɛnrɛli me nwo zo konim.” Noko mɔɔ Michael bɔle ɔ bo kɛ ɔsukoa Baebolo ne la, ɔnwunle adwenle mɔɔ Gyihova lɛ wɔ basabasayɛlɛ nwo la. (Edw. 11:5) Michael hanle agyalɛma ne mɔɔ nee ye zukoale debie la anwo edwɛkɛ kɛ: “Bɛanga bɛangile me ɛlɛ kɛ mengyakyi karate ɛbɔlɛ; Baebolo ne anu nɔhalɛ ne ala a bɛhɔle zo bɛhilehilele me a.”
11 Mɔɔ Michael ɛlɛkɔ zo azukoa Gyihova anwo debie la, ɛnee ɔlɛnyia Ɔ nwo ɛlɔlɛ kpole. Kɛzi Gyihova se Ye azonvolɛ anwunvɔne la a hanle ye ahonle kpalɛ a. Nzinlii, Michael nwunle kɛ ɔhyia kɛ ɔyɛ nzenzaleɛ wɔ ye ɛbɛlabɔlɛ nu. Ɔhanle kɛ: “Ɛnee meze kɛ karate mɔɔ ɔwɔ kɛ megyakyi ye ɛbɔlɛ la a bayɛ se kpalɛ amaa me a. Noko ɛnee meze kɛ saa meyɛ zɔ a Gyihova anye balie, yɛɛ ɛnee medie medi bɔkɔɔ kɛ Gyihova mɔɔ mebazonle ye la sonle bolɛ tɛla afɔle biala mɔɔ mebabɔ la.” Michael nwunle kɛ nɔhalɛ ne mɔɔ yenwu ye la sonle bolɛ kpalɛ na yemɔ a hanle ye maanle ɔyɛle nzenzaleɛ mgbole wɔ ye ɛbɛlabɔlɛ nu a.—Gye. 1:25.
Baebolo Nu Nɔhalɛ Ne Le Kɛ . . . Kɛnlaneɛ
Kɛnlaneɛ mɔɔ ta kpalɛ la maa yɛnwu aze wɔ awozinli nu. Zɔhane ala a Nyamenle Edwɛkɛ ne maa yɛnwu aze wɔ Seetan ewiade ne mɔɔ wɔ awozinli nu la anu a (Nea ɛdendɛkpunli 12-13)
12-13. Kɛzi Baebolo ne anu nɔhalɛ ne boale Mayli ɛ?
12 Amaa yɛanwu kɛzi nɔhalɛ ne sonle bolɛ la, Baebolo ne vale nɔhalɛ ne totole kɛnlaneɛ mɔɔ ta wɔ awozinli nu la anwo. (Edw. 119:105; Ɛfɛ. 5:8) Mayli mɔɔ vi Azerbaijan la anye die moalɛ mɔɔ yenyia yevi Nyamenle Edwɛkɛ ne anu la anwo kpalɛ. Ɛnee ye awovolɛ ɛnle ɛzonlenlɛ ko anu. Ye papa le Kɛnlamonli yɛɛ ye mame le Dwuunli. Mayli hanle kɛ: “Medie medi kɛ Nyamenle wɔ ɛkɛ, noko ɛnee ninyɛne dɔɔnwo kye me adwenle. Membizale kɛ, ‘Duzu ati a Nyamenle bɔle alesama kɛ bɛranwu amaneɛ wɔ bɛ ɛbɛlabɔlɛ kɔsɔɔti anu na akee bɛhile bɛ nyane dahuu wɔ hɛɛle ɛ?’ Kɛmɔ ɛnee menli ka kɛ mɔɔ bazi biala la le Nyamenle ɛhulolɛdeɛ la ati, membizale kɛ, ‘Asoo Nyamenle nea alesama anwo zo na bɛlɛnwu amaneɛ a ɛnee ɔ nye ɛlie ɔ?’”
13 Mayli hɔle zo kpondɛle ye kpuya ne mɔ anwo mualɛ. Nzinlii, ɔmaanle bɛ nee ye zukoale Baebolo ne na ɔrale nɔhalɛ ne anu. Ɔhanle kɛ: “Baebolo ne anu edwɛkɛ ne mɔɔ ndelebɛbo wɔ nu la boale me maanle me nye liele kpalɛ. Ngilehilenu mɔɔ tɔ ɛnzolɛ nu mɔɔ menyianle menvile Nyamenle Edwɛkɛ ne anu la ɛmaa me nzo nu ɛdwo me.” Kɛ mɔɔ Mayli yɛle la, yɛ muala yɛye Gyihova, “Ahenle mɔɔ vɛlɛle yɛ vile awozinli nu rale ye wienyi ne mɔɔ yɛ nwanwane anu la” ayɛlɛ.—1 Pita 2:9.
14. Kɛ ɔkɛyɛ na yɛamaa nɔhalɛ ne anwo ɛlɔlɛ mɔɔ yɛlɛ la ayɛ kpole ɛ? (Eza nea ɛlɛka, “Ndotonwo Bie Mɔ.”)
14 Ɛhye mɔ le neazo ekyi bie mɔɔ maa yɛnwu kɛzi nɔhalɛ ne sonle bolɛ la. Ye biala anu, gyɛne dɔɔnwo wɔ wɔ adwenle nu. Duzu ati a ɛmkpondɛ ninyɛne gyɛne mɔɔ ɔti ɔwɔ kɛ yɛkulo nɔhalɛ ne la wɔ ɛ ti anwo debiezukoalɛ nu ɛ? Mekɛ mɔɔ yɛlɛnyia nɔhalɛ ne anwo ɛlɔlɛ kpole la, ɔbamaa yɛakpondɛ ndenle yɛalua zo yɛahile kɛ yɛkulo nɔhalɛ ne.
KƐZI YƐKILE KƐ YƐKULO NƆHALƐ NE LA
15. Adenle ko mɔɔ yɛbahola yɛalua zo yɛahile kɛ yɛkulo nɔhalɛ ne la a le boni?
15 Yɛbahola yɛahile kɛ yɛkulo nɔhalɛ ne ɔlua Baebolo ne nee mbuluku mɔɔ gyi Baebolo ne azo mɔɔ yɛbazukoa ye dahuu la azo. Ɔluakɛ ɔnva nwo mekɛ tendenle mɔɔ yɛva yɛdɛnla nɔhalɛ ne anu la, dahuu yɛlɛ ninyɛne dɔɔnwo yɛsukoa. Ɛzinzalɛ Arane mɔɔ bɛlimoale bɛyɛle la hanle kɛ: “Adalɛ ɛbu ewiade, ɔti ɔbahola yeayɛ se kɛ ɛbanwu nɔhalɛ ne. Noko amaa wɔanwu ye la, ɔwɔ kɛ ɛkɔ zo ɛkpondɛ. . . . Amaa wɔanyia ye la, ɔwɔ kɛ ɛbɔ mɔdenle. Mmamaa ɛ kunlu dwo nɔhalɛ ekyi mɔɔ wɔnwu ye la anwo. . . . Dahuu kɔ zo kpondɛ bie dɔɔnwo boka nwo.” Debiezukoalɛ ɛnla aze, noko saa ɛsukoa a, ɛbanyia zolɛ nvasoɛ.
16. Adenle boni a ɛdua zo ɛsukoa debie a ɔboa wɔ a? (Mrɛlɛbulɛ 2:4-6)
16 Tɛ yɛ muala a yɛkulo ɛgengalɛ nee debiezukoalɛ a. Noko Gyihova se ‘yɛhɔ zo yɛkpondɛ’ amaa yɛade nɔhalɛ ne abo kpalɛ. (Kenga Mrɛlɛbulɛ 2:4-6.) Saa yɛbɔ yɛ nwo mɔdenle zɛhae a, dahuu yɛnyia zolɛ nvasoɛ. Corey hanle kɛ saa ɔlɛkenga Baebolo ne a, ɔfa ye adwenle ɔsie ngyɛnu ko azo ɔwie a yeahɔ fofolɛ zo. Ɔhanle kɛ: “Mekenga ɔbodwɛkɛ biala mɔɔ wɔ nwolɛ la, menea ngɛlɛlera biala mɔɔ bɛhwe adwenle bɛhɔ zo la na meyɛ neɛnleanu dɔɔnwo meboka nwo. . . . Ɛhye maa mesukoa ninyɛne dɔɔnwo!” Saa yɛdua adenle ɛhye anzɛɛ adenle gyɛne zo yɛsukoa debie bɔbɔ a, mekɛ mɔɔ yɛnyia nee mɔdenle mɔɔ yɛbɔ yɛsukoa la kile kɛ nɔhalɛ ne sonle bolɛ maa yɛ.—Edw. 1:1-3.
17. Duzu a kile kɛ yɛlɛfa mɔɔ yɛsukoa la yɛali gyima a? (Gyemise 1:25)
17 Nɔhalɛ nu, yɛze kɛ saa yɛsukoa nɔhalɛ ne a, ɛnee yɛtɛwiele. Amaa yɛanyia mɔɔ yɛsukoa la azo nvasoɛ bɔkɔɔ la, ɔwɔ kɛ yɛfa yɛbɔ yɛ ɛbɛla. Saa yɛyɛ ye zɔ a, yɛɛ nɔhalɛ ne bamaa yɛ nye alie kpalɛ a. (Kenga Gyemise 1:25.) Kɛ ɔkɛyɛ na yɛanwu kɛ yɛlɛfa nɔhalɛ ne yɛabɔ yɛ ɛbɛla ɛ? Adiema nrenyia ko hanle kɛ ɔwɔ kɛ yɛneɛnlea yɛ ɛbɛlabɔlɛ nu yɛnwu ɛleka mɔɔ yɛlɛfa mɔɔ yɛsukoa la yɛali gyima nee ɛleka mɔɔ ɔhyia kɛ yɛbɔ yɛ nwo mɔdenle la. Ɛzoanvolɛ Pɔɔlo hanle kɛ: “Ɛleka mɔɔ yɛnyia anyuhɔlɛ yɛhɔdwu la, bɛmaa yɛhɔ zo yɛbɔ yɛ ɛbɛla pɛpɛɛpɛ wɔ adenle ɛhye ala azo.”—Fel. 3:16.
18. Duzu ati a yɛyɛ biala mɔɔ yɛbahola la ‘yɛkɔ zo yɛdua nɔhalɛ ne anu’ a?
18 Dwenle nvasoɛ mɔɔ saa yɛyɛ biala mɔɔ yɛbahola la ‘yɛkɔ zo yɛdua nɔhalɛ ne anu’ a yɛnyia la anwo! Yɛ ɛbɛlabɔlɛ yɛ kpalɛ na eza yɛmaa Gyihova nee yɛ mediema diedima anye die. (Mrɛ. 27:11; 3 Dwɔn 4) Asoo debie gyɛne bamaa yɛahulo nɔhalɛ ne na yeamaa yɛava yɛabɔ yɛ ɛbɛla ɔ?
EDWƐNE 144 Fa Ɛ Nye To Ahyɛlɛdeɛ Ne Azo!
a Yɛta yɛka kɛ yɛ diedi nee kɛzi yɛbɔ yɛ ɛbɛla la a le “nɔhalɛ ne” a. Saa bɔ zo mɔɔ yɛra nɔhalɛ ne anu anzɛɛ bɛtetele yɛ wɔ nɔhalɛ ne anu a, yɛsuzu deɛmɔti yɛkulo nɔhalɛ ne la anwo a ɔbahola yeaboa yɛ kpalɛ. Saa yɛyɛ ye zɔ a, ɔbamaa yɛabɔ kpɔkɛ ɛsesebɛ kɛ yɛbayɛ mɔɔ bamaa Gyihova anye alie yɛ nwo la.