“Bɛzie Bɛ Nwo wɔ Nyamenle Ɛhulolɛ ne Anu”
1. Bodane boni ati a bɛyɛle “Bɛzie Bɛ Nwo wɔ Nyamenle Ɛhulolɛ ne Anu” buluku ne a?
1 Nea kɛzi yɛ nye la ɛsesebɛ kɛ yɛbazukoa buluku fofolɛ ne mɔɔ se “Bɛzie Bɛ Nwo wɔ Nyamenle Ɛhulolɛ ne Anu” wɔ Asafo Baebolo Ɛzukoalɛ bo wɔ dapɛne ne mɔɔ babɔ ɔ bo February 23 la anu a! Kɛlata mɔɔ Neazo Eku ne hɛlɛle manle awie biala mɔɔ kulo Gyihova la fa edwɛkɛ ɛhye dwula kɛ: “Yɛ nye la kɛ buluku ɛhye baboa wɔ yeamaa wɔahɔ zo wɔava nɔhalɛ ne wɔabɔ wɔ ɛbɛla na wɔazie ɛ nwo ‘wɔ Nyamenle ɛhulolɛ ne anu wɔahendɛ ngoane ne mɔɔ ɛnlɛ awieleɛ la.’—Dwu. 21.”
2. Ɛbɛlabɔlɛ afoa boni mɔ anu a buluku fofolɛ ɛhye baboa yɛ a?
2 Mɔɔ Yɛ Nye la kɛ Yɛbazukoa: Kɛzi Baebolo ngyinlazo ka ninyɛne mɔɔ le kɛ agɔnwolɛvalɛ, anyelielɛ ninyɛne, ɛbulɛ mɔɔ ɔwɔ kɛ yɛnyia yɛmaa tumililɛ, sonla subane, agyalɛ, ɛdendɛlɛ nee amaamuo nwo edwɛkɛ ɛ? Buluku ne batete yɛ adwenle yeamaa ɔ nee tenlene ngyinlazo mɔɔ di munli mɔɔ wɔ Nyamenle Edwɛkɛ ne anu la ayɛ ko. (Edw. 19:7, 8) Saa yɛnyia kɛzi Gyihova dwenle ninyɛne nwo la anwo ndelebɛbo kpole a, ɔbaha yɛ yeamaa yɛayɛ tieyɛ wɔ ɛbɛlabɔlɛ afoa kɔsɔɔti anu kɛ yɛfa yɛazɔ ɔ nye.—Mrɛ. 27:11; 1 Dwɔn 5:3.
3. Duzu ati a ɔwɔ kɛ yɛbɔ mɔdenle yɛfa yɛ nwo yɛwula dapɛne biala debiezukoalɛ ne anu ɛ?
3 Bɔ Mɔdenle fa Ɛ Nwo Wula Nu: Mekɛ mɔɔ ɛlɛsiezie ɛ nwo la, fa sie ɛ nyunlu kɛ ɛbaye Nyamenle ayɛlɛ wɔ ye menli ne avinli. (Hib. 13:15) Asafo ne amuala babɔ nu azukoa buluku fofolɛ ɛhye. Kɛmɔ foa ekyi bie ala a yɛbazukoa la ati, ɔbamaa yɛ muala yɛanyia adenle yɛaziezie yɛ nwo kpalɛ, na yɛahola yɛaha mɔɔ yɛzukoa la anwo edwɛkɛ. Mualɛ sikalɛ ekyi mɔɔ yɛbaziezie ye kpalɛ na yɛaha la baha awie mɔ yeamaa bɛanyia ɛlɔlɛ na bɛayɛ gyima kpalɛ na ɛhye bamaa debiezukoalɛ ne ayɛ anyelielɛ na nvasoɛ ara zolɛ. (Hib. 10:24) Bieko, saa yɛ nuhua ko biala fa ɔ nwo wula nuhua na ɔka ye diedi ne anwo edwɛkɛ a yɛ nye balie kpalɛ.
4. Kɛmɔti a ɔhyia kɛ yɛdi Gyihova mɛla zo ɛ?
4 Nɔe ne mɔɔ aleɛ kye a Gyisɛse bawu la anu, ɔhilele kɛ ɔhyia kɛ awie biala di Gyihova mɛla zo na yeahola yeazie ɔ nwo wɔ Nyamenle ɛhulolɛ ne anu. (Dwɔn 15:10) “Nyamenle Ɛhulolɛ” buluku ne baboa yɛ yeamaa yɛazi kpɔkɛ kpalɛ kɛ yɛbava Baebolo ngyinlazo yɛali gyima wɔ yɛ ɛbɛlabɔlɛ nu amaa ‘yɛazie yɛ nwo wɔ Nyamenle ɛhulolɛ ne anu.’—Dwu. 21.