Baebolo Mɔɔ Bɛmaa Bɛfa Bɛdi Gyima

YƐ ƐHULOLƐ a le kɛ yɛbahwe awie biala adwenle yɛahɔ Nyamenle Edwɛkɛ, Baebolo ne azo. Edwɛkɛ ne mɔɔ yɛka la gyi zɔhane buluku nwuanzanwuanza ne azo, na yɛkulo kɛ menli nwu kɛ, mɔɔ yɛka la ɛnvi yɛdayɛ mumua ne emomu ɔvi Nyamenle ɛkɛ. Ɔwɔ kɛ menli nyia Baebolo ne anu anwodozo.

Wɔ Daselɛlilɛ Nu. Saa ɛlɛsiezie ɛ nwo wɔahɔ daselɛlilɛ dahuu a, kpa ngɛlɛlera ko anzɛɛ dɔɔnwo mɔɔ ɛ nee menli mɔɔ bɛkulo kɛ bɛtie la bazuzu nwo a. Saa ɛkpondɛ kɛ ɛfa Baebolo nwo mbuluku bie ɛmaa awie a, ɔbayɛ kpalɛ kɛ ɛbada wɔagenga Baebolo tɛkese mɔɔ fɛta la. Baebolo ne lɛ tumi kpole kile menli mɔɔ lɛ ahonle kpalɛ la adenle tɛla edwɛkɛ biala mɔɔ bie a yɛbaha la. Saa ɛnrɛhola ɛnrɛgenga Baebolo ne wɔ tɛnlabelɛ bie anu a, ɛbahola wɔaha nuhua edwɛkɛ ne. Wɔ ɛvoya mɔɔ lumua la anu, ɛnee menli dɔɔnwo ɛnlɛ Nwomamobɔleɛ ne bie. Noko, Gyisɛse nee ye ɛzoanvolɛ ne mɔ vale Ngɛlɛlera ne anu edwɛkɛ dɔɔnwo hanle. Ɔwɔ kɛ yɛbɔ mɔdenle kɛ yɛbahye ngɛlɛlera yɛagua yɛ ti anu na yɛava yɛali gyima kpalɛ wɔ daselɛlilɛ nu, ɔdwu mekɛ ne bie a ɛbahola wɔaha nuhua edwɛkɛ ne ala.

Saa ɛlɛkenga debie wɔavi Baebolo ne anu a, sɔ ye mɔɔ suamenle ne noko bahola anlea nuhua a. Saa suamenle ne nea ye Baebolo ɛdeɛ ne anu ɔkenga ɔdi ɛ nzi a, bie a mɔɔ ɔbanwu ye la baboa ye kpalɛ.

Noko, ɔwɔ kɛ ɛnwu ye kɛ menli mɔɔ kile Baebolo ne abo la bie mɔ ɛmbu Nyamenle Edwɛkɛ ne. Bie a kɛzi bɛhile edwɛkɛ bie mɔ abo la nee aneɛ mɔɔ bɛlumuale bɛvale bɛhɛlɛle Baebolo ne la ɛnyia. Bɛye Nyamenle duma mumua ne bɛvi ɛnɛ Baebolo dɔɔnwo anu, bɛheda mɔɔ mɔlebɛbo ngilebɛbo ne ka fane tɛnlabelɛ mɔɔ mɔwuamra wɔ nu nee mɔɔ Baebolo ne ka fane Nyamenle bodane mɔɔ ɔlɛ ɔmaa azɛlɛ ne la azo. Amaa wɔamaa awie anwu mɔɔ bɛyɛ la, bie a ɛbahola wɔava tɛkese titile bie mɔ wɔatoto nwo wɔ Baebolo ngakyile nu anzɛɛ wɔ Baebolo mɔɔ bɛlumuale bɛhilele ɔ bo wɔ aneɛ ko ne ala anu la anu. Edwɛkɛ titile ngakyile mɔɔ bɛhile ɔ bo wɔ ndenle ngakyile zo mɔɔ yɛta yɛfa yɛdi gyima nee kɛzi bɛva bie bɛtoto bie mɔ anwo la anwo edwɛkɛ dɔɔnwo wɔ Reasoning From the Scriptures buluku ne anu. Awie biala mɔɔ kulo nɔhalɛ la anye balie nɔhalɛ ne mɔɔ wɔmaa yenwu ye la anwo.

Wɔ Debiezukoalɛ Bo. Ɔwɔ kɛ bɛmaa bɛ muala anwosesebɛ bɛmaa bɛfa bɛ Baebolo ne bɛdi gyima wɔ debiezukoalɛ bo. Ɛhye boa kpalɛ wɔ ndenle dɔɔnwo azo. Ɔboa ɔmaa tievolɛma fa bɛ adwenle sie mɔɔ bɛlɛsuzu nwolɛ la azo. Ɔmaa bɛpɛ mɔɔ tendɛvolɛ ne ɛlɛka la anwo nvoninli. Yɛɛ ɔmaa menli fofolɛ mɔɔ bɛlɛba asafo ne anu la nwu kɛ yɛ diedi ne vi Baebolo ne anu.

Saa tievolɛma banlea bɛ Baebolo ne anu ali ɛ nzi wɔ mekɛ mɔɔ ɛlɛkenga Baebolo ne la a, ɔ muala bagyinla kɛzi ɛbamaa bɛ anwosesebɛ la azo. Ɛsalɛ mɔɔ bɛto bɛfɛlɛ bɛ fɔɔnwo la le adenle titile ko.

Ɛdawɔ tendɛvolɛ ne a ɔwɔ kɛ ɛsi ngɛlɛlera mɔɔ ɛkpondɛ kɛ wɔ tievolɛma buke na ɛsi zo la anwo kpɔkɛ a. Ɔle kpalɛ kɛ ɛbagenga ngɛlɛlera mɔɔ ɔbaboa wɔ yeamaa wɔahilehile wɔ edwɛkɛ titile ne mɔ anu la. Akee saa mekɛ wɔ nu a, fa ngɛlɛlera ekyi mɔɔ foa mɔɔ ɛlɛka azo la boka nwo.

Nɔhalɛ nu, tɛ ngɛlɛlera ne mɔɔ ɛbɔ anzɛɛ ɛmaa tievolɛma agenga la angome a hyia a. Saa ɛkenga ngɛlɛlera ko ɛwie ala a ɛnee wɔhɔ fofolɛ zo kolaa na wɔ tievolɛma anwu mɔɔ ɛlumuale ɛbɔle la a, bɛ sa nu bado na bɛbagyakyi Baebolo ne ɛbukelɛ. Nea bɛ. Saa ɛnwu kɛ bɛ nuhua dɔɔnwo ɛbuke a, kenga.

Dumua dwenle nwolɛ. Ɔka ekyii ɛkenga wɔ ngɛlɛlera ne a, dumua bɔ. Ɛhye maa mekɛ mɔɔ bɛsɛkye ye bɛgyinla bɛmaa tievolɛma buke bɛ Baebolo ne la azo te. Saa ɛkendɛ wɔ tievolɛma ɛmaa bɛbuke bɛ ngɛlɛlera ne a, ɛnrɛhola ɛnrɛha edwɛkɛ dɔɔnwo, noko nvasoɛ mɔɔ bɛbanyia wɔ zolɛ la fɛta.