Baebolo Ne Mɔɔ Bɛfa Bɛbua Edwɛkɛ

SAA bɛbiza yɛ diedi, kɛzi yɛbɔ yɛ ɛbɛla, yɛ nzuzulɛ wɔ ninyɛne mɔɔ ɛlɛsisi la anwo, yɛ kenlebie anyelazo nwo edwɛkɛ a, yɛbɔ mɔdenle yɛfa Baebolo ne yɛbua. Duzu ati ɔ? Ɔboalekɛ ɔle Nyamenle Edwɛkɛ. Baebolo ne anu a yɛ diedi ne vi a. Yɛ ɛbɛlabɔlɛ ne gyi Baebolo ne azo. Ɔmaa yɛnwu ninyɛne mɔɔ ɛlɛkɔ zo wɔ ewiade ye anu la. Yɛ kenlebie anyelazo ne gyi Baebolo ne anu ɛwɔkɛ ngakyile mɔɔ bɛvale sunsum ne bɛhɛlɛle la azo.​—2 Tem. 3:16, 17.

Yɛze gyima mɔɔ beta yɛ duma ne anwo la kpalɛ. Yɛle Gyihova Alasevolɛ. (Aye. 43:12) Yemɔti, tɛ sonla nrɛlɛbɛ a yɛgyinla zo yɛbua kpuyia a, emomu mɔɔ Gyihova ɛha mɔɔ wɔ ye Edwɛkɛ ne mɔɔ bɛvale sunsum ne bɛhɛlɛle la anu la. Nɔhalɛ nu, awie biala lɛ edwɛkɛ bie mɔ anwo adwenle, noko yɛmaa Nyamenle Edwɛkɛ ne kile yɛ kɛzi ɔwɔ kɛ yɛsuzu edwɛkɛ nwo la ɔluakɛ yɛdie yɛdi kɛ yemɔ a le nɔhalɛ ne a. Ɔle nɔhalɛ, Baebolo ne maa yɛ adenle ɔmaa yɛfa yɛ nzuzulɛ yɛyɛ gyima wɔ edwɛkɛ dɔɔnwo anwo. Kɛ anrɛɛ yɛbava yɛ nzuzulɛ yɛatinlitinli awie mɔ anwo zo la, yɛkulo kɛ yɛkilehile ngyinlazo mɔɔ wɔ Ngɛlɛlera ne anu la anu na yɛmaa yɛ tievolɛma fi bɛ ahonle nu kpa ninyɛne mɔɔ bɛdabɛ bɛkulo la. Kɛmɔ Pɔɔlo yɛle la, yɛkpondɛ kɛ yɛboa bɛ amaa “bɛalie bɛali na bɛali zolɛ.”​—Wulo. 16:26.

Bɛha Gyisɛse Kelaese anwo edwɛkɛ wɔ Yekile 3:14 kɛ ‘nɔhalɛnli nee nɔhalɛ dasevolɛ.’ Kɛzi ɔbuale kpuyia na ɔlile tɛnlabelɛ ngakyile mɔɔ ɔyiale la anwo gyima ɛ? Ɔdwu mekɛ ne bie a, ɔfa ndonwo mɔɔ ɔbamaa menli ne adwenle la ɔdi gyima. Wɔ mekɛ fofolɛ noko, ɔbiza bizavolɛ ne adwenle mɔɔ ɔlɛ wɔ ngɛlɛlera ne anwo la. Fane dɔɔnwo ne ala, ɔka ngɛlɛlera ne anu edwɛkɛ, ɔkilehile nu, anzɛɛ ɔtwe adwenle ɔkɔ zo. (Mat. 4:3-10; 12:1-8; Luku 10:25-28; 17:32) Wɔ ɛvoya ne mɔɔ lumua la anu, ɛnee bɛta bɛfa Nwomamobɔleɛ bɛsie ɛzonlenlɛ sua ne anu. Daselɛ biala ɛnle ɛkɛ mɔɔ kile kɛ ɛnee Gyisɛse lɛ ye nwomamobɔleɛ ɛdeɛ a, noko ɛnee ɔze Ngɛlɛlera ne anu edwɛkɛ kpalɛ na ɔtwe adwenle ɔkɔ zolɛ wɔ mekɛ mɔɔ ɔlɛkilehile la. (Luku 24:27, 44-47) Ɛnee ɔkola ɔka ye nɔhalɛ nu kɛ ɔngilehile ɔdaye ye ngilehilelɛ. Ɛnee ɔka mɔɔ ɔkɛde ɔkɛvi ɔ Ze ɛkɛ la.​—Dwɔn 8:26.

Yɛkulo kɛ yɛdi Gyisɛse neazo ne anzi. Yɛtɛtele kɛ Nyamenle ɛlɛtendɛ kɛmɔ Gyisɛse dele la. Noko Baebolo ne le Nyamenle Edwɛkɛ. Saa yɛgyinla yemɔ azo yɛbua edwɛkɛ a, ɔmaa yɛkoati kɛ yɛbahwe adwenle yɛara yɛ nwo zo. Yɛmaa ɔda ali kɛ, kɛ anrɛɛ yɛbala dasanli mɔɔ ɔnli munli la nzuzulɛ ali la, yɛsi pi kɛ yɛmaa Nyamenle aha mɔɔ le nɔhalɛ la.​—Dwɔn 7:18; Wulo. 3:4.

Nɔhalɛ nu, tɛ yɛ ɛhulolɛ a le kɛ yɛfa Baebolo ne yɛali gyima ala, emomu yɛyɛ ye zɔ amaa yeaboa yɛ tievolɛ ne kpalɛ. Yɛkulo kɛ ɔfa adwenle mɔɔ anu te la a ɔtie a. Ɛbahola wɔalua ahenle ne subane zo wɔala Baebolo nu nzuzulɛ bie ali wɔahile ye kɛ: “Asoo ɛnlie ɛnli kɛ mɔɔ Nyamenle ka la ala a ɔwɔ kɛ yɛfa a?” Anzɛɛ ɛbahola wɔaha kɛ: “Asoo ɛze kɛ Baebolo ne ka zɔhane kpuyia ne anwo edwɛkɛ ɔ?” Saa ɛlɛtendɛ wɔahile awie mɔɔ ɔmbu Baebolo ne la a, bie a ɛbahola wɔava mukenye fofolɛ wɔali gyima. Ɛbahola wɔaha kɛ: “Maa me nee wɔ ɛzuzu tete ngapezo ɛhye anwo.” Anzɛɛ ɛbahola wɔaha kɛ: “Buluku mɔɔ bɛhyɛ ye dɔɔnwo bɛdɛla buluku biala wɔ alesama kɛlɛtokɛ nu la ka ɛhye . . .”

Ɔdwu mekɛ ne bie a, ɛdawɔ mumua ne ɛbahola wɔahilehile tɛkese bie anu. Noko akee, saa ɔbahyia a, ɔle kpalɛ kɛ ɛbabuke Baebolo ne na wɔagenga mɔɔ ɔka la. Saa ɔbayɛ kpalɛ a, kile ahenle maa ɔnwu ngɛlɛlera ne wɔ ye Baebolo ɛdeɛ ne anu. Baebolo ne mɔɔ yɛfa yɛdi gyima fɔɔnwo la ta nyia tumi kpole wɔ menli nwo zo.​—Hib. 4:12.

Asafo nu mgbanyima lɛ gyima titile kɛ bɛbava Baebolo ne bɛali gyima wɔ mekɛ mɔɔ bɛlɛbua kpuyia la. Ninyɛne mɔɔ maa awie fɛta kɛ kpanyinli la anu ko a le kɛ adiema nrenya ne ‘sɔ Nyamenle edwɛkɛ ne mɔɔ bɛkola bɛfa bɛ rɛle bɛto zo na eza ɔ nee yɛ ngilehilelɛ ne kɔ zolɛ la anu kyengye.’ (Tae. 1:9) Asafo ne anu sonla bie bahola azi kpɔkɛ mɔɔ hyia la wɔ ye asetɛnla nu wɔ mekɛ mɔɔ asafo nu kpanyinli bie ɛdu ye folɛ ɛwie la. Nea kɛzi ɔhyia kɛ ɔwɔ kɛ ɔmaa folɛdulɛ ɛhye gyinla Ngɛlɛlera ne azo a! Asafo nu kpanyinli bie neazo wɔ ɛhye ɛyɛlɛ nu bahola anyia kɛzi menli dɔɔnwo kilehile la azo tumi.