Edwɛkɛ Titile Mɔɔ Bɛsi Zolɛ

KENGAVOLƐ mɔɔ bɔ mɔdenle la ɛnnea ɛdendɛmunli ngoko ne mɔ mɔɔ wɔ ɛdendɛkpunli ne anu la ala. Saa ɔlɛkenga debie a, ɔmaa adwenle titile mɔɔ wɔ edwɛkɛ ne mɔɔ ɔlɛkenga anu la tɛnla ye adwenle nu. Ɛhye maa ɔnwu ɛleka mɔɔ ɔwɔ kɛ ɔsi edwɛkɛ zo la.

Saa yeanyɛ ye zɔ a, edwɛkɛ titile biala ɛnrɛla ali wɔ ye ɛdendɛlɛ ne anu. Yɛɛ debie titile biala anu ɛnrɛla ɛkɛ. Saa ɔdwula ye edwɛkɛ ne a, bie a ɔbayɛ se kɛ bɛbahakye edwɛkɛ titile bie mɔɔ ɔhanle la.

Fane dɔɔnwo ne ala, saa ɛfa wɔ adwenle ɛsie edwɛkɛ titile mɔɔ ɛsi zo la azo kpalɛ a, ɔkola ɔboa kpalɛ wɔ Baebolo ne anu edwɛkɛ bie ɛgengalɛ nu. Edwɛkɛ mɔɔ bɛsi zo wɔ adenle ɛhye azo la kola maa nvasoɛ titile bie ba ɛdendɛkpunli ne mɔ mɔɔ bɛkenga bɛ wɔ sua nu Baebolo ɛzukoalɛ anzɛɛ asafo ayia bo la azo. Eza ɔhyia kpalɛ wɔ mekɛ mɔɔ ɛlɛmaa ɛdendɛlɛ mɔɔ bɛhɛlɛ nuhua edwɛkɛ ne amuala, kɛmɔ ɔyɛ a bɛyɛ ye wɔ nyianu bo la.

Kɛzi Ɛbayɛ Ye La. Bie a bɛbamaa wɔ gyima kɛ ɛgenga Baebolo ne foa bie wɔ sukulu ne anu. Duzu a ɔwɔ kɛ ɛsi zo a? Saa edwɛkɛ ne mɔɔ ɛbagenga la gyi adwenle titile bie anzɛɛ edwɛkɛ mɔɔ hyia la azo a, ɔbayɛ kpalɛ kɛ ɛbamaa yeala ali.

Saa foa ne mɔɔ ɛbagenga la le edwɛkɛdwɛndolɛ anzɛɛ adawu, ɛrɛlɛbulɛ anzɛɛ amaneɛbɔlɛ na ɛkenga ye kpalɛ a, ɔbaboa wɔ tievolɛma. (2 Tem. 3:16, 17) Saa ɛbayɛ ɛhye a, ɔwɔ kɛ ɛsuzu edwɛkɛ ne mɔɔ ɛbagenga la nee wɔ tievolɛma anwo.

Saa ɛbagenga buluku bie wɔ Baebolo ɛzukoalɛ anzɛɛ asafo ayia bo a, adwenle titile mɔɔ ɔwɔ kɛ ɛsi zolɛ la a le boni mɔ? Fa kpuyia ne mɔ mɔɔ wɔ nu la anwo mualɛ kɛ yemɔ a le edwɛkɛ titile ne mɔ a. Eza si adwenle mɔɔ fane edwɛkɛtile ngyikyi ne anwo mɔɔ wɔ edwɛkɛ ne anu la azo.

Ɔnle kɛ ɛfa ɛyɛ wɔ subane kɛ ɛbalua ɛdendɛlɛ mɔɔ bɛhɛlɛ nuhua edwɛkɛ ne amuala la azo wɔamaa ɛdendɛlɛ wɔ asafo ne anu. Noko ɔdwu mekɛ ne bie a, bɛmaa bɛfa ɛdendɛlɛ mɔɔ bɛhɛlɛ nuhua edwɛkɛ ne amuala la bɛdi gyima wɔ nyianu bie mɔ abo amaa bɛala adwenle ko ne ala ali wɔ nyianu ne mɔ kɔsɔɔti abo. Amaa tendɛvolɛ ne ahola azi edwɛkɛ titile ne mɔ azo wɔ ɛdendɛlɛ ɛhye anu la, ɔwɔ kɛ ɔdumua ɔsuzu edwɛkɛ ne anwo kpalɛ. Edwɛkɛ titile mɔɔ wɔ nu la a le boni mɔ? Ɔwɔ kɛ ɔkola ɔnwu ɛhye mɔ. Tɛ edwɛkɛ titile ne mɔ a le edwɛkɛ mɔɔ ɔte nganeɛ kɛ ɔyɛ anyelielɛ la. Bɛmɛ a le adwenle titile mɔɔ bɛgyinlanle zo bɛzieziele edwɛkɛ ne la. Ɔdwu mekɛ ne bie a, edwɛkɛ titile sikalɛ bie mɔɔ wɔ ɛdendɛlɛ ne mɔɔ bɛhɛlɛ nuhua edwɛkɛ ne amuala anu la maa ɛnwu kɛ edwɛkɛ ne le amaneɛbɔlɛ anzɛɛ bɛlɛfa bɛahilehile edwɛkɛ nu. Fane dɔɔnwo ne ala, saa bɛfa daselɛ mɔɔ ɔfoa edwɛkɛ ne azo la bɛmaa bɛwie a, bɛka edwɛkɛ mɔɔ tumi wɔ nu. Saa tendɛvolɛ ne nwu edwɛkɛ titile ɛhye mɔ a, ɔwɔ kɛ ɔyɛ bɛ nzonlɛ wɔ ye ɛdendɛlɛ kɛlata ne azo. Fane dɔɔnwo ne ala, edwɛkɛ titile ne mɔ anzo, ɔbayɛ kɛ nna anzɛɛ nnu ala. Eza ɔwɔ kɛ ɔsukoa kɛ ɔbagenga ye wɔ adenle mɔɔ ɔbamaa tievolɛma anwu edwɛkɛ titile ne mɔ ndɛndɛ la azo. Ɛhye mɔ a hyia kpalɛ wɔ ɛdendɛlɛ ne anu a. Saa ɛsi edwɛkɛ zo kpalɛ wɔ wɔ ɛdendɛlɛ ne anu a, ɔbamaa bɛahakye nuhua edwɛkɛ titile ne mɔ. Ɛhye a ɔwɔ kɛ tendɛvolɛ ne fa yɛ ye bodane a.

Ndenle ngakyile wɔ ɛkɛ mɔɔ tendɛvolɛ bahola alua zo azi edwɛkɛ zo yeamaa tievolɛma anwu edwɛkɛ titile ne mɔ a. Ɔbahola yeava anyelielɛ kpole, kɛzi ɔbadendɛ, nganeɛdelɛ kpole, anzɛɛ ye sonlabaka ne mɔɔ ɔbava yeali gyima la, saa yɛbabobɔ nuhua ekyi a.