Kɛzi Bɛdua Ngɛlata Ɛhɛlɛlɛ Zo Bɛdi Adwelie La
NGƐLATA ɛhɛlɛlɛ ɛmaa menli mgbe dɔɔnwo asetɛnla nee bɛ ɛbɛlabɔlɛ ɛnyia anyuhɔlɛ. Ɛnee Keleseɛnema Giliki Ngɛlɛlera ne anu mbuluku dɔɔnwo le ngɛlata mɔɔ bɛhɛlɛ. Ɛnɛ, yɛdayɛ noko yɛbahola yɛalua ngɛlata ɛhɛlɛlɛ zo yɛamaa diedima mɔɔ bɛle fofolɛ la anwosesebɛ, yɛ nee yɛ gɔnwo mɔ ali ngitanwo, yɛamaa yɛ mediema diedima mɔɔ ɛnyia gyimalilɛ titile bie mɔ la anwosesebɛ, yɛakyekye menli mɔɔ ɛlɛyia ngyegyelɛ la arɛle, na yɛaha edwɛkɛ mɔɔ ɔbaboa yeamaa bɛali asafo ne anu ninyɛne nwo gyima la.—1 Tɛs. 1:1-7; 5:27; 2 Pita 3:1, 2.
Kɛlata ɛhɛlɛlɛ noko le adenle kpalɛ ko mɔɔ yɛdua zo yɛdi daselɛ a. Wɔ ɛleka bie mɔ, menli dɔɔnwo de awuke anzɛɛ hotɛle mɔɔ nuhua ɛwololɛ ɛnla aze la anu. Fane dɔɔnwo ne ala bie mɔ ɛnle sua nu, yemɔti saa yɛkɔ bɛ azua nu a yɛndo bɛ. Bie mɔ noko de namunamu mɔɔ wɔ moa kpalɛ la azo.
Bie a anwodolɛ, maanle nu mɔɔ ɛnle kpalɛ anzɛɛ mekɛ mɔɔ bɛmmaa awie biala ɛnvinde la bamaa wɔaha sua nu. Ɛbahola wɔahɛlɛ kɛlata wɔali wɔ busuanli bie anzɛɛ awie mɔɔ ɛ nee ye ɛdendɛ ɛlɛ la daselɛ bieko ɔ? Wɔ Baebolo sukoavoma ne bie ɛdu ɔ? Bie a kɛlata mɔɔ ɛbahɛlɛ ye ala la bamaa ɔ nye ahɔ zo alie sunsum nu ninyɛne nwo. Anzɛɛ bie a ɛbahola wɔaha Ngɛlɛlera ne anu edwɛkɛ bie wɔahile menli mɔɔ bɔ zo mɔɔ bɛgya, bɛwo fofolɛ, anzɛɛ bɛ alɔvolɛ ɛwu la.
Kɛzi Bɛdua Kɛlata Ɛhɛlɛlɛ Zo Bɛdi Daselɛ La
Saa ɛkɛlɛ awie mɔɔ ɛtɛyiale ye ɛlɛ la kɛlata wɔali ye daselɛ a, dumua da ɛ nwo ali. Ɛbahola wɔahilehile nuhua kɛ ɛlɛyɛ tunwomaa gyima mɔɔ bɛlɛyɛ ye wɔ ewiade amuala la bie. Saa ɔhyia kɛ ɛyɛ ye zɔ a, maa ɔnwu kɛ ɛle Gyihova Dasevolɛ. Maa ahenle ne ɛnwu deɛmɔti wɔamba ye ɛkɛ na ɛlɛkɛlɛ ye la. Kɛlɛ kɛlata ne kɛ asɛɛ ɛ nee ahenle ne gyi ɛkɛ a bɛlɛtendɛ a. Noko amaa wɔava adehilelɛ mɔɔ ɔse “bɛmaa bɛ nye ɛla bɛ nwo zo kɛ nwɔlɛ, noko bɛyɛ bɛlɛvo kɛ abubule” wɔali gyima la, dwenle ɛ nwo edwɛkɛ mɔɔ ɔwɔ kɛ ɛka ɛkile ye la anwo kpalɛ.—Mat. 10:16.
Ka edwɛkɛ mɔɔ saa ɛnwunle ahenle mumua ne a anrɛɛ ɛbaha la wɔ kɛlata ne anu. Ɛbahola wɔava Reasoning buluku ne anzɛɛ Ngɛlɛlera ne anu edwɛkɛ bie mɔɔ ɛra Yɛ Belemgbunlililɛ Gyima nu kenlensa ye la anu edwɛkɛ bie wɔabuke ɔ nye. Ɛbahola wɔabiza kpuyia na wɔamaa ye anwosesebɛ kɛ ɔdwenle nwo. Nolobɔlɛma bie mɔ kile nu sikalɛ kɛ yɛlɛ ngyehyɛleɛ mɔɔ yɛfa yɛbua Baebolo nwo kpuyia mɔɔ bɛndua ɛhwee na akee bɛaha mbuluku mɔɔ yɛsukoa la bie mɔ edwɛkɛtile ne. Kɛlata mɔɔ bɛfa bɛdi daselɛ la anwo neazo wɔ mukelɛ 73. Bie a ɔbamaa wɔanwu kɛlata ɛhɛlɛ nye zo, noko ɔwɔ kɛ ɛkakyihakyi edwɛkɛ mɔɔ wɔ nu la bie mɔ. Saa wɔanyɛ ye zɔ a, bie a menli asa baha kɛlata ko ne ala fane dɔɔnwo.
Wɔ menli dɔɔnwo afoa nu, saa awie mɔɔ bɛnze ye la kɛlɛ bɛ kɛlata tendenle a, ye ɛgengalɛ ɛnla bɛ aze. Yemɔti nrɛlɛbɛ wɔ nu kɛ ɛbamaa wɔ kɛlata ne ayɛ ezinra. Saa ɛkɛlɛ wɔ kɛlata ne tendenle a, ɔbayɛ ahenle mɔɔ wɔhɛlɛ wɔhɔmaa ye la ɛvɛlɛ kɛ ɔbagenga. Ɔbayɛ kpalɛ kɛ ɛbava mekɛ mɔɔ yɛfa yɛkɔ debiezukoalɛ wɔ Belemgbunlililɛ Asalo la anwo ngyehyɛleɛ mɔɔ bɛyɛ la bie wɔaboka nwo. Ɛbahola wɔava trate, buluku ekyi, anzɛɛ Ɛzinzalɛ Arane anzɛɛ Awake! ne bie wɔawula nu na wɔahilehile nuhua kɛ saa ɔkulo a ɔbahola yeanyia bie dahuu. Anzɛɛ ɛbahola wɔabiza ye saa ɛbahola wɔara ye sua nu ɛ nee ye azuzu edwɛkɛ mɔɔ wɔha la anwo bɛahɔ moa a.
Kɛzi Ɛbahɛlɛ Ye La
Akee nea nwolɛ neazo ne. Yɛ ɛhye mɔ nzonlɛ: (1) Nwolɛ te yɛɛ ɔtɛnyenyanle. (2) Saa ɛnvulopu ne minli bɔbɔ a, ahenle mɔɔ bɛhɛlɛle bɛhɔmanle ye la bahola anwu ahenle mɔɔ ɔhɛlɛle kɛlata ne la duma nee ye address. (3) Bɛha kɛlata ne bodane ne sikalɛ wɔ ɛdendɛkpunli ne mɔɔ lumua la anu. (4) Bɛha edwɛkɛ titile biala anwo edwɛkɛ wɔ ɛdendɛkpunli gyɛne nu. (5) Kɛlata ne bodane ne ati, nuhua edwɛkɛ ɛmba aze somaa yɛɛ nuhua noko ɛnyɛ se somaa.
Wɔ kɛlata mɔɔ bɛkɛlɛ bɛkɔ gyima bie anu mɔɔ le kɛ mɔɔ bie a kɛlɛhɛlɛvolɛ kɛlɛ kɔ Bɛtɛle la, ɔbava asafo ne duma nee ye duma, ye address nee kenle mɔɔ ɔhɛlɛle kɛlata ne la yeaboka nwo. Ahenle anzɛɛ ahyehyɛdeɛ ne mɔɔ ɔfa yeahɔmaa ye la duma noko bara zolɛ. Mɔɔ ɔbadoa zo la a le ahyebizalɛ mɔɔ fɛta la. Wɔ aneɛ bie mɔ anu, bɛkɛlɛ kɛlata ne bɛwie a, bɛkɛlɛ “Wɔ kulovolɛ kpalɛ” anzɛɛ “Ɛ diema kulovolɛ” bɛgua bɛ sa mɔɔ bɛva bɛwula ɔ bo la ati zo. Ɛfa ɛ sa wɔawula kɛlata bo a, ɔwɔ kɛ ɛfa pɛne.
Wɔ kɛlata biala anu, nea kɛ ɛbava wɔ adwenle wɔazie edwɛkɛ agbɔkɛ kpalɛ ɛhɛlɛlɛ, aneɛmɛla, ɛhɛlɛlɛ sɛkɛlɛneɛ nee kɛzi ɛbayɛ ye bɔkɔbɔkɔ la azo. Ɛyɛ zɔ a, ɔbamaa bɛ nye alie wɔ kɛlata ne nee edwɛkɛ mɔɔ wɔ nuhua la anwo.
Dahuu kɛlɛ wɔ address ɛdeɛ ne wɔ ɛnvulopu ne anzi. Saa ɛsuzu kɛ ɔnrɛyɛ kpalɛ kɛ ɛbava wɔ address ɛdeɛ wɔali menli mɔɔ ɛnze bɛ la daselɛ a, biza asafo nu mgbanyima saa ɛbahola wɔava Belemgbunlililɛ Asalo address ne wɔali gyima a. Mmafa Bɛtɛle address ne ɛdi gyima ɛlɛ wɔ adenle ɛhye azo, ɔluakɛ ɛhye bahile kɛ wɔ kɛlata ne vi Bɛtɛle na ɛhye bava ngyegyelɛ ara. Saa wɔanva wɔ address wɔamboka nwo na ɛfa mbuluku ɛwula nu a, ɛhye noko bahola ahile kɛ Bɛtɛle a hɛlɛle a.
Nea kɛ ɛbadua nwolɛ kakɛ ne, titile saa ɛfa mbuluku ɛwula nu a. Saa wɔandua nwolɛ kakɛ ne amuala a, ahenle mɔɔ asa baha kɛlata ne la badua kakɛ mɔɔ ɛha la na ɛhye ɛnrɛmaa ɔ nye ɛnrɛlie wɔ edwɛkɛ ne anwo. Kakye kɛ wɔ maanle bie mɔ anu, saa ɛfa buluku anzɛɛ magazine ɛboka nwo a, ɛbadua kakɛ dɔɔnwo.
Kpa Edwɛkɛ Mɔɔ Yɛ Fɛ
Saa ɛwie wɔ kɛlata ne kɛlɛ a, kenga nwu nuhua edwɛkɛ ne. Kɛzi nuhua edwɛkɛ ne de ɛ? Asoo ɔyɛ anyelielɛ na ɔda agɔnwolɛvalɛ ali? Ɛlɔlɛ nee atiakunlukɛnlɛma boka subane mɔɔ yɛbɔ mɔdenle kɛ yɛbala ye ali wɔ kɛzi yɛ nee awie mɔ di la anu. (Gal. 5:22, 23) Saa ɛnwu edwɛkɛ bie mɔɔ ɛnyɛ fɛ anzɛɛ ɔbamaa ahenle anyia adwenle kɛ debie ɛtane bie bazi la a, kakyi edwɛkɛ ne.
Kɛlata bahola ahɔ ɛleka mɔɔ ɛngola ɛngɔ la. Nɔhalɛ edwɛkɛ ɛhye maa kɛlata ɛhɛlɛlɛ yɛ debie mɔɔ hyia wɔ daselɛlilɛ nu. Kɛmɔ wɔ kɛlata ne gyi ɛkɛ maa wɔ nee kɛzi ɛde la ati, dwenle edwɛkɛ mɔɔ wɔhɛlɛ, kɛzi ɔde, nee kɛzi ahenle bade ɔ bo la anwo. Bie a yemɔ ala a ɛbahyia nwo na wɔamaa awie anwosesebɛ wɔamaa yeabɔ ɔ bo yeava ngoane adenle ne azo a.