Asafo Ne Anu Ɛdendɛlɛ Ngakyile Mɔɔ Ɛbaziezie

BƐZIEZIE Teokelase Ɛzonlenlɛ Sukulu ngyehyɛleɛ ne amaa yeaboa asafo ne amuala. Eza yɛnyia edwɛkɛ mɔɔ ɔboa la wɔ asafo ayia gyɛne nee maangyebakyi nee maanzinli nyianu bo. Saa bɛmaa wɔ gyima wɔ gyimalilɛ ɛhye mɔ bie abo a, ɛnee bɛmaa wɔ ɛzonlelilɛ kpole. Ɛzoanvolɛ Pɔɔlo zile Keleseɛnenli neavolɛ Temɔte adua kɛ ɔnlea ye ngilehilelɛ ne boɛ. (1 Tem. 4:16) Menli mɔɔ ɛra Keleseɛne ayia ngakyile ne abo la ɛva bɛ mekɛ mɔɔ sonle bolɛ la a ɛra a, na bie mɔ noko bɔle mɔdenle kpalɛ na bɛahola bɛara bɛaradie adehilelɛ mɔɔ fane bɛ nee Nyamenle agɔnwolɛvalɛ nwo la. Adehilelɛ zɛhae mɔɔ ɛfa wɔamaa la le nwolɛ adenle kpole kpalɛ! Kɛ ɔkɛyɛ na wɔali nwolɛ gyima kpalɛ ɛ?

Baebolo Ɛgengalɛ Nu Edwɛkɛtitile

Sukulu gyimalilɛ ɛhye gyi Baebolo ɛgengalɛ mɔɔ bɛhyehyɛ bɛmaa dapɛne ne la azo. Ɔwɔ kɛ ɛsi kɛzi edwɛkɛ ne fane yɛ nwo ɛnɛ la azo. Kɛmɔ bɛha ye wɔ Nihɛmaya 8:8 la, ɛsɔfo Ɛzela nee Livaema ne gengale Nyamenle Edwɛkɛ ne wɔ bagua nu, “bɛhilehilele nuhua wienyi” amaa bɛade ɔ bo kpalɛ. Baebolo ɛgengalɛ nu edwɛkɛtitile ne mɔɔ ɛdi nwolɛ gyima la bamaa wɔanyia adenle wɔayɛ zɔhane ala.

Kɛzi ɔwɔ kɛ ɛsiezie gyimalilɛ zɛhae ɛ? Saa ɔbayɛ boɛ a, kenga Baebolo foa ne mɔɔ ɛbali nwolɛ gyima la dapɛne ko anzɛɛ mɔɔ bo zɔ kolaa na mekɛ ne adwu. Akee dwenle wɔ asafo ne nee ye ngyianlɛ nwo. Yɛ nwolɛ nzɛlɛlɛ. Folɛdulɛ, neazo nee ngyinlazo boni mɔ a wɔ Nyamenle Edwɛkɛ foa ɛhye anu mɔɔ bali ngyianlɛ ɛhye mɔ anwo gyima a?

Neɛnleanuyɛlɛ hyia. Watchtower Library Mɔɔ Wɔ CD-ROM Zo anzɛɛ Watch Tower Publications Index ne bie wɔ aneɛ mɔɔ ɛte la anu ɔ? Saa zɔhane a, fa di gyima kpalɛ. Saa ɛyɛ ngyehyɛnu mɔɔ ɛbava wɔali gyima la anwo neɛnleanu a, ɛbanyia nwolɛ edwɛkɛ mɔɔ yɛ anyelielɛ, ngapezo mɔɔ ɛpe zo la anwo ngilehilenu, mɔɔ ngɛlɛlera bie mɔ ka wɔ Gyihova anwo anzɛɛ ngyinlazo bie mɔ mɔɔ bɛhilehile nu la. Mmabɔ mɔdenle kɛ ɛka edwɛkɛ dɔɔnwo. Fa wɔ adwenle sie ngyehyɛnu ekyi mɔɔ wɔkpa la azo. Ɔle kpalɛ kɛ ɛbakpa ngyehyɛnu ekyi na wɔahilehile nu kpalɛ.

Bie a eza ɔbahyia kɛ ɛto ɛsalɛ ɛfɛlɛ tievolɛma ɛmaa bɛka kɛzi dapɛne ne anu Baebolo ɛgengalɛ ne ɛboa bɛ la anwo edwɛkɛ. Duzu a bɛnwunle ye mɔɔ ɔbaboa bɛ wɔ bɛ ti anwo nee abusua debiezukoalɛ, bɛ ɛzonlenlɛ gyima anzɛɛ bɛ ɛbɛlabɔlɛ nu a? Gyihova subane boni mɔ a bɛla bɛ ali wɔ kɛzi ɔ nee menli nee maanle maanle lile la anu ɛ? Duzu a tievolɛma zukoale mɔɔ yemaa bɛ diedi nu ɛmia na bɛnyia anyezɔlɛ bɛmaa Gyihova ɛ? Mmafa wɔ adwenle ɛzie edwɛkɛ dɔɔnwo mɔɔ bɛ bo ɛdelɛ yɛ se la azo. Si ndelebɛbo nee nvasoɛ mɔɔ wɔ edwɛkɛ ne anu la azo.

Ɛdendɛlɛ Ngakyile Mɔɔ Ɔgyi Yɛ Mbuluku Ne Mɔ Azo

Ɛhye mɔ gyi mbuluku le kɛ Ɛzinzalɛ Arane anzɛɛ Awake! anzɛɛ bie a buluku bie foa bie azo. Fane dɔɔnwo ne ala edwɛkɛ mɔɔ ɛbanyia la zonle tɛla mekɛ mɔɔ bɛva bɛmaa wɔ la. Kɛzi ɔwɔ kɛ ɛyɛ gyimalilɛ ne ɛ? Yɛ ye kɛ kilehilevolɛ, mmaka edwɛkɛ ne ala ɛgua ye ɛkɛ. Ɔwɔ kɛ neavolɛ ‘kola kilehile.’​—1 Tem. 3:2.

Dumua sukoa edwɛkɛ ne mɔɔ bɛva bɛmaa wɔ la fa bɔ wɔ anwoziezielɛ ne abo. Kenga ngɛlɛlera mɔɔ wɔ nu la. Dwenledwenle nwo. Bɔ mɔdenle kɛ ɛbayɛ ɛhye kolaa na mekɛ mɔɔ ɛbamaa wɔ ɛdendɛlɛ ne la adwu. Kakye kɛ bɛmaa mediema ne mɔ anwosesebɛ kɛ bɛlumua bɛgenga edwɛkɛ ne mɔɔ ɛdendɛlɛ ne gyi zo la kolaa na bɛara. Tɛ edwɛkɛ ne a ɛti nu anzɛɛ ɛpɛ ye sikalɛ wɔ wɔ gyimalilɛ ne anu a, emomu ɔwɔ kɛ ɛmaa bɛnwu kɛzi bɛbava bɛali gyima la. Fa edwɛkɛ ne foa mɔɔ fɛta la di gyima wɔ adenle mɔɔ ɔbaboa asafo ne kpalɛ la azo.

Kɛmɔ asolo kakula biala subane la, zɔhane ala a asolo asafo biala ngyianlɛ a. Wovolɛ mɔɔ kilehile kpalɛ la ɛnga ɛbɛla kpalɛ ɛbɔlɛ ngyinlazo nwo edwɛkɛ ɛngile ɔ ra ala. Ɔ nee kakula ne suzu nwo. Ɔdwenle kakula ne subane nee ye ngyegyelɛ nwo. Zɔhane ala a asafo ne anu kilehilevolɛma bɔ mɔdenle kɛ bɛbanwu ekpunli ne mɔɔ bɛlɛtendɛ bɛahile bɛ la ngyianlɛ na bɛali nwolɛ gyima a. Noko akee, kilehilevolɛ mɔɔ lɛ nwunu la koati kɛ ɔbava neazo mɔɔ bamaa tievolɛ bie anyunlu agua aze la yeali gyima. Ɔbaha nvasoɛ mɔɔ bɛnyia ye dɛba ɔlua Gyihova adenle mɔɔ bɛluale zo la, na yeazi Ngɛlɛlera ne anu folɛdulɛ mɔɔ ɔbaboa asafo ne yeamaa bɛali bɛ ngyegyelɛ nwo gyima kpalɛ la azo.

Ngilehilelɛ kpalɛ ka tievolɛma ahonle. Ɛhye kile kɛ ɔnle kɛ ɛka nɔhalɛ edwɛkɛ mɔɔ wɔ mɔɔ ɛlɛka la anu ala, na eza ɔwɔ kɛ ɛmaa bɛnyia mɔɔ ɛlɛka la anwo anyezɔlɛ. Ɔwɔ kɛ ɛdwenle menli mɔɔ ɛkilehile bɛ la anwo kpalɛ. Ɔwɔ kɛ sunsum nu mboaneneavolɛma nwu mboane ne. Saa bɛfi ɛlɔlɛ nu bɛmaa ngyegyelɛ mɔɔ bɛ nuhua ko biala ɛlɛyia la tɛnla bɛ adwenle nu a, bɛbahola bɛaha edwɛkɛ mɔɔ ɔmaa anwosesebɛ, bɛade bɛ edwɛkɛ bo na bɛaze bɛ anwunvɔne.

Kɛmɔ kilehilevolɛma kpalɛ ze ye la, ɔwɔ kɛ ɛdendɛlɛ gyinla bodane kpalɛ zo. Ɔwɔ kɛ ɛka edwɛkɛ ne wɔ adenle mɔɔ ɔbamaa edwɛkɛ titile ne mɔ ala ali na bɛahakye la azo. Ɔwɔ kɛ tievolɛma kola nyia edwɛkɛ bie mɔɔ ɔbaboa bɛ wɔ bɛ ɛbɛlabɔlɛ nu la kɔ sua nu.

Ɛzonlenlɛ Nyianu

Saa edwɛkɛ bie mɔɔ wɔ Yɛ Belemgbunlililɛ Gyima ne anu la azo a ɛlɛgyinla wɔamaa ɛdendɛlɛ ne a, yemɔ ɔbayɛ ngakyile ekyi. Wɔ ɛhye anu, ɔhyia kɛ ɛka edwɛkɛ ne mɔɔ bɛhɛlɛ la amuala, ɔnle kɛ ɛkpa mɔɔ ɔbaboa bɛ kpalɛ la ala. Boa tievolɛma maa bɛzuzu ngɛlɛlera mɔɔ bɛgyinlanle zo bɛdule bɛ folɛ la anwo. (Tae. 1:9) Fane dɔɔnwo ne ala, mekɛ ne anzo mɔɔ ɔwɔ kɛ ɛfa edwɛkɛ gyɛne ɛboka nwo a.

Wɔ adenle fofolɛ zo, bie a bɛbamaa wɔ gyimalilɛ mɔɔ nwolɛ edwɛkɛ ɛnle Yɛ Belemgbunlililɛ Gyima ne anu. Bie a bɛbahwe adwenle bɛahɔ Ɛzinzalɛ Arane nu edwɛkɛ bie azo anzɛɛ bɛbahɛlɛ gyimalilɛ ne anwo edwɛkɛ ekyi bɛaboka nwo. Ɛdawɔ mɔɔ ɛle kilehilevolɛ la a ɔwɔ kɛ ɛsuzu asafo ne ngyianlɛ nwo na ɛgyinla edwɛkɛ mɔɔ bɛva bɛmaa wɔ la azo ɛboa bɛ a. Bie a ɔbahyia kɛ ɛfa ndonwo anzɛɛ anwubielɛ sikalɛ mɔɔ fɛta la ɛdi gyima. Kakye kɛ wɔ gyimalilɛ ne ɛngile kɛ ɛka nwolɛ edwɛkɛ ala, emomu ɔwɔ kɛ ɛdi nwolɛ gyima wɔ adenle mɔɔ ɔbaboa asafo ne yeamaa bɛayɛ gyima mɔɔ Nyamenle Edwɛkɛ ne ka kɛ bɛyɛ la na bɛ nye alie kɛ bɛyɛ ye zɔ la.​—Gyi. 20:20, 21.

Mekɛ mɔɔ ɛlɛsiezie wɔ gyimalilɛ ne la, dwenle tɛnlabelɛ mɔɔ asafo ne anu amra wɔ nu la anwo. Kanvo bɛ wɔ mɔɔ bɛlɛyɛ la anwo. Saa bɛfa nzuzulɛ mɔɔ wɔ edwɛkɛ ne mɔɔ bɛva bɛmaa wɔ anu la bɛdi gyima a, kɛzi ɔbamaa bɛ ɛzonlenlɛ gyima ne azo ma na bɛanyia anyelielɛ kpole ɛ?

Asoo yɛkile anzɛɛ edwɛkɛbizebizalɛ boka wɔ gyimalilɛ ne anwo? Saa zɔhane a ɔde a, ɔwɔ kɛ ɛdumua ɛyɛ nwolɛ ngyehyɛleɛ kpalɛ. Bie a ɛ nye balie nwo kɛ ɛbamaa awie gyɛne ayɛ nwolɛ ngyehyɛleɛ, noko ɛhye ɛnda ɛmboa kpalɛ. Bɛbɔ mɔdenle bɛyɛ yɛkile anzɛɛ edwɛkɛbizebizalɛ ne bɛnlea kolaa na aleɛ kye a bɛahɔ debiezukoalɛ. Nea nwu ye kɛ bɛli wɔ gyimalilɛ ne foa ɛhye anwo gyima wɔ adenle mɔɔ ɔ nee nwolɛ adehilelɛ ne yia la azo.

Maangyebakyi Nee Maanzinli Nyianu

Ɔdwu mekɛ ne bie a bɛbamaa mediema mrenya mɔɔ bɛda sunsum nu subane ngɛnlɛma ali na bɛle bagua nu tendɛvolɛma nee kilehilevolɛma kpalɛ la gyimalilɛ wɔ maangyebakyi anzɛɛ maanzinli nyianu bo. Ɛhye mɔ le mekɛ titile maa teokelase ndetelɛ amgba. Gyimalilɛ ɛhye kola yɛ ɛdendɛlɛ mɔɔ bɛhɛlɛ nuhua edwɛkɛ ne amuala, ɛdendɛlɛ kɛlata, adehilelɛ mɔɔ bɛnea zo bɛyɛ Baebolo nu drama mɔɔ yɛbahola yɛava yɛali gyima ɛnɛ, anzɛɛ adehilelɛ bie ala. Saa ɛnyia adenle kɛ ɛyɛ gyimalilɛ zɛhae bie a, sukoa edwɛkɛ ne mɔɔ bɛva bɛmaa wɔ la kpalɛ. Sukoa kɔkpula kɛ ɛbade ɔ bo kpalɛ.

Ɔwɔ kɛ menli mɔɔ bɛmaa bɛ ɛdendɛlɛ mɔɔ bɛhɛlɛ nuhua edwɛkɛ ne amuala la kenga ye pɛpɛɛpɛ. Bɛngakyihakyi edwɛkɛ agbɔkɛ anzɛɛ edwɛkɛ mumua ne. Bɛsukoa bɛnwu edwɛkɛ titile mɔɔ wɔ nu ɔ nee kɛzi bɛhilehile nu la. Bɛkenga bɛmaa ɔfinde bɛ nloa fane dɔɔnwo kɔkpula kɛ bɛkola bɛmaa ɛdendɛlɛ ne na bɛsi adwenle mɔɔ wɔ nu la azo, bɛfa anyelielɛ, wuluwuluyɛlɛ, nganeɛdelɛ, anyebolo, anwodozo, nee ɛnelɛ mɔɔ fɛta menli ekpunli kpole bɛtendɛ la.

Ɔwɔ kɛ mediema mɔɔ bava ɛdendɛlɛ kɛlata a amaa bɛ ɛdendɛlɛ ne la siezie bɛ edwɛkɛ ne bɛmaa ɔ nee mɔɔ wɔ ɛdendɛlɛ kɛlata ne azo la yɛ ko. Kɛ anrɛɛ tendɛvolɛ ne bagenga mɔɔ wɔ ɛdendɛlɛ kɛlata ne azo wɔ mekɛ mɔɔ ɔlɛmaa ɛdendɛlɛ ne anzɛɛ ɔbahɛlɛ nuhua edwɛkɛ ne la, ɔwɔ kɛ ɔfi ahonle nu ɔtendɛ mɔɔ ɔngenga a. Ɔhyia kɛ ɔdi mekɛ mɔɔ bɛhile la azo amaa yeahola yeahilehile edwɛkɛ titile biala mɔɔ wɔ nu la anu wienyi. Ɔwɔ kɛ tendɛvolɛ ne fa nzuzulɛ nee ngɛlɛlera ne mɔ mɔɔ wɔ edwɛkɛ titile ne mɔ abo la di gyima. Ɔnle kɛ ɔfa edwɛkɛ bie mɔ mɔɔ ɔ nye die nwolɛ la ɔwula nu na ɔgyakyi mɔɔ wɔ ɛdendɛlɛ kɛlata ne azo la. Nɔhalɛ nu, adehilelɛ ne adiabo a le Nyamenle Edwɛkɛ ne. Asafo nu mgbanyima ɛzonlelilɛ a le kɛ ‘bɛbɔ edwɛkɛ ne nolo.’ (2 Tem. 4:1, 2) Yemɔti ɔwɔ kɛ tendɛvolɛ ne fa ye adwenle sie ngɛlɛlera ne mɔ mɔɔ wɔ ɛdendɛlɛ kɛlata ne azo la azo titile​—ɔdwenle nwo na ɔkile kɛzi bɛbava bɛali gyima la.

Mmatu Ɛsie

Ɛsonle wɔ asafo mɔɔ bamaa wɔanyia adenle dɔɔnwo wɔadendɛ la anu ɔ? Kɛzi ɛbahola wɔali ɛhye mɔ amuala anwo gyima kpalɛ ɛ? Koati kɛ ɛbamaa mekɛ ne asɛɛ adwu kolaa na wɔaziezie wɔ gyimalilɛ ne.

Saa ɛdendɛlɛ ne baboa asafo ne a, ɔwɔ kɛ ɛdumua ɛdwenledwenle nwolɛ kpalɛ. Ɛhye ati, maa ɔyɛ wɔ subane kɛ ɛ sa ka wɔ gyimalilɛ ne ala a, ɛbagenga nuhua. Ɛhye baboa wɔ yeamaa wɔadwenledwenle nwolɛ wɔ mekɛ mɔɔ ɛlɛyɛ ninyɛne gyɛne la. Wɔ mekɛ ekyii mɔɔ lumua kolaa na wɔamaa wɔ ɛdendɛlɛ ne la anu, bie a ɛbade edwɛkɛ mɔɔ ɔbamaa wɔanwu kɛzi ɛbava edwɛkɛ ne wɔali gyima kpalɛ la. Bie a ɛbayia tɛnlabelɛ bie mɔɔ ɔle ye mekɛ nu ɛdeɛ. Gyimalilɛ ne mɔɔ bɛfa bɛmaa wɔ ala a ɛbagenga nuhua na wɔadwenledwenle nwolɛ la die mekɛ, noko ɛyɛ ye zɔ a ɔbaboa. Awieleɛ bɔkɔɔ ne mɔɔ ɛbadɛnla aze kɛ ɛsiezie wɔ ɛdendɛlɛ ne la, ɛbanyia nvasoɛ kɛ ɛlumuale ɛdwenledwenlenle nwolɛ la. Saa ɛdi gyimalilɛ ne anwo gyima wɔ adenle ɛhye azo a, ɔbade wɔ ɛvɛlɛ zo na yeaboa wɔ yeamaa wɔayɛ ye wɔ adenle mɔɔ ɔbaboa la azo na yeaha asafo ne anu amra ahonle.

Saa ɛkile ahyɛlɛdeɛ mɔɔ Gyihova ɛva ɛmaa wɔ ɔlua ngyehyɛleɛ mɔɔ yeyɛ ɔlɛfa yeatete ye azonvolɛ la azo anwo anyezɔlɛ a, ɛbawula ye anyunlunyia na wɔayɛ nyilalɛ wɔamaa bɛdabɛ mɔɔ bɛkulo ye la.​—Aye. 54:13; Wulo. 12:6-8.