Ɛtanefakyɛ kola nua akɛsakɛsa mɔɔ ɛlɛsɔ kɛ senle la
AGYALƐMA
4 ƐTANEFAKYƐ
MƆƆ ƆKILE LA
Ɛtanefakyɛ kile kɛ ɛgyakyi edwɛkɛ nu na wɔaye ɛya biala wɔavi wɔ nu. Ɔngile kɛ ɛbabu ɛtane mɔɔ awie yɛle tiale wɔ la kɛ ɔle debie ekyi bie ala anzɛɛ ɛbayɛ ɛ nwo kɛ ɛhwee anzi.
BAEBOLO NGYINLAZO: “Saa bɛ nuhua bie lɛ edwɛkɛ tia ɔ gɔnwo bɔbɔ a, bɛhɔ zo bɛnyia abotane bɛmaa bɛ nwo na bɛva bɛhyɛ bɛ nwo bɔkɔɔ.”—Kɔlɔsaema 3:13.
“Saa ɛkulo awie a, ɛnva wɔ adwenle ɛnzie ye sinlidɔlɛ ne mɔ azo, emomu subane kpalɛ mɔɔ ahenle ɛlɛbɔ mɔdenle kɛ ɔbanyia la a ɛnwu ye a.”—Aaron.
DEƐMƆTI ƆHYIA LA
Saa ɛfa ɛya ɛsie wɔ nu a, ɛbaboda ɛ nwo—ɔbaha wɔ kpɔkɛdelɛ na yeamaa wɔali nyane—eza ɔbahola yeazɛkye wɔ agyalɛ ne.
“Kenle ko bie me hu kpale me kyɛlɛ wɔ debie bie mɔɔ ɔyɛle mɔɔ yɛle me nyane kpole la anwo. Ɛnee ɔyɛ se kɛ mebava meahyɛ ye. Nzinlii, menvale mengyɛle ye noko menunle me nwo kɛ meanva meangyɛ ye ndɛndɛ la. Ɔvale ngyegyelɛ ɔrale yɛ agyalɛ ne anu.”—Julia.
MƆƆ ƐBAHOLA WƆAYƐ LA
NEƐNLEA WƆ NU
Kenle fofolɛ mɔɔ ɛ hu anzɛɛ ɛ ye edwɛkɛ anzɛɛ ye nyɛleɛ bie bagyegye wɔ la, biza ɛ nwo kɛ:
‘Asoo memaa ninyɛne gyegye me somaa ɔ?’
‘Asoo ɛtane ne le kpole somaa mɔɔ ɔti ɔwɔ kɛ ɔkpa me kyɛlɛ ɔ, anzɛɛ mebahola meabu me nye meagua zo?’
BƐ MU NWIƆ BƐZUZU ƐHYE ANWO
Asoo ɔkyɛ na yɛava ɛtane mɔɔ yɛyɛ yɛtia yɛ nwo la yɛahyɛ ɔ?
Duzu a yɛbahola yɛayɛ amaa yɛava ɛtane yɛahyɛ yɛ nwo ndɛndɛ a?
NZUZULƐ BIE MƆ ƐNE
Saa ɛ hu anzɛɛ ɛ ye yɛ debie maa ɔgyegye wɔ a, mmabu ye kɛ ɔ nye fuu.
Bɔ mɔdenle kɛ ɛbava ye ɛtane wɔahyɛ ye na kakye kɛ “yɛ muala yɛfo fane dɔɔnwo.”—Gyemise 3:2.
“Saa nvonleɛ ne vi yɛ mu nwiɔ a, ɔnyɛ se kɛ yɛbava yɛahyɛ yɛ nwo, noko saa ɔzɔho kɛ nvonleɛ ne vi sonla ko a, yemɔ ɔyɛ se kpalɛ. Ɔhyia mɛlɛbɛnwoaze kpalɛ amaa wɔalie kyɛlɛkpalɛ wɔado nu na wɔava ɛtane wɔahyɛ.”—Kimberly.
BAEBOLO NGYINLAZO: “Ɛ nee ye ɛziezie edwɛkɛ ne ndɛndɛ.”—Mateyu 5:25.
Saa ɛfa ɛya ɛsie wɔ nu a, ɛbaboda ɛ nwo—ɔbaha wɔ kpɔkɛdelɛ na yeamaa wɔali nyane—eza ɔbahola yeazɛkye wɔ agyalɛ ne