Ɛdendɛlɛ mɔɔ ɛbulɛ wɔ nu la le kɛ mɔta mɔɔ kola sosɔ wɔ agyalɛ ne maa ɔgyinla la
AGYALƐMA
3 ƐBULƐ
MƆƆ ƆKILE LA
Saa agyalɛma lɛ ɛbulɛ maa bɛ nwo a, bɛ nuhua ko biala dwenle ɔ gɔnwo anwo saa bɔbɔ bɛ adwenle ɛnyia wɔ debie bie anwo a. Ten Lessons to Transform Your Marriage buluku ne ka kɛ: “Bɛ nuhua biala ɛnzɔ ye edwɛkɛ ɛdeɛ ne anu kyengye. Emomu, bɛbɔ mɔdenle kɛ bɛbaziezie akɛsakɛsa mɔɔ bara la. Bɛfi ɛbulɛ nu bɛtie bɛ gɔnwo nzuzulɛ na bɛfa edwɛkɛ ne bɛto ɛleka mɔɔ ɔbaboa bɛ mu nwiɔ la.”
BAEBOLO NGYINLAZO: ‘Ɛlɔlɛ ɛnle angomedi.’—1 Kɔlentema 13:4, 5.
“Saa mebu me ye a, ɔkile kɛ menwu ye kɛ ɔsonle bolɛ na mengulo kɛ meyɛ debie biala mɔɔ ɔbagyegye ye anzɛɛ ɔbazɛkye yɛ agyalɛ ne la.”—Micah.
DEƐMƆTI ƆHYIA LA
Saa agyalɛma ɛnlɛ ɛbulɛ ɛmmaa bɛ nwo a, bɛlɛbɔ adawu biala a tendɛtia, agolobɛnwo yɛɛ edwɛkɛ mɔɔ ɛngile ɛlɔlɛ la a finde nu a. Menli mɔɔ yɛ neɛnleanu la ka kɛ subane ɛhye mɔ le sɛkɛlɛneɛ mɔɔ kile kɛ bɛbahola bɛabɔ ewole a.
“Saa ɛka edwɛkɛ mɔɔ wowɔ la ɛkile ɛ ye, ɛbɔ ye aholoba anzɛɛ ɛgolo ɔ nwo a, ɔbamaa yeade nganeɛ kɛ nvasoɛ ɛnle ɔ nwo zo, ɔnrɛlie wɔ ɔnrɛli na ɔbazɛkye bɛ agyalɛ ne.”—Brian.
MƆƆ ƐBAHOLA WƆAYƐ LA
NEƐNLEA WƆ NU
Nea wɔ edwɛkɛhanlɛ nee wɔ nyɛleɛ wɔ dapɛne ko anu. Akee biza ɛ nwo kɛ:
‘Fane nyɛ a mendendɛle mentiale me ye a, yɛɛ fane nyɛ a menganvole ye a?’
‘Ndenle fɔɔnwo boni mɔ azo a menlale ɛbulɛ ali mengilele me hu anzɛɛ me ye a?’
BƐ MU NWIƆ BƐZUZU ƐHYE ANWO
Nyɛleɛ anzɛɛ edwɛkɛ boni a ɔbamaa bɛ nuhua biala ade nganeɛ kɛ ɔ gɔnwo bu ye a?
Nyɛleɛ anzɛɛ edwɛkɛ boni a ɔbamaa bɛ nuhua biala ade nganeɛ kɛ ɔ gɔnwo ɛmbu ye a?
NZUZULƐ BIE MƆ ƐNE
Kɛlɛ ninyɛne nsa mɔɔ ɛkulo kɛ ɛ hu anzɛɛ ɛ ye yɛ fa kile kɛ ɔbu wɔ la. Awie biala ɛhɛlɛ ye ɛdeɛ. Biala ɛva ye ɛdeɛ ne ɛmaa ɔ gɔnwo. Akee biala ɛbɔ mɔdenle kɛ ɔbayɛ mɔɔ ɔ gɔnwo ɛhɛlɛ la yeava yeala ɛbulɛ ali.
Kɛlɛ subane mɔɔ ɛ hu anzɛɛ ɛ ye lɛ mɔɔ ɛ nye die nwolɛ la. Akee ka kɛzi ɛ nye die ye subane zɔhane mɔ anwo la kile ye.
“Saa mebu me hu a, mebava me nyɛleɛ meahile kɛ ɔsonle bolɛ ɔmaa me na mekulo kɛ ɔ nye die. Tɛ mekɛ ne amuala a meyɛ debie kpole bie a; ninyɛne ngyikyi ngyikyi mɔɔ meta meyɛ nee edwɛkɛ bie mɔ mɔɔ meka la maa ɔnwu kɛ mebu ye.”—Megan.
Tɛ edwɛkɛ ne a le kɛ ɛbanwu ɛ nwo kɛ ɛbu debie anzɛɛ ɛmbu debie; ɔwɔ kɛ ɛ hu anzɛɛ ɛ ye mumua ne nwu ye kɛ ɛbu ye.
BAEBOLO NGYINLAZO: “Bɛwula ahunluyelɛyelalɛ, atiakunlukɛnlɛma, mɛlɛbɛnwoaze, bɛtɛɛyɛlɛ nee abotane.”—Kɔlɔsaema 3:12.