Lɛvitikɔso

9 Kenle mɔtwɛ ne azo,+ Mosisi vɛlɛle Aalɔn nee ɔ mra mrenyia ne mɔ yɛɛ Yizilayɛ mgbanyima. 2 Ɔzele Aalɔn kɛ: “Fa ɛnlankɛ ralɛ ko nee boane nyinli ko mɔɔ bɛte kpɔkɛ la bɛla Gyihova anyunlu; ɛbava ɛnlankɛ ralɛ ne wɔabɔ ɛtane afɔle+ na wɔava boane nyinli ne wɔabɔ ɛyelalɛ afɔle. 3 Na ka kile Yizilayɛma kɛ, ‘Bɛva abɔnkye nyinli bɛrabɔ ɛtane afɔle na bɛva ɛnlankɛ ralɛ nee boaneralɛ mɔɔ biala ɛli ɛvolɛ ko na bɛte kpɔkɛ la bɛrabɔ ɛyelalɛ afɔle, 4 na bɛva ɛnlankɛ nyinli nee boane nyinli bɛrabɔ anzodwolɛ afɔle+ wɔ Gyihova anyunlu. Eza bɛva ma afɔlebɔdeɛ+ mɔɔ bɛva nwole bɛfɔtɔ la bɛbɔ afɔle, ɔluakɛ ɛnɛ Gyihova baye ɔ nwo ahile bɛ.’”+

5 Ɔti bɛvale ninyɛne mɔɔ Mosisi hanle hilele bɛ la bɛrale nyianu ɛdanlɛsua ne anyunlu. Akee menli ne amuala ragyinlanle Gyihova anyunlu. 6 Na Mosisi hanle kɛ: “Mɔɔ Gyihova ɛha kɛ bɛyɛ amaa Gyihova ala ye anyunlunyia ne ali ahile bɛ+ la ɛne.” 7 Akee Mosisi zele Aalɔn kɛ: “Fa wɔ ɛtane afɔlebɔdeɛ+ ne nee wɔ ɛyelalɛ afɔlebɔdeɛ ne kɔ afɔlemokyea ne anwo na bɔ mgbɔdalɛ afɔle maa ɛ nwo+ nee wɔ abusua ne, na fa menli ne afɔlebɔdeɛ ne+ bɔ mgbɔdalɛ afɔle maa bɛ+ kɛ mɔɔ Gyihova ɛha la.”

8 Aalɔn hɔle afɔlemokyea ne anwo ndɛndɛ na ɔhunle ɛnlankɛ ralɛ ne mɔɔ ɔfa yeabɔ ye ɛtane afɔle ne la.+ 9 Aalɔn amra ne mɔ vale mogya ne+ maanle ye, na ɔvale ɔ sa ɛrɛlɛsɛka ɔbɔle mogya ne anu na ɔvale ɔhehanle afɔlemokyea ne mɛne ne mɔ anwo na ɔwolale mogya ne mɔɔ hale la ɔguale afɔlemokyea ne abo.+ 10 Ɔyelale ɛtane afɔlebɔdeɛ ɛnlome ne nee kilenzia ne yɛɛ ɛbolɛ ne anwo ɛnlome ne wɔ afɔlemokyea ne azo kɛ mɔɔ Gyihova hanle hilele Mosisi la.+ 11 Na ɔvale senle ɔyelale nane ne nee ye nwoma ne wɔ azokoɛleɛ ne anzi lɔ.+

12 Akee ɔhunle ɛyelalɛ afɔlebɔdeɛ ne, na Aalɔn amra mrenyia ne mɔ vale mogya ne maanle ye na ɔvale ɔkpondenle afɔlemokyea ne anwo amuala.+ 13 Bɛvale ɛyelalɛ afɔlebɔdeɛ azinli ne nee ɔ ti ne bɛmaanle ye, na ɔyelale bɛ wɔ afɔlemokyea ne azo. 14 Eza ɔwowole ye anyalɛ ne nee ɔ gyakɛ ne mɔ anwo na ɔyelale bɛ wɔ afɔlemokyea ne azo ɔbokale ɛyelalɛ afɔlebɔdeɛ ne anwo.

15 Akee ɔvale menli ne afɔlebɔdeɛ ne ɔrale na ɔvale abɔnkye ne mɔɔ ɔfa yeabɔ ɛtane afɔle yeamaa menli ne la na ɔhunle ye na ɔvale ɔbɔle ɛtane afɔle kɛ alimoa ɛdeɛ ne la. 16 Eza ɔvale ɛyelalɛ afɔlebɔdeɛ ne ɔrale na ɔyɛle ye kɛ mɔɔ bɛyɛ ye ala la.+

17 Akee ɔvale ma afɔlebɔdeɛ ne+ ɔrale, ɔvale ɔ sa ɔvulale bie na ɔyelale ye wɔ afɔlemokyea ne azo ɔbokale nwonlomɔ ɛyelalɛ afɔlebɔdeɛ ne anwo.+

18 Ɔhunle ɛnlankɛ nyinli ne nee boane nyinli ne mɔɔ ɔfa yeabɔ anzodwolɛ afɔle yeamaa menli ne la. Akee Aalɔn amra mrenyia ne mɔ vale mogya ne maanle ye na ɔvale ɔkpondenle afɔlemokyea ne anwo amuala.+ 19 Noko ɛnlankɛ nyinli ne ɛnlome ne,+ boane nyinli ne adua ne mɔɔ ɛlɔ, ɔ kunlu ninyɛne ne anwo ɛnlome ne, kilenzia ne nee ɛbolɛ ne anwo ɛnlome ne ɛdeɛ,+ 20 bɛvale bɛguale nane ne akɛnra ne azo, na ɔmaanle ɛnlome ne kpunle wɔ afɔlemokyea ne azo.+ 21 Noko nane ne akɛnra ne nee ɔ gyakɛ fema ne ɛdeɛ, Aalɔn dole ye ehono kɛ ehono afɔlebɔlɛ wɔ Gyihova anyunlu, kɛ mɔɔ Mosisi hanle la.+

22 Akee Aalɔn maanle ɔ sa zo wɔ menli ne anwo zo na ɔyilale bɛ,+ na mɔɔ ɔbɔle ɛtane afɔle ne nee ɛyelalɛ afɔle ne yɛɛ anzodwolɛ afɔle ne ɔwiele la, ɔdwule aze. 23 Akee Mosisi nee Aalɔn hɔle nyianu ɛdanlɛsua ne anu na bɛvindele bɛrayilale menli ne.+

Akee menli ne amuala nwunle Gyihova anyunlunyia ne,+ 24 na senle vi Gyihova ɛkɛ+ rayelale ɛyelalɛ afɔlebɔdeɛ ne nee ɛnlome ne mɔɔ wɔ afɔlemokyea ne azo la. Mɔɔ menli ne amuala nwunle ye la, bɛdeɛdeanle nu na bɛbutubutule bɛ nyunlu aze.+