Lɛvitikɔso

8 Gyihova doale zo zele Mosisi kɛ: 2 “Fa Aalɔn nee ɔ mra mrenyia ne mɔ,+ adɛladeɛ ne mɔ,+ ɛkpokpalɛ nwole ne,+ ɛtane afɔlebɔlɛ ɛnlankɛ nyinli ne, mboane nyinli nwiɔ ne nee kɛndɛne ne mɔɔ paano mɔɔ mgbɔvonle ɛnle nu wɔ nu la,+ 3 na maa menli ne amuala ɛyia nu wɔ nyianu ɛdanlɛsua ne anuhɔlɛ.”

4 Mosisi yɛle mɔɔ Gyihova zele ye la, na menli ne amuala rayiale nyianu ɛdanlɛsua ne anuhɔlɛ. 5 Akee Mosisi zele menli ne kɛ: “Mɔɔ Gyihova ɛha kɛ yɛyɛ la ɛne.” 6 Yemɔti Mosisi vale Aalɔn nee ɔ mra mrenyia ne mɔ rale na ɔvale nzule ɔbiale bɛ.+ 7 Ɔvale tɛladeɛ tendenle ne+ ɔwulale Aalɔn, ɔvale tabule ne+ ɔbɔle ye avinli, ɔvale tɛladeɛ tendenle ne mɔɔ ɛnlɛ ɔ sa la+ ɔguale zo, ɔvale yifɔdo ne+ ɔwulale ye na ɔvale yifɔdo bɛlɛte ne*+ mɔɔ bɛnwo la ɔhyele zolɛ. 8 Akee ɔvale akɛnrazo aguzo ne+ ɔwulale ye na ɔvale Yulem ne nee Tɛmem ne+ ɔwulale nu. 9 Akee ɔvale abotile ne+ ɔzoale ye na ɔvale nvutuke ɛdɛbaa ne mɔɔ ta, mɔɔ le bɛnwozoyilalɛ sɛkɛlɛneɛ nwuanzanwuanza* ne+ la ɔbɔle abotile ne anyunlu, kɛ mɔɔ Gyihova hanle hilele Mosisi la.

10 Akee Mosisi vale ɛkpokpalɛ nwole ne na ɔkpokpale ɛdanlɛsua ne nee nuhua debie biala+ na ɔdele nwolɛ. 11 Ɔvale bie ɔkpondenle afɔlemokyea ne azo fane nsuu na ɔkpokpale afɔlemokyea ne nee nwolɛ ninyɛne ne amuala yɛɛ kyɛnze kpole ne nee ɔ bo ne na ɔdele nwolɛ. 12 Akee ɔwolale ɛkpokpalɛ nwole ne bie ɔguale Aalɔn ati zo na ɔkpokpale ye na ɔdele ɔ nwo.+

13 Akee Mosisi vale Aalɔn amra mrenyia ne mɔ rale na ɔvale adɛladeɛ ndendenle ne mɔ ɔwulale bɛ, ɔvale tabule ne ɔbɔle bɛ avinli na ɔvale bɛ ahyɛlɛ ne mɔ ɔzoale bɛ,*+ kɛ mɔɔ Gyihova hanle hilele Mosisi la.

14 Akee ɔvale ɛtane afɔlebɔlɛ ɛnlankɛ nyinli ne ɔrale, na Aalɔn nee ɔ mra mrenyia ne mɔ vale bɛ sa guale ɛnlankɛ ne ati zo.+ 15 Mosisi hunle ye na ɔvale ɔ sa ɛrɛlɛsɛka ɔbɔle ye mogya ne+ anu ɔvale ɔhehanle afɔlemokyea ne mɛne ne mɔ amuala anwo na ɔdele afɔlemokyea ne anwo, noko ɔwolale mogya ne mɔɔ ɛha la ɔguale afɔlemokyea ne abo amaa yeade nwolɛ na bɛabɔ mgbɔdalɛ afɔle wɔ zo. 16 Mosisi vale anyalɛ ne anwo ɛnlome ne amuala, ɛbolɛ ne anwo ɛnlome ne yɛɛ kilenzia nwiɔ ne nee nwolɛ ɛnlome ne na ɔyelale bɛ wɔ afɔlemokyea ne azo.+ 17 Akee ɔvale senle ɔyelale ɛnlankɛ mumua ne, nwoma ne, ye nane ne nee ye ebinli ne wɔ azokoɛleɛ ne anzi lɔ,+ kɛ mɔɔ Gyihova hanle hilele Mosisi la.

18 Akee ɔvale ɛyelalɛ afɔlebɔlɛ boane nyinli ne ɔrale, na Aalɔn nee ɔ mra mrenyia ne mɔ vale bɛ sa guale boane ne ati zo.+ 19 Akee Mosisi hunle ye na ɔvale ye mogya ne ɔkpondenle afɔlemokyea ne anwo amuala. 20 Mosisi pepɛle boane nyinli ne azinli azinli, na ɔyelale ɔ ti ne, nane azinli ne nee ɛnlome ne* wɔ afɔlemokyea ne azo. 21 Mosisi vale nzule wowole anyalɛ ne nee ɔ gyakɛ ne mɔ anwo, na ɔyelale boane mumua ne amuala wɔ afɔlemokyea ne azo. Ɔle ɛyelalɛ afɔlebɔdeɛ, afɔlebɔlɛ evuanlɛ mɔɔ ɔ nye die nwolɛ.* Afɔle mɔɔ bɛva senle bɛbɔ bɛmaa Gyihova, kɛ mɔɔ Gyihova hanle hilele Mosisi la.

22 Akee ɔvale boane nyinli ne mɔɔ tɔ zo nwiɔ, ɛsɔfo ɛkpalɛ boane ne ɔrale,+ na Aalɔn nee ɔ mra mrenyia ne mɔ vale bɛ sa guale boane ne ati zo.+ 23 Mosisi hunle ye na ɔvale ye mogya ne bie ɔhanle Aalɔn anzo fema ne nee ɔ sa fema kokotile ne yɛɛ ɔ gyakɛ fema kokotile ne azo. 24 Akee Mosisi vale Aalɔn amra mrenyia ne mɔ rale na ɔvale mogya ne bie ɔhanle bɛ nzo fema ne mɔ nee bɛ sa fema ahohotile yɛɛ bɛ gyakɛ fema ahohotile ne mɔ azo; na Mosisi kpondenle mogya ne mɔɔ hale la wɔ afɔlemokyea ne anwo amuala.+

25 Akee ɔyeyele ɛnlome ne, ɔ dua ne mɔɔ ɛlɔ, anyalɛ ne anwo ɛnlome ne amuala, ɛbolɛ ne anwo ɛnlome ne, kilenzia nwiɔ ne nee nwolɛ ɛnlome ne yɛɛ ɔ gyakɛ fema ne.+ 26 Ɔyele paano mɔɔ mgbɔvonle ɛnle nu mɔɔ bɛbɔ ye kɛ ngɛba la ko,+ paano mɔɔ bɛbɔ ye kɛ ngɛba mɔɔ nwole wɔ nu la ko+ yɛɛ paano ndɛbandɛba ko ɔvile kɛndɛne ne mɔɔ paano mɔɔ mgbɔvonle ɛnle nu wɔ nu mɔɔ gyi Gyihova anyunlu ɛkɛ la anu. Akee ɔvale ɔguale ɛnlome ne nee boane ne agyakɛ fema ne azo. 27 Ɔvale ɔ muala ɔguale Aalɔn nee ɔ mra mrenyia ne mɔ asa anu na ɔdole ye ehono kɛ ehono afɔlebɔlɛ wɔ Gyihova anyunlu. 28 Akee Mosisi liele vile bɛ sa nu na ɔyelale ye wɔ afɔlemokyea ne azo ɔbokale ɛyelalɛ afɔlebɔdeɛ ne anwo. Ɔle ɛsɔfo ɛkpalɛ afɔlebɔlɛ evuanlɛ mɔɔ ɔ nye die nwolɛ.* Ɔle afɔle mɔɔ bɛva senle bɛbɔ bɛmaa Gyihova.

29 Akee Mosisi vale boane ne akɛnra ne na ɔdole ye ehono kɛ ehono afɔlebɔlɛ wɔ Gyihova anyunlu.+ Ɛhye a le Mosisi kyɛfoa mɔɔ ɔyele ɔvile ɛsɔfo ɛkpalɛ boane ne anu kɛ mɔɔ Gyihova hanle hilele Mosisi la.+

30 Akee Mosisi vale ɛkpokpalɛ nwole ne+ nee afɔlemokyea ne anwo mogya ne bie kpondenle Aalɔn nee ɔ mra mrenyia ne mɔ adɛladeɛ ne mɔ anu. Kɛ ɔyɛle ɔdele Aalɔn nee ɔ mra mrenyia ne mɔ+ nee bɛ adɛladeɛ ne mɔ+ anwo la ɛne.

31 Akee Mosisi zele Aalɔn nee ɔ mra mrenyia ne mɔ kɛ: “Bɛdo+ nane ne wɔ nyianu ɛdanlɛsua ne anuhɔlɛ ne na bɛva paano ne mɔɔ wɔ ɛsɔfo ɛkpalɛ kɛndɛne ne anu la bɛboka nwo bɛli. Bɛhanle bɛhilele me kɛ, ‘Aalɔn nee ɔ mra mrenyia ne mɔ a bali a.’+ 32 Nane ne nee paano ne mɔɔ kɛha la, bɛva senle bɛyela ye.+ 33 Bɛmmafi nyianu ɛdanlɛsua ne anuhɔlɛ ne bɛkɔ ɛleka biala too kenle nsuu, kɔkpula kɛ mekɛ mɔɔ bɛfa bɛakpa bɛ la kɛwie, ɔluakɛ bɛbava kenle nsuu a bɛakpa bɛ kɛ ɛsɔfoma a.*+ 34 Gyihova hanle kɛ yɛyɛ mɔɔ yɛyɛ ye ɛnɛ la amaa yɛali bɛ ti mgbɔdalɛ.+ 35 Bɛbadɛnla nyianu ɛdanlɛsua ne anuhɔlɛ alehyenlɛ nee aledwolɛ kenle nsuu+ na bɛayɛ gyima mɔɔ Gyihova se bɛyɛ la,+ amaa bɛanwu; ɔluakɛ ɛhye a yeha yehile me a.”

36 Na Aalɔn nee ɔ mra mrenyia ne mɔ yɛle ninyɛne mɔɔ Gyihova luale Mosisi anwo zo hanle la amuala.