Lɛvitikɔso

12 Gyihova doale zo zele Mosisi kɛ: 2 “Ka kile Yizilayɛma kɛ, ‘Saa raalɛ nrenzɛ* na ɔwo ralɛ nrenyia a, ɔ nwo ɛnrɛde too kenle nsuu, kɛ mekɛ mɔɔ yehɔ amozi na ɔ nwo ɛnde ala la.+ 3 Kenle mɔtwɛ ne azo, bɛbapɛ kakula ne mrenyiazo.+ 4 Ɔbahɔ zo yeade ɔ nwo yeavi mogya ne anwo too kenle 33. Ɔnle kɛ ɔfa ɔ sa ɔka debie biala mɔɔ le nwuanzanwuanza la, yɛɛ ɔnle kɛ ɔkɔ ɛleka nwuanzanwuanza ne kɔkpula kɛ mekɛ mɔɔ ɔfa yeade ɔ nwo la kɛwie.

5 “‘Saa ɔwo raalɛ a, ɔ nwo ɛnrɛde too kenle 14, kɛ mekɛ mɔɔ yehɔ amozi ala la. Ɔbahɔ zo yeade ɔ nwo yeavi mogya ne anwo too kenle 66. 6 Saa ɔwo ralɛ nrenyia anzɛɛ ralɛ raalɛ na mekɛ mɔɔ ɔfa yeade ɔ nwo la wie a, ɔbava boaneralɛ nyinli mɔɔ ɛli ɛvolɛ ko mɔɔ ɔfa yeabɔ ɛyelalɛ afɔle+ yɛɛ mɔlɔnoma ralɛ anzɛɛ abubule mɔɔ ɔfa yeabɔ ɛtane afɔle la yearɛlɛ ɛsɔfo ne wɔ nyianu ɛdanlɛsua ne anuhɔlɛ. 7 Ɛsɔfo ne bava ahɔ Gyihova anyunlu na yeali ɔ ti mgbɔdalɛ, na ɔ nwo bade avi ye mogya ɛdulɛ ne anwo. Raalɛ mɔɔ kɛwo ralɛ nrenyia anzɛɛ ralɛ raalɛ la anwo mɛla ɛne. 8 Noko saa ɔnrɛhola ɔnrɛva boane a, ɛnee ɔwɔ kɛ ɔfa abubule nwiɔ anzɛɛ mɔlɔnoma mralɛ nwiɔ+ ɔba ɔmaa bɛfa ko bɛbɔ ɛyelalɛ afɔle na bɛfa ko bɛbɔ ɛtane afɔle, na ɛsɔfo ne bali ɔ ti mgbɔdalɛ na ɔ nwo ade.’”