Lɛvitikɔso

11 Akee Gyihova zele Mosisi nee Aalɔn kɛ: 2 “Bɛha bɛhile Yizilayɛma kɛ, ‘Azɛlɛ ye azo nane* mɔɔ bɛbahola bɛali la ɛne:+ 3 Nane biala mɔɔ bɛkpakye ɔ gyakɛ taboa ne anu mɔɔ tokule la nu na ɔkpu ɔkposa la, bɛbahola bɛali.

4 “‘Noko ɔnle kɛ bɛdi nane ɛhye mɔ mɔɔ kpu kposa anzɛɛ bɛkpakye bɛ gyakɛ taboa ne anu la: afunlumu, ɔkpu ɔkposa noko bɛamkpakye ɔ gyakɛ taboa ne anu. Ɔ nwo ɛnde ɛmmaa bɛ.+ 5 Eza bɛmmadi awolɛzopema,+ ɔluakɛ ɔkpu ɔkposa noko bɛamkpakye ɔ gyakɛ taboa ne anu. Ɔ nwo ɛnde ɛmmaa bɛ. 6 Eza bɛmmadi asoasoa, ɔluakɛ ɔkpu ɔkposa noko bɛamkpakye ɔ gyakɛ taboa ne anu. Ɔ nwo ɛnde ɛmmaa bɛ. 7 Eza bɛmmadi kpolike,+ ɔluakɛ bɛkpakye ɔ gyakɛ taboa ne anu yɛɛ tokule la nu noko ɔmkpu ɔmkposa. Ɔ nwo ɛnde ɛmmaa bɛ. 8 Bɛmmadi bɛ nane yɛɛ bɛmmafa bɛ sa bɛka bɛ avunli. Bɛ nwo ɛnde ɛmmaa bɛ.+

9 “‘Nzule nu abɔdeɛ mɔɔ bɛbahola bɛali la ɛne: Azule nu debie biala mɔɔ lɛ ɔ nwo ngyɛnengyɛne* na abonle wɔ nwo la, ɔwɔ nyevile nu o, azule nu o, bɛbahola bɛali.+ 10 Noko abɔdeɛ menyemenye kɔsɔɔti nee anyewɔzo abɔdeɛ* gyɛne biala mɔɔ wɔ nyevile nu anzɛɛ azule nu mɔɔ bɛnlɛ bɛ nwo ngyɛnengyɛne anzɛɛ abonle ɛnle bɛ nwo la, le kyibadeɛ maa bɛ. 11 Ɛhɛe, bɛle kyibadeɛ bɛmaa bɛ, bɛmmadi bie+ yɛɛ ɔwɔ kɛ bɛkyi bɛ avunli. 12 Nzule nu debie biala mɔɔ ɛnlɛ ɔ nwo ngyɛnengyɛne na abonle ɛnle ɔ nwo la le kyibadeɛ maa bɛ.

13 “‘Abɔdeɛ mɔɔ tu mɔɔ ɔwɔ kɛ bɛkyi la ɛne; ɔnle kɛ bɛdi ɔluakɛ bɛle kyibadeɛ: kɔleɛ,+ nyevile nloa kyɛnyema, ɛkpɔtɛ bile,+ 14 sianza kɔkɔlɛ nee sianza bile biala, 15 kɔkɔsɛlɛ biala, 16 soholo, kpadule, gaale,* kyɛnyema biala, 17 kpadule ekyi nee kpadule anzo ndendenle, kɔmɔlante,* 18 ɛbɔ nu dabodabo, azule nloa bɔngɔbɔngɔ, ɛkpɔtɛ, 19 akoso, bɔngɔbɔngɔ biala, kpokpole yɛɛ akpanlɛ. 20 Kɛkɛba* biala mɔɔ lɛ ndɛbalɛ mɔɔ tia ɔ gyakɛ nna azo la le kyibadeɛ maa bɛ.

21 “‘Ngɛkɛba mɔɔ lɛ ndɛbalɛ mɔɔ bɛtia bɛ gyakɛ nna azo la, bɛbahola bɛali nuhua ne mɔɔ lɛ egyakɛ bieko mɔɔ bɛfa bɛwuluwulu azɛlɛ nwo la. 22 Nuhua ne mɔɔ bɛbahola bɛali la ɛne: abɛbɛ ngakyile mɔɔ kola tu, abɛbɛ gyɛne mɔɔ bɛdi la,+ kɛlatua yɛɛ bɛnyebɛnye. 23 Ngɛkɛba kɔsɔɔti mɔɔ ɛha mɔɔ bɛ gyakɛ le nna la le kyibadeɛ maa bɛ. 24 Saa bɛdi bie a, bɛ nwo bagua evinli. Awie biala mɔɔ kɛva ɔ sa kɛha bie funli la anwo bagua evinli kɔkpula nɔsolɛ nu.+ 25 Awie biala mɔɔ kɛva ɔ sa kɛzɔ bie funli la, ɔwɔ kɛ ɔkpo ye adɛladeɛ;+ ɔ nwo bagua evinli kɔkpula nɔsolɛ nu.

26 “‘Nane biala mɔɔ bɛkpakye ɔ gyakɛ taboa ne anu noko tokule ɛnla nu yɛɛ ɔmkpu ɔmkposa la anwo ɛnde ɛmmaa bɛ. Awie biala mɔɔ kɛva ɔ sa kɛha bie la anwo bagua evinli.+ 27 Nane kɔsɔɔti mɔɔ tia bɛ gyakɛ nna azo anu biala mɔɔ tia ɔ gyakɛ ati la anwo ɛnde ɛmmaa bɛ. Awie biala mɔɔ kɛva ɔ sa kɛha bie funli la anwo bagua evinli kɔkpula nɔsolɛ nu. 28 Awie biala mɔɔ kɛmaa bie funli zo la, ɔwɔ kɛ ɔkpo ye adɛladeɛ,+ na ɔ nwo bagua evinli kɔkpula nɔsolɛ nu.+ Bɛ nwo ɛnde ɛmmaa bɛ.

29 “‘Azɛlɛ ye azo abɔdeɛ ngyikyi mɔɔ anwo ɛnde ɛmmaa bɛ la ɛne: amgbɔde, kila,+ kekelebetile biala, 30 ɛlaleɛ, kekelebetile kpole, awudabɛ, ɛbolɔme yɛɛ bɔmɔnra. 31 Abɔdeɛ ɛhye mɔ anwo ɛnde ɛmmaa bɛ.+ Awie biala mɔɔ kɛva ɔ sa kɛha bie funli la anwo bagua evinli kɔkpula nɔsolɛ nu.+

32 “‘Debie biala mɔɔ bie kɛwu kɛdɔ zo la, saa bɛva baka a bɛyɛ o, tɛladeɛ o, nwoma o, anzɛɛ ɛdanlɛ o, nwolɛ ɛnde. Kyɛnze biala mɔɔ bɛfa bɛyɛ debie la, ɔwɔ kɛ bɛwula ye nzule nu, na nwolɛ ɛnrɛde kɔkpula nɔsolɛ nu; akee nwolɛ bade. 33 Saa bie tɔ buakɛ nu a, ɔwɔ kɛ bɛbɔ ye, debie biala mɔɔ wɔ nu la anwo ɛnde.+ 34 Aleɛ biala mɔɔ buakɛ ɛhye anu nzule kɛha ye la anwo ɛnde, yɛɛ debie biala mɔɔ bɛno mɔɔ wɔ buakɛ ɛhye anu la anwo ɛnde. 35 Debie biala mɔɔ bie funli kɛdɔ zo la anwo ɛnde. Fonlomo o, mokyea o, ɔwɔ kɛ bɛbubu ye. Bɛ nwo ɛnde, yɛɛ bɛ nwo ɛnde ɛmmaa bɛ. 36 Nzubula yɛɛ bula mɔɔ bɛgua nzule nu la ala a anwo bahɔ zo ade a, noko awie mɔɔ kɛva ɔ sa kɛha bie funli la anwo bagua evinli. 37 Saa bie funli tɔ ma mɔɔ bɛkalua la azo a, nwolɛ te. 38 Noko saa bɛfa nzule bɛgua ma bie azo na bie funli foa bie tɔ zo a, ma ne anwo ɛnde ɛmmaa bɛ.

39 “‘Na saa nane mɔɔ bɛdi la bie wu na awie fa ɔ sa ka ye funli ne a, ɔ nwo bagua evinli kɔkpula nɔsolɛ nu.+ 40 Awie biala mɔɔ kɛli bie funli la, ɔwɔ kɛ ɔkpo ye adɛladeɛ ne mɔ, na ɔ nwo bagua evinli kɔkpula nɔsolɛ nu.+ Awie biala mɔɔ kɛmaa bie funli zo la, ɔwɔ kɛ ɔkpo ye adɛladeɛ, na ɔ nwo bagua evinli kɔkpula nɔsolɛ nu. 41 Abɔdeɛ menyemenye biala mɔɔ wɔ azɛlɛ ye azo la le kyibadeɛ.+ Ɔnle kɛ bɛdi. 42 Bɛmmadi abɔdeɛ biala mɔɔ twenle ɔ nwo aze, abɔdeɛ biala mɔɔ tia ɔ gyakɛ nna azo, anzɛɛ abɔdeɛ menyemenye biala mɔɔ ɔ gyakɛ zonle la, ɔluakɛ bɛle kyibadeɛ.+ 43 Bɛmmadi abɔdeɛ menyemenye biala na bɛyɛ kyibadeɛ, yɛɛ bɛmmatoa bɛ bɛgua bɛ nwo evinli.+ 44 Ɔluakɛ medame a mele Gyihova bɛ Nyamenle ne a,+ na ɔwɔ kɛ bɛte bɛ nwo na bɛyɛ nwuanzanwuanza,+ ɔluakɛ mele nwuanzanwuanza.+ Ɔti ɔnle kɛ bɛmaa azɛlɛ ye azo abɔdeɛ menyemenye biala gua bɛ* nwo evinli. 45 Ɔluakɛ medame a mele Gyihova mɔɔ yele bɛ vile Yigyibiti azɛlɛ zo menvale mengilele kɛ mele bɛ Nyamenle la,+ na ɔwɔ kɛ bɛyɛ nwuanzanwuanza+ ɔluakɛ mele nwuanzanwuanza.+

46 “‘Nane, abɔdeɛ mɔɔ tu, nzule nu anyewɔzo abɔdeɛ* biala yɛɛ azɛlɛ ye azo abɔdeɛ* menyemenye biala anwo mɛla ɛne, 47 amaa bɛanwu ngakyile mɔɔ wɔ debie mɔɔ anwo te nee mɔɔ anwo ɛnde yɛɛ anyewɔzo abɔdeɛ mɔɔ ɔwɔ kɛ bɛdi nee mɔɔ ɔnle kɛ bɛdi la avinli.’”+