Gyɛlɛmaya
49 Mɔɔ Gyihova ɛha ye wɔ Amɔnoma anwo la ɛne:+
“Yizilayɛ ɛnlɛ mralɛ mrenyia ɔ?
Ɔnlɛ koliagya ɔ?
Duzu ati a Malekam+ ɛva Gaade azɛlɛ ne ɛ?+
Na duzu ati a ye menli de Yizilayɛ azuamgbole ne mɔ azo a?”
2 “Ɛhye ati, nea! mekɛ ɛlɛba,’ Gyihova a se a,
‘Mɔɔ mebamaa bɛade konle aweɛne ne* wɔ Amɔnoma suakpole Relaba azo a.+
Ɔbayɛ kɛ ezukue mɔɔ ɛdɔ mgbane la,
Na bɛbado senle wɔ azua mɔɔ zuozua ye la azo.’
Na Yizilayɛ balie menli mɔɔ liele ye azɛlɛ ne la noko azɛlɛ,’+ Gyihova a se a.
3 O Hɛhyebɔnoma, bɛzu alɔbɔlɛ ɛzunlɛ, ɔluakɛ bɛzɛkye Eyae!
O azua mɔɔ zuozua Relaba la, bɛzu.
Bɛheda ɛrele.
Bɛzu alɔbɔlɛ ɛzunlɛ na bɛkpɔsa mboane tunli ne mɔ anu,
Ɔluakɛ Malekam bahɔ akɛlɛzonlenlɛ nu,
Ɔ nee ye ɛsɔfoma nee ye mgbanyima ne mɔ amuala.+
4 O ralɛ raalɛ mɔɔ ɛnli nɔhalɛ, duzu ati a ɛfa wɔ mbɔnza ne mɔ
Nee wɔ azɛlɛ sɛsɛ mɔɔ kye aleɛ la ɛtu ɛ nwo,
Ɛfa ɛ nwo ɛto wɔ anwonyia zo
Na ɛka kɛ: “Nwane a bara me nwo zo a?”’”
5 “‘Nea, melɛmaa debie mɔɔ yɛ ɛzulolɛ la ara ɛ nwo zo,’ Tumivolɛ Awulae, ɛlɔne Gyihova a se a,
‘Ɔvi bɛdabɛ mɔɔ bɛzuozua wɔ la amuala ɛkɛ.
Bɛbabɔ bɛ asande bɛahɔ ɛleka biala,
Na awie biala ɛnrɛboɔboa bɛdabɛ mɔɔ bɛbanriandi la anloa.’”
6 “‘Noko nzinlii mebaboɔboa Amɔnoma mɔɔ wɔ akɛlɛzonlenlɛ nu la anloa,’ Gyihova a se a.”
7 Mɔɔ ɛlɔne Gyihova ɛha ye wɔ Yidɔm anwo la ɛne:
“Nrɛlɛbɛ ɛwie Timan ɔ?+
Folɛdulɛ kpalɛ ɛbɔ bɛdabɛ mɔɔ bɛlɛ ndelebɛbo la ɔ?
Bɛ nrɛlɛbɛ ɛkpɔlɔ ɔ?
8 O Didanema, bɛnriandi, bɛzia bɛ nzi!+
Bɛhɔvea azɛlɛ bo!
Ɔluakɛ mebamaa Yisɔ anwu amaneɛ
Wɔ mekɛ mɔɔ mebahakyi me nye wɔ ɔ nwo zo la.
9 Saa menli mɔɔ tete vanye ma la a rale ɛ nwo zo a,
Asoo anrɛɛ bɛnrɛgyakyi bie bɛnrɛmaa awie mɔ ɛnrɛtete ɔ?
Saa nwule rale ɛkɛ ne nɔɔzo a,
Anrɛɛ bɛbazɛkye ninyɛne mɔɔ bɛkulo kɛ bɛsɛkye ye la ala.+
10 Noko mebalie Yisɔ anwo debie biala.
Mebamaa ye feabelɛ ne mɔ anwo ala ɛkɛ,
Amaa yeangola fea.
11 Gyakyi wɔ nrisa mralɛ ne mɔ,
Na mebanlea bɛ,
Na wɔ ahunlanvolɛ mraalɛ bɛalie me ali.”
12 Ɔluakɛ mɔɔ Gyihova ɛha la ɛne: “Nea! Saa menli mɔɔ ɔnle kɛ bɛno kanrɛlɛ ne anu la bɛanlo a, ɛnee wɔmɔ yɛɛ ɛbava ɛ nwo wɔali a? Ɛnrɛva ɛ nwo ɛnrɛli, ɔwɔ kɛ ɛno kanrɛlɛ ne anu.”+
13 “Ɔluakɛ meva me nwo meha ndane,” Gyihova a se a, “kɛ Bɔzela bahakyi debie ɛzulolɛ bie,+ anyiemgba,* ɛzɛkyelɛ nee amowa; yɛɛ ye azuamgbole ne mɔ amuala bɛadɔ mgbane dahuu.”+
14 Mede amaneɛ bie mevi Gyihova ɛkɛ,
Yezoa awie wɔ maanle maanle ne mɔ anu kɛ:
“Bɛboɔboa bɛ nloa na bɛhɔ ɔ nwo zo;
Bɛziezie bɛ nwo bɛmaa konle.”+
15 “Ɔluakɛ, nea! Memaa wɔyɛ ekyi kpalɛ wɔ maanle maanle ne mɔ anu,
Menli ɛmbu wɔ bie.+
16 Ɛzulolɛ mɔɔ ɛka menli
Nee wɔ ahonle nu anwomemaazo* ne ɛbɛlɛbɛla wɔ,
O wɔmɔ mɔɔ ɛde bodane zo,
Ɛde awoka ndendenle zo.
Saa ɛyɛ wɔ sane wɔ anwuma kɛ kɔleɛ bɔbɔ a,
Nehane a mebaye wɔ meavi meadwula wɔ aze a,” Gyihova a se a.
17 Na Yidɔm bahakyi debie ɛzulolɛ bie.+ Awie biala mɔɔ bapɛ nu wɔ ɔ nwo ɛkɛ ne la bava ɛzulolɛ anlea na yeabɔ nvonloma ɔlua ye amaneɛnwunlɛ ne mɔ kɔsɔɔti ati. 18 Kɛ mɔɔ bɛbutule Sodɔm nee Gomɔla nee azuamgbole mɔɔ zuozua bɛ la anye aze la,”+ Gyihova a se a, “zɔhane ala a awie biala ɛnrɛdɛnla zolɛ, yɛɛ awie biala ɛnrɛzokoɛ ɛkɛ a.+
19 “Nea! Awie bara adidileka ne mɔɔ gyi kpundii la anwo ɛkɛ ne kɛ awenade+ mɔɔ vi Dwɔdan kpɔkɛmile ne anu la, noko wɔ mekɛ ekyi bie ala anu mebamaa yeanriandi yeavi ɔ nwo ɛkɛ. Na mebaye awie meamaa yeanlea ɔ nwo zo. Na nwane a le kɛ medame a, na nwane a kɛhola nee me kɛdwudwu a? Mboaneneavolɛ boni a kɛhola kɛgyinla me nyunlu a?+ 20 Ɛhye ati, bɛdie kpɔkɛ mɔɔ Gyihova ɛbɔ ye wɔ Yidɔm anwo nee adwenle mɔɔ yeva ye wɔ Timanema anwo la:+
Nɔhalɛ nu, bɛbahwenle mboane ngyikyi ne mɔ aze bɛahɔ.
Na bɛdabɛ ti ɔbamaa bɛ tɛnlabelɛ ne adɔ mgbane.+
21 Bɛ azedɔlɛ ne dede ɛmaa azɛlɛ ne ɛkpusu.
Bɛte ɛzunlɛ!
Bɛte bɛ ne wɔ Nyevile Kɔkɔlɛ ne anloa lɔ.+
Kenle zɔhane, Yidɔm ɛlɔnema ahonle
Bayɛ kɛ raalɛ mɔɔ ɛlɛwo la ahonle.”
23 Damasekɛse ɛdeɛ ɛne:+
“Bɛgua Heemate+ nee Aapade anyunlu aze,
Ɔluakɛ bɛde amaneɛ ɛtane.
Ɛzulolɛ ɛha bɛ.
Nyevile ne ɛyɛ begyebegye na ɔngola ɔngyinla dii.
24 Damasekɛse ahonle ɛdu.
Yehakyi ɔ nye kɛ ɔnriandi, noko ɛzulolɛ ɛha ye.
Anwongyelelɛ nee nyane ɛkyekye ye,
Kɛ raalɛ mɔɔ ɛlɛwo la.
25 Duzu ati a bɛtɛkpole ayɛlɛyelɛ suakpole ne,
Anyelielɛ suakpole ne ɛ?
26 Ɔluakɛ ye mgbavolɛ bɛadɔ amolɛ nu wɔ ye gua ne mɔ azo,
Na ɛlɔnema ne mɔ amuala baminli wɔ kenle zɔhane,” ɛlɔne Gyihova a se a.
27 “Mebado senle wɔ Damasekɛse bane ne anu,
Na ɔbayela Bɛne-heedade aranemgbole ne mɔ.”+
28 Mɔɔ Gyihova ɛha ɛhile Kidaa+ nee Heezɔ arelemgbunlililɛ mɔɔ Babelɔn Belemgbunli Nɛbukadenɛza zɛkyele bɛ la ɛne:
“Bɛdwazo, bɛhɔ Kidaa,
Na bɛhɔhu ngakula mɔɔ vi Aduduleɛ la.
29 Bɛbava bɛ ɛdanlɛ azua nee bɛ mboane bɛahɔ,
Bɛ ndanlɛ mɔɔ bɛfa bɛyɛ ɛdanlɛ azua nee bɛ ninyɛne kɔsɔɔti.
Bɛbava bɛ afunlumu bɛahɔ,
Bɛbazu bɛavɛlɛ* bɛ kɛ, ‘Ɛzulolɛ ɛbɔ yɛ ɛyia!’”
30 “O Heezɔ amra, bɛnriandi, bɛhɔ moamoa!
Bɛhɔvea azɛlɛ bo,” Gyihova a se a.
“Ɔluakɛ Babelɔn Belemgbunli Nɛbukadenɛza ɛbɔ bɛ nwo kpɔkɛ ɛtane,
Na yeva bɛ nwo adwenle ɛtane.”
31 “Bɛdwazo, bɛvo bɛhɔ maanle ne mɔɔ de anzodwolɛ nu la anwo zo,
Ɔde ɛkɛ ne koonwu!” Gyihova a se a.
“Ɔnlɛ nlenkɛ anzɛɛ mbulalɛ mɔɔ gua nlenkɛ nzi la; bɛ ngome a bɛde a.
32 Bɛ afunlumu ne mɔ bayɛ afedeɛ,
Yɛɛ bɛbave bɛ nyɛmoa dɔɔnwo ne.
Mebabɔ bɛ asande meagua anwoma kɔsɔɔti anu,*
Bɛdabɛ mɔɔ bɛkpa bɛ kɛsa la,+
Na mebamaa bɛ amaneɛnwunlɛ avi ɛleka kɔsɔɔti ara,” Gyihova a se a.
33 “Na Heezɔ bayɛ ɛzonlɛ dabelɛ,
Ɔbadɔ mgbane dahuu.
Awie biala ɛnrɛdɛnla zolɛ,
Yɛɛ awie biala ɛnrɛzokoɛ ɛkɛ.”
34 Wɔ Dwuda Belemgbunli Zɛdikaya+ tumililɛ mɔlebɛbo, Gyihova edwɛkɛ mɔɔ rale ngapezonli Gyɛlɛmaya ɛkɛ wɔ Yilam+ anwo la ɛne: 35 “Mɔɔ ɛlɔne Gyihova ɛha la ɛne, ‘Nea, melɛbubu Yilam ɛda ne anu,+ bɛ anwosesebɛ ɛvileka ne. 36 Mebamaa anwoma nna avi azɛlɛ muleɛ nna ne azo ara Yilam anwo zo, na mebabɔ bɛ asande meahɔ anwoma ɛhye mɔ amuala anu. Maanle biala ɛnle ɛkɛ ne mɔɔ Yilamma mɔɔ bɛbɔ bɛ asande la ɛnrɛhɔ nu a.’”
37 “Mebazɛkye Yilamma wɔ bɛ kpɔvolɛma anye zo nee bɛdabɛ mɔɔ bɛlɛkpondɛ bɛ bɛahu bɛ* la anye zo; na mebamaa munzule ado bɛ, me ɛya wuluwulu ne,” Gyihova a se a. “Mebazoa konle dadeɛ meali bɛ nzi kɔkpula kɛ mebabɔ bɛ bo zo bɔkɔɔ.”
38 “Na mebava me belemgbunli ebia ne meazie Yilam,+ na mebazɛkye belemgbunli ne nee mgbanyima mɔɔ wɔ ɛkɛ la,” Gyihova a se a.
39 “Noko wɔ awieleɛ mekɛ ne anu, mebaboɔboa Yilamma mɔɔ wɔ akɛlɛzonlenlɛ nu la anloa,” Gyihova a se a.