Gyɛlɛmaya
48 Mɔɔ ɛlɔne Gyihova, Yizilayɛ Nyamenle ne ɛha ye wɔ Mowabe+ anwo la ɛne:
“Nibo gyakɔ,+ ɔluakɛ bɛzɛkye ye!
Bɛho bɛva Keleateeyem+ na bɛmaa ɔ nyunlu ɛgua aze.
Bɛzɛkye ɛvealeka kpalɛ* ne na bɛmaa yebɔ anyiemgba.+
2 Bɛnye Mowabe ayɛlɛ bieko.
Bɛbɔle ye azedɔlɛ ne anwo kpɔkɛ wɔ Hɛhyebɔn:+
‘Bɛrɛla bɛmaa yɛbɔ ɔ bo zo na yeanyɛ maanle bieko.’
O Mademɛn, ɛdawɔ noko, ɔwɔ kɛ ɛyɛ koonwu,
Ɔluakɛ konle dadeɛ doa wɔ.
3 Bɛte ɛzɛkyelɛ nee azedɔlɛ kpole bie
Anwo ɛzunlɛ wɔ Holoneeyem.+
4 Mowabe ɛbɔ.
Ye ngakula ne mɔ ɛlɛsu.
5 Mɔɔ bɛlɛfo bɛahɔ Luhete la, ɛnee bɛlɛsu.
Na mɔɔ bɛvi Holoneeyem bɛlɛtolo la, bɛte ɛzɛkyelɛ ne anwo nyanelilɛ ɛzunlɛ.+
6 Bɛnriandi, bɛnriandi bɛlie bɛ ngoane!*
Bɛyɛ kɛ dwunipa baka la wɔ fienemgbole nu.
7 Kɛmɔ ɛvale ɛ nwo ɛdole wɔ gyima nee wɔ anwonyia zo la ati,
Bɛbaho bɛava ɛdawɔ noko.
Na Kimɔhye+ bahɔ akɛlɛzonlenlɛ nu,
Ɔ nee ye ɛsɔfoma nee ye mgbanyima ne mɔ amuala.
8 Sɛkyevolɛ ne bara suakpole biala azo,
Na suakpole biala ɛnrɛvi ɛsalɛ.+
Bɔnza baminli,
Na bɛbazɛkye azɛlɛ sɛsɛ, kɛ mɔɔ Gyihova ɛha la.
9 Bɛva debie bɛyɛ adenle ne nzonlɛ bɛmaa Mowabe,
Ɔluakɛ saa bɛlɛsɛkye ye a ɔbanriandi,
Na ye azuamgbole ne mɔ bɛahakyi debie ɛzulolɛ bie,
Awie ɛnrɛdɛnla zolɛ.+
10 Munzule ɛha sonla mɔɔ ɛnyeye ye ahonle nu ɛnyɛ Gyihova gyima ne la!
Munzule ɛha sonla mɔɔ ɛnva ye konle dadeɛ ne ɛnga mogya ɛngua la!
11 Ɔvi Mowabema ngakula nu, bɛtɛgyegyele bɛ ɛlɛ
Bɛle kɛ nza mɔɔ ɛla* ɔ bo la.
Bɛtɛwolale bɛ bɛtɛfile buakɛ ko anu bɛtɛguale fofolɛ nu ɛlɛ,
Yɛɛ bɛtɛkɔle akɛlɛzonlenlɛ nu ɛlɛ.
Ɛhye ati a bɛ fɛlɛko ne ɛtɛkakyile,
Yɛɛ bɛ evuanlɛ ne noko ɛtɛkakyile la.
12 “‘Ɔti nea! mekɛ ɛlɛba,’ Gyihova a se a, ‘mɔɔ mebazoa menli meamaa bɛahɔwɔne bɛ ti aze a. Bɛbawɔne bɛ ti aze bɛawola debie biala mɔɔ wɔ bɛ mbuakɛ ne mɔ anu la bɛagua, na bɛabobɔ bɛ mbuakɛ mgbole ne mɔ. 13 Na Mowabema anyunlu bagua aze wɔ Kimɔhye anwo, kɛ mɔɔ Yizilayɛma anyunlu ɛgua aze wɔ Bɛtɛle mɔɔ bɛvale bɛ ti bɛzɔle ye la anwo la.+
14 Duzu ati a bɛka kɛ: “Yɛle konle nu katakyiema, yɛziezie yɛ nwo yɛmaa konle a”?’+
Belemgbunli ne mɔɔ ye duma a le ɛlɔne Gyihova la a se a.+
16 Ɔnrɛhyɛ Mowabema ɛzɛkyelɛ ne bara,
Na bɛ azedɔlɛ ne ɛlɛbikye ndɛndɛ.+
17 Ɔwɔ kɛ bɛdabɛ mɔɔ bɛbɔ bɛ bɛyia la amuala su bɛ,
Bɛdabɛ mɔɔ bɛze bɛ duma la amuala.
Bɛze bɛ kɛ: ‘O nea kɛzi anwosesebɛ kpɔma ne anu ɛbubu a, baka kɛnlɛma ne!’
18 O Daebɔnoma, bɛvi bɛ anyunlunyia ne azo bɛdwu aze,
Na bɛdɛnlɛdɛnla azɛlɛ nwo* wɔ nzuhɔne nu,+
Ɔluakɛ Mowabe sɛkyevolɛ ne ɛra bɛ nwo zo,
Na ɔbazɛkye bɛ ɛleka mɔɔ bɛlie nwolɛ bane la bɔkɔɔ.+
19 Alowɛma, bɛhɔgyinla adenle ne anloa na bɛnlea.+
Bɛbiza nrenyia mɔɔ ɛlɛnriandi nee raalɛ mɔɔ ɛlɛfi ɛsalɛ la kɛ, ‘Duzu a ɛzi a?’
20 Mowabe ɛbɔ anyiemgba na ɛzulolɛ ɛha ye.
Bɛye awolɛ na bɛzu.
Bɛbɔ ye nolo wɔ Anɔn+ kɛ bɛzɛkye Mowabe.
21 “Ndɛnebualɛ ɛra azɛlɛ sɛsɛ ne azo+ wɔ Hɔlɔn, Gyeehaze+ yɛɛ Mɛfeeyate;+ 22 Daebɔn,+ Nibo+ yɛɛ Bɛte-dibelateeyɛm; 23 Keleateeyem,+ Bɛte-geemɔle yɛɛ Bɛte-miyɔn;+ 24 Kileɔto+ nee Bɔzela; yɛɛ Mowabe azɛlɛ ne azo azuamgbole, mɔɔ wɔ moa nee mɔɔ bikye la kɔsɔɔti azo.
25 ‘Bɛpɛ Mowabe anwosesebɛ* ne bɛdo aze;
Bɛbu ɔ sa,’ Gyihova a se a.
26 ‘Bɛmaa ɔbo nza,+ ɔluakɛ yemaa ɔ nwo zo yetia Gyihova.+
Mowabe da ye ɛveleɛ nu,
Yɛɛ ɔle agolobɛnwo debie.
27 Asoo ɛnee Yizilayɛ ɛnle agolobɛnwo debie ɛmmaa bɛ ɔ?+
Asoo ɛnee ɔboka nwulema anwo,
Mɔɔ ɔdaye ti bɛkpusu bɛ ti na bɛtendɛ bɛtia ye ɔ?
28 Mowabema, bɛdu bɛvi azuamgbole ne mɔ azo na bɛhɔdɛnla bodane zo,
Na bɛyɛ kɛ abubule mɔɔ ɔnwo ye sane wɔ bodane tokule nloa la.’”
29 “Yɛde Mowabe adubɛnwo ne—ɔle anwomemaazo kpalɛ—
Ɔmemaa ɔ nwo zo, ɔtu ɔ nwo, ɔmbu debie yɛɛ ɔtu ɔ nloa anu.”+
30 “‘Meze ɛya mɔɔ yeva la,’ Gyihova a se a,
‘Noko ɔ nloa anu ɛdulɛ ne bayɛ mgbane.
Bɛnrɛhola ɛhwee biala yɛ.
31 Ɛhye ati a mebaye Mowabe anwo awolɛ la,
Mebazu Mowabema amuala
Na meali mrenyia mɔɔ wɔ Kɛɛ-hilɛze la anwo nyane.+
Wɔ nya* ngɛnlɛma ne ɛpɛ nyevile.
Bɛpɛ nyevile bɛhɔdwu Gyeezɛ, nehane a bɛhɔdwu a.
Kpɔvolɛ ne ɛzɛkye+
Wɔ wawaa nu bakama nee wɔ vanye ma mɔɔ wɔde la.
33 Bɛye fɛlɛkolilɛ nee anyelielɛ bɛvi tola ne anu
Nee Mowabe azɛlɛ zo.+
Memaa nwanye ɛgyakyi ɛhwinlɛ wɔ nwanye ɛhwihwinlɛ kuma ne anu.
Awie biala ɛnrɛva anyelielɛ ɛnrɛdeɛdea nu ɛnrɛhwihwi vanye ma.
Bɛbadeɛdea nuhua ɛdeɛ, noko ɔnrɛyɛ anyelielɛ ɛdeɛdeanlɛ.’”+
34 “‘Ɛzunlɛ bie bahɔ zo avi Hɛhyebɔn+ ahɔdwu Ɛleyela.+
Nzule mɔɔ wɔ Nemelem bɔbɔ la basesa.+
35 Mebamaa bɛagyakyi ɛhye mɔ ɛyɛlɛ wɔ Mowabe,’ Gyihova a se a,
‘Afɔle mɔɔ bɛbɔ ye wɔ ɛzonlenlɛ ɛleka* ne
Nee afɔle mɔɔ bɛbɔ bɛmaa bɛ nyamenle ne mɔ la.
36 Ɛhye ati a me ahonle balielie* kɛ fulutu* amaa Mowabe la,+
Yɛɛ me ahonle balielie* kɛ fulutu* amaa Kɛɛ-hilɛze mrenyia la.
Ɔluakɛ anwonyia mɔɔ yenyia la baminli.
37 Awie biala ati zo ɛkpa,+
Yɛɛ bɛkpa awie biala akɛsa.
38 “‘Alɔbɔlɛ ɛzunlɛ bahɔ zo
Wɔ Mowabe azua kɔsɔɔti ati zo,
Nee ye gua ne mɔ kɔsɔɔti azo.
Ɔluakɛ mebɔ Mowabe
Kɛ buakɛ mɔɔ bɛvuandi ye bɛdo ye lɔ la,’ Gyihova a se a.
39 ‘Bɛnlea kɛzi ɛzulolɛ ɛha ye a! Bɛzu alɔbɔlɛ ɛzunlɛ!
Bɛnlea kɛzi Mowabe ɛva nyiane ɛzia ɔ nzi a!
Mowabe ɛhakyi agolobɛnwo debie,
Yehakyi debie mɔɔ ka maanle maanle mɔɔ zuozua ye la kɔsɔɔti ɛzulolɛ a.’”
40 “Ɔluakɛ mɔɔ Gyihova ɛha la ɛne:
‘Bɛnlea! Kɛ mɔɔ kɔleɛ tu ba nane nwo zo la,+
Zɔhane ala a awie badɛlɛ ɔ ndɛba anu adu ara Mowabe anwo zo a.+
41 Bɛbaho bɛava azuamgbole ne mɔ,
Na bɛaza ye bɛalie ye aranemgbole ne mɔ.
Wɔ kenle zɔhane, Mowabe ɛlɔnema ahonle
Bayɛ kɛ raalɛ mɔɔ ɛlɛwo la ahonle.’”
43 O Mowabema, ɛzulolɛ, kuma yɛɛ ɛhane
Ɛlɛkendɛ bɛ,’ Gyihova a se a.
44 ‘Awie biala mɔɔ banriandi ɛzulolɛ ne la badɔ kuma ne anu,
Na awie biala mɔɔ ɔbavi kuma ne anu yeavinde la badɔ ɛhane ne anu.’
‘Ɔluakɛ ɛvolɛ ne mɔɔ mebava meahwe Mowabe anzo la badwu,’ Gyihova a se a.
45 ‘Bɛdabɛ mɔɔ bɛlɛnriandi la kɔgyinla Hɛhyebɔn alubo nu mɔɔ bɛngola ɛhwee biala yɛ a.
Ɔluakɛ senle vi Hɛhyebɔn bara
Na sendɔlɔra vi Saehɔn ara.+
Ɔbayela Mowabe anwoma zo
Nee ɔ mra mrenyia mɔɔ ɛyɛ basabasa la ati kanrɛlɛ ne.’+
46 ‘O Mowabe, gyakɔ!
Kimɔhye menli ne+ ɛminli.
Ɔluakɛ bɛva ɛ mra mrenyia bɛhɔ akɛlɛzonlenlɛ nu,
Yɛɛ bɛva ɛ mra mraalɛ noko bɛhɔ akɛlɛzonlenlɛ nu.+
47 Noko wɔ awieleɛ mekɛ ne anu, mebaboɔboa Mowabema mɔɔ wɔ akɛlɛzonlenlɛ nu la anloa,’ Gyihova a se a.
‘Mowabe ndɛnebualɛ ne awieleɛ ɛne.’”+