Ayezaya
62 Zayɔn ati, menrɛyɛ koonwu,+
Yɛɛ Gyɛlusalɛm ati, menrɛdɛnla ɛkɛ ne koonwu
Kɔkpula kɛ ye tenleneyɛlɛ ne kɛda kɛ wienyi kpole+
Na ye ngoanelielɛ kɛzɔ kɛ tɛkɛ la.+
2 “O Raalɛ ye, maanle maanle ne mɔ banwu wɔ tenleneyɛlɛ ne,+
Na arelemgbunli kɔsɔɔti anwu wɔ anyunlunyia ne.+
Na bɛbava duma fofolɛ+
Mɔɔ bavi Gyihova mumua ne anloa anu la bɛavɛlɛ wɔ.
3 Ɛbayɛ abotile kɛnlɛma wɔ Gyihova asa anu,
Belemgbunli abotile wɔ wɔ Nyamenle ne asa akunlu.
Emomu, bɛbavɛlɛ wɔ Me Anyelielɛ Wɔ Ye Nu,+
Na bɛavɛlɛ wɔ azɛlɛ ne Agyalɛ Raalɛ.
Ɔluakɛ Gyihova anye balie ɛ nwo,
Na wɔ azɛlɛ ne ayɛ kɛ raalɛ mɔɔ bɛgya ye.
5 Kɛ mɔɔ kpavolɛ gya bɛlɛra mɔɔ ɛnze nrenyia la,
Zɔhane ala a ɛ mra bagya wɔ a.
Yɛɛ kɛ mɔɔ atɔfolɛ nrenyia di fɛlɛko wɔ atɔfolɛ raalɛ nwo la,
Zɔhane ala a wɔ Nyamenle ne bali ɛ nwo fɛlɛko a.+
6 O Gyɛlusalɛm, meva sinzavolɛma mezie wɔ bane ne mɔ azo.
Alehyenlɛ nee aledwolɛ muala, bɛnrɛyɛ koonwu.
Bɛmɛ mɔɔ bɛbɔ Gyihova duma la,
Bɛmmadie bɛ menle,
7 Yɛɛ bɛmmamaa ɔtɛnla ɛkɛ koonwu kɔkpula kɛ ɔkɛva Gyɛlusalɛm ɔkɛzie ɛkɛ kpundii,
Ɛhɛe, kɔkpula kɛ ɔkɛmaa bɛkɛye ye ayɛlɛ wɔ azɛlɛ ye azo la.”+
8 Gyihova ɛva ɔ sa fema ne, ɔ sa ɛsesebɛ ne ɛha ndane kɛ:
“Menrɛva wɔ ma menrɛmaa wɔ kpɔvolɛma ɛnrɛli bieko,
Yɛɛ nyɛvolɛ ɛnrɛnlo wɔ nwanye fofolɛ mɔɔ wɔvɛ nwolɛ la bieko.+
9 Bɛdabɛ mɔɔ bɛboɔboa ma ne anloa la bali na bɛaye Gyihova ayɛlɛ;
Yɛɛ bɛdabɛ mɔɔ bɛtwihwi nwanye ne la a banlo ye wɔ me alienwo nwuanzanwuanza ɛkɛ ne a.”+
10 Bɛwolo, bɛwolo nlenkɛ mgbole ne mɔ anu.
Bɛziezie adenle ne bɛmaa menli ne.+
Bɛdu adenle, bɛdu ademgbole ne.
Bɛyeye zolɛ awolɛ ne mɔ.+
Bɛva sɛkɛlɛneɛ bɛzie ɛkɛ bɛmaa menli ne.+
11 Nea! Gyihova ɛbɔ ye nolo wɔ azɛlɛ ne ɛleka biala kɛ:
“Bɛha bɛhile Zayɔn ara raalɛ ne kɛ,
‘Nea! Wɔ ngoanelielɛ ɛlɛba.+
Nea! Ye ahatualɛ wɔ ɔ nwo ɛkɛ,
Yɛɛ ye kakɛdualɛ ne la ɔ nyunlu.’”+