Edwɛkɛsisilɛ Mɔɔ Limoa

9 Bɛdianle Yizilayɛma kɔsɔɔti abusua abusua, na bɛhɛlɛle bɛ aluma wɔ Yizilayɛ Arelemgbunli Buluku ne anu. Na bɛvale Dwuda bɛhɔle akɛlɛzonlenlɛ nu wɔ Babelɔn ɔluakɛ yeanli nɔhalɛ.+ 2 Bɛdabɛ mɔɔ bɛlimoale bɛziale bɛrale bɛ azɛlɛ zo wɔ bɛ azuamgbole ne mɔ azo la a le Yizilayɛma bie mɔ, ɛsɔfoma, Livaema yɛɛ ɛzonlenlɛsua ne anu sonvolɛma.*+ 3 Na Dwuda abozoamra,+ Bɛngyaman abozoamra,+ Yifelaem abozoamra yɛɛ Manasɛ abozoamra bie mɔ hɔdɛnlanle Gyɛlusalɛm: 4 Yutae mɔɔ le Amehɛde ara Ɔmelae ara Yemelae ara Beenae ara, ɔvi Dwuda ara Pilɛze+ abozoamra ne mɔ anu. 5 Na wɔ Hyila abozoamra ne mɔ anu, Asaya mɔɔ le ye belamunli ralɛ la nee ɔ mra ne mɔ. 6 Na wɔ Zila+ amra ne mɔ anu, Gyɛyuwɛle nee bɛ mediema ne mɔ 690.

7 Na wɔ Bɛngyaman abozoamra ne mɔ anu, Salu mɔɔ le Mɛhyɛlam ara Hodavaya ara Hasɛnua ara, 8 Gyɛloham ara Yebenaya, Mekelae ara Ɛzae ara Yilaa yɛɛ Yebenaegya ara Riliwɛle ara Hyɛfataya ara Mɛhyɛlam. 9 Na bɛ mediema mɔɔ bɛvi bɛ abusua ne anu la le 956. Menli ɛhye mɔ amuala le mbusua mgbanyinli.*

10 Na wɔ ɛsɔfo ne mɔ anu, Gyedeeya, Gyɛhɔyalebe, Gyeeken,+ 11 Azalaya mɔɔ le Helekaya ara Mɛhyɛlam ara Zeedɔko ara Mɛlayɔto ara Ahaetɛbe ara, ɔle adekilevolɛ wɔ nɔhalɛ Nyamenle ne sua* nu ɛkɛ, 12 Adaya mɔɔ le Gyɛloham ara Pahyɛ ara Malekaegya ara, Meeyasae mɔɔ le Adeɛle ara Gyazɛla ara Mɛhyɛlam ara Mɛhyelɛmete ara Yemɛ ara 13 nee bɛ mediema mrenyia ne mɔ, bɛle mbusua mgbanyima, mrenyia mɔɔ fɛta mɔɔ bɛ nwo yɛ se la 1,760 wɔ ɛkɛ mɔɔ bɛyɛ gyima wɔ nɔhalɛ Nyamenle ne sua ne anu a.

14 Na wɔ Livaema ne mɔ anu, Hyɛmaya+ mɔɔ le Hahyɛbe ara Azelaekam ara Hahyabaya ara la, ɔvi Mɛlɛlae abozoamra ne mɔ anu; 15 nee Bakebakaa, Hilɛhye, Geelale, Matanaya mɔɔ le Mayeka ara Zekelae ara Esafe ara, 16 Obadaya mɔɔ le Hyɛmaya ara Geelale ara Gyɛdutɛn ara yɛɛ Bɛlikaya mɔɔ le Esa ara Ɛlekeena ara, ɔdɛnlanle ɛleka mɔɔ Nɛtofama+ ne dɛnlanle la.

17 Nlenkɛ mgbole sinzavolɛma+ ne a le Hyalɛm, Akɛbe, Talemɔn, Ahaeman, na bɛ diema Hyalɛm a lile bɛ ti a, 18 na ɔkadwu mekɛ zɔhane la ɛnee ɔwɔ belemgbunli anlenkɛ kpole ne anloa wɔ aduduleɛ afoa nu.+ Ɛhye mɔ a le nlenkɛ mgbole sinzavolɛma wɔ Livaema azokoɛleɛ ne a. 19 Na Hyalɛm mɔɔ le Kola ara Yibayasafe ara Kɔla ara la, nee ɔ mediema mɔɔ bɛvi ye abusua nu, Kɔlama ne a nleanle ɛzonlenlɛ gyima ne, ɛdanlɛsua ne nlenkɛ sinzavolɛma ne anwo zo a, yɛɛ bɛ papa mɔ a nleanle Gyihova azokoɛleɛ ne azo kɛ nlenkɛ sinzavolɛma a. 20 Fenɛhaze+ mɔɔ le Ɛlieza+ ara la a ɛnee le bɛ adekilevolɛ wɔ tete ne a; ɛnee Gyihova nee ye lua. 21 Zɛkalaya+ mɔɔ le Mɛhyɛlɛmaya ara la a ɛnee le nyianu ɛdanlɛsua ne anlenkɛ kpole ne sinzavolɛ a.

22 Bɛdabɛ mɔɔ bɛkpale bɛ kɛ bɛdɛnla anuhɔlɛ ne na bɛzinza nlenkɛ mgbole ne mɔ la dodo le 212. Ɛnee bɛde bɛ ɛleka ne mɔ kɛ mɔɔ bɛ abusua kɛlɛtokɛ ne de la.+ Devidi nee ɛnyelɛzodeɛnwunlɛnli+ Samoɛle bule bɛ nɔhavoma na bɛvale bɛ bɛzieziele gyima ne mɔ anloa. 23 Bɛ nee bɛ mra a ɛnee nea Gyihova sua ne, ɛdanlɛsua ne nlenkɛ mgbole ɛzinzalɛ gyima ne azo a.+ 24 Ɛnee nlenkɛ mgbole sinzavolɛma ne mɔ wɔ ye tɛbanu nna ne mɔ—aduduleɛ, adɔleɛ, sɔlɔ yɛɛ nyiakɛ.+ 25 Ɔvi mekɛ mɔɔ kɔ mekɛ la, bɛ mediema ne mɔ fi ɛleka mɔɔ bɛdede la bɛbadi kenle nsuu wɔ bɛ nwo ɛkɛ na bɛ nee bɛ bɔ nu yɛ gyima. 26 Ɛnee nlenkɛ mgbole sinzavolɛ nɔhavoma nna le mgbanyinli* wɔ ɛkɛ. Bɛle Livaema, na ɛnee bɛnea ekpumgbunli* ne mɔ nee nɔhalɛ Nyamenle ne sua ne anu ninyɛnezielɛ ɛleka ne mɔ azo.+ 27 Bɛgyinla nɔhalɛ Nyamenle ne sua ne anwo amuala bɛsinza nɔɔzo biala, ɔluakɛ bɛyɛle sinzavolɛ gyima na bɛnleanle sanvɛ ne mɔ azo yɛɛ bɛbukebukɛle sua ne nlenkɛ mgbole ne mɔ nwonlomɔ biala.

28 Ɛnee bie mɔ nea ahyɛnze+ mɔɔ bɛfa bɛyɛ ɛzonlenlɛ gyima ne la azo; saa bɛlɛfa bɛara a bɛtia yɛɛ saa bɛlɛfa bɛahɔ a bɛtia. 29 Bɛmaanle bie mɔ noko nleanle ahyɛnze ne mɔ, ahyɛnze nwuanzanwuanza ne mɔ+ kɔsɔɔti nee esamo motoo ne,+ nwanye ne,+ nwole ne,+ ɛyɛlɛvuanlɛ ne+ yɛɛ balesam nwole ne+ azo. 30 Ɛsɔfoma ne amra ne mɔ bie mɔ fonlɔfonlanle balesam nwole evuanlɛ ne. 31 Na Livaenli Matetaya mɔɔ le Kɔlanli Hyalɛm belamunli ralɛ la a le nɔhavo mɔɔ nea ninyɛne mɔɔ bɛto ye ahyɛnze nu+ la azo a. 32 Bɛ mediema ne mɔ bie mɔɔ bɛle Kohatema la a nea paano ne mɔɔ bɛgua ye ekpunli ekpunli*+ la azo a, amaa bɛado ye ɛnwomenlelielɛ kenle biala.+

33 Ɛnee ɛhye mɔ le edwɛndolɛma, mbusua mgbanyinli wɔ Livaema ekpumgbunli* ne mɔ anu, bɛdabɛ mɔɔ bɛammaa bɛanyɛ gyima gyɛne biala la; ɔluakɛ ɛnee ɔwɔ kɛ bɛyɛ gyima alehyenlɛ nee aledwolɛ biala. 34 Ɛnee menli ɛhye mɔ a le Livaema mbusua mgbanyinli, menli titili wɔ bɛ mbusua ne mɔ anu a. Menli ɛhye mɔ dɛnlanle Gyɛlusalɛm.

35 Gebɛyɔn papa Gyiyayɛle dɛnlanle Gebɛyɔn.+ Bɛfɛlɛ ɔ ye Meeyaka. 36 Na ɛnee ye belamunli ralɛ nrenyia a le Abedɔn, bɛdabɛ mɔɔ bɛdoa ye la a le Zɛɛle, Kehye, Beeyale, Nɛɛ, Needabe, 37 Gidɔ, Ahayo, Zɛkalaya yɛɛ Mekelɔto. 38 Mekelɔto wole Hyemeam. Na bɛ muala bɛ nee bɛ mediema mɔɔ ɛha la dɛnlanle bɛ mediema ne mɔ anwo ɛkɛ wɔ Gyɛlusalɛm. 39 Nɛɛ+ wole Kehye; Kehye wole Sɔɔlo;+ Sɔɔlo wole Dwɔnatan,+ Malekae-hyua,+ Abenadabe+ yɛɛ Ɛhyebeeyale. 40 Na Dwɔnatan ara a le Mɛle-beeyale.+ Mɛle-beeyale wole Maeka.+ 41 Na Maeka amra a le Paetɔn, Mɛlɛke, Taalea yɛɛ Ehaze. 42 Ehaze wole Gyela; Gyela wole Alɛmɛte, Azemeevɛte yɛɛ Zemelae. Zemelae wole Moza. 43 Moza wole Binɛya nee Relɛfaya, na ɔ ra a le Ɛliesa, na ɔ ra a le Ezɛle. 44 Ezɛle wole mralɛ nsia, na bɛ aluma a le Azelaekam, Bokɛlu, Yehyemɛle, Hyialaya, Obadaya yɛɛ Heenan. Bɛ muala bɛle Ezɛle amra.