Edwɛkɛsisilɛ Mɔɔ Limoa
10 Ɛnee Filisitiama nee Yizilayɛma ɛlɛko. Na Yizilayɛma nriandile vile Filisitiama anyunlu, yɛɛ bɛ nuhua dɔɔnwo wule guale Gelebowa Boka ne azo.+ 2 Filisitiama voanle Sɔɔlo nee ɔ mra ne mɔ ndinlizo na bɛbikyele bɛ kpalɛ, na Filisitiama ne hunle Dwɔnatan, Abenadabe yɛɛ Malekae-hyua,+ Sɔɔlo amra ne mɔ. 3 Konle ne anu yɛle se kpalɛ maanle Sɔɔlo, na ɛdatovoma ne nwunle ye na bɛbodale ye.+ 4 Akee Sɔɔlo zele ye sonvolɛ ne mɔɔ soa ye konle ninyɛne ne la kɛ: “Twe wɔ konle dadeɛ ne fa wɔ me, amaa menli ɛhye mɔ mɔɔ bɛtɛpɛle bɛ mrenyiazo la ambanyɛ me amumuyɛ.”*+ Noko ɛnee sonvolɛ ne ɛngulo kɛ ɔkɛyɛ, ɔluakɛ ye ahonle dule kpole. Yemɔti Sɔɔlo vale konle dadeɛ ne na ɔdɔle zolɛ.+ 5 Mɔɔ ahenle mɔɔ soa Sɔɔlo konle ninyɛne ne la nwunle kɛ yewu la, ɔdaye noko ɔdɔle ye konle dadeɛ ne azo na ɔwule. 6 Ɔti Sɔɔlo nee ɔ mra nsa ne wule, na ye sua nu amra kɔsɔɔti bɔle nu wule.+ 7 Mekɛ mɔɔ Yizilayɛma mɔɔ de bɔnza* ne anu la nwunle kɛ awie biala ɛnriandi na Sɔɔlo nee ɔ mra mrenyia ne mɔ ɛwu la, bɛvi bɛ azuamgbole ne mɔ azo bɛnriandile bɛhɔle; akee Filisitiama ne mɔ rale na bɛradɛnlanle zolɛ.
8 Aleɛ hyenle mɔɔ Filisitiama ne rale kɛ bɛbayeye avunli ne mɔ anwo ninyɛne la, bɛnwunle kɛ Sɔɔlo nee ɔ mra ne mɔ ɛwu ɛgua Gelebowa Boka ne azo.+ 9 Ɔti bɛyeyele ɔ nwo ninyɛne na bɛpɛle ɔ ti na bɛvale ye konle tɛladeɛ ne, akee bɛvale nrɛlaleɛ bɛhɔle Filisitia azɛlɛ ne amuala azo kɛ bɛhɔbɔ bɛ ananze ne mɔ+ nee menli ne amaneɛ. 10 Akee bɛvale ye konle tɛladeɛ ne bɛguale bɛ nyamenle ne sua* ne anu na bɛvale ɔ ti kanrɛlɛ ne bɛhendale Deegɔn sua ne anu.+
11 Mekɛ mɔɔ bɛdabɛ mɔɔ bɛde Gyeebɛhye+ mɔɔ wɔ Geleade la kɔsɔɔti dele mɔɔ Filisitiama ɛva ɛyɛ Sɔɔlo la amuala la,+ 12 kovolɛma ne kɔsɔɔti dwazole na bɛhɔvale Sɔɔlo funli ne nee ɔ mra ne mɔ avunli ne. Bɛvale bɛ bɛrale Gyeebɛhye na bɛziele bɛ mbowule ne wɔ baka kpole bie mɔɔ wɔ Gyeebɛhye+ la abo, na bɛhyele ɛhɔne kenle nsuu.
13 Ɔti Sɔɔlo wule ɔluakɛ yeanli nɔhalɛ yeammaa Gyihova, yeandie Gyihova edwɛkɛ+ eza ɔhɔle abisadeɛ wɔ awie mɔɔ tendɛ sunsum ɛtane nloa azo la ɛkɛ+ 14 na yeamkpondɛ Gyihova. Ɔti Ɔhunle ye na ɔliele belemgbunlililɛ ne ɔmaanle Gyɛsi ara Devidi.+