Nikimanyisa ki Okuba Omukristaayo?—Baibuli Neegamba Ki?

Obunaku obu abantu baingi omu nsi yoona nibashemererwa kweyeta Abakristaayo; kwonka, nibakora ebintu ebirikureetera abandi obusaasi. Abamwe nibeeyendeza, tibarikugamba amazima, kandi tibaine mbabazi. Abandi tibari beesigwa aha bu bari nabo omu bushwere. Emitwarize yaabo neereetera bamwe kwebuuza bati: Nikimanyisa ki buzima okuba Omukristaayo?’

Eki kirikumanyisa okuba Omukristaayo

Kyorobi omuntu kugira ngu n’Omukristaayo. Kwonka ekyo tikirikumara. Kurugiirira ahari Baibuli, Omukristaayo n’omukuratsi wa Yesu Kristo. (Ebyakozirwe 11:26) Yesu akagira ati: “Ku muraahamire aha kigambo kyangye, nimuba muri abeegi bangye buzima.” (Yohaana 8:31) N’amazima, tihariho n’omwe orikubaasa kworobera gye ebiragiro bya Yesu byona. Kwonka Abakristaayo nibateeraho kukuratira enyegyesa za Yesu kandi nibooreka ekyo omu bi barikukora buri izooba. Yetegyereze eby’okureeberaho ebi.

Abakristaayo nibooreka rukundo etarikweyendeza

Eki Yesu yaagambire: “Nimbaha ekiragiro kisya nti: Mukundane, nk’oku naabakunzire, naimwe mube nikwo mwakundana. Ku muriguma nimukundana, nibwo abantu boona baribamanya ku muri abeegi bangye.”—Yohaana 13:34, 35.

Eki Yesu yaakozire: Yesu akooreka abantu boona rukundo etarikweyendeza, atarikufayo aha sente ezi baine, ebitiinisa byabo nari ahu barikuruga. Akakiza abarwaire, yaariisa abaine enjara kandi yaahayo n’amagara ge ahabw’abandi.—Matayo 14:14-21; 20:28.

Oku Abakristaayo barikutwaza: Abakristaayo nibooreka rukundo etarikweyendeza barikuba efura, batarikushoroora kandi barikusaasira abandi. Nibahwera abaine eki bakyenire kandi nibaba beeteekateekire kwefeerereza ahabw’abandi.—1 Yohaana 3:16.

Abakristaayo n’ab’amazima

Eki Yesu yaagambire: ‘Niinye . . . mazima.’—Yohaana 14:6.

Eki Yesu yaakozire: Yesu akaba ari ow’amazima omuri byona ebi yaabaire naagamba n’ebi yaabaire naakora. Akaba atarikubeihabeiha abandi nari kubahabisa omu bigambo bye. Akaba naamanywa ahabw’okuba ow’amazima n’obu ekyo kyabaire kigwisa kubi baingi.—Matayo 22:16; 26:63-67.

Oku Abakristaayo barikutwaza: Abakristaayo tibarikubeiha. Nibashashura emishoro, tibarikwiba, nibakora n’amaani aha mirimo yaabo kandi nibamara aha mirimo obwire obu bashemereire kumaraho. (Abarooma 13:5-7; Abaefeso 4:28) Tibarikwiba abandi, tibarikukopa bigyezo, kandi tibarikugamba ebishuba baaba nibaijuza ebihandiiko by’okushabiraho emirimo.—Abaheburaayo 13:18.

Abakristaayo nibatwaza omu muringo gw’embabazi

Eki Yesu yaagambire: ‘Imwe mwena abaruhire n’abaremereirwe, mwije ahariinye, mbaruhuure. Mwekorere omugamba gwangye, muunyegyereho, ahabw’okuba nintwaza gye, kandi ndi omucureezi omu mutima, naimwe nimwija kutunga okuhuumura omu mitima yaanyu, ahakuba omugamba gwangye tigurikuremeera, n’omutwaro gwangye gwanguhi.’—Matayo 11:28-30.

Eki Yesu yaakozire: Yesu akaba aine embabazi kandi arikwakiira boona. Akaba naayakiira abaana, ahuumuriza abaine amaganya kandi atwariza abandi omu muringo gw’ekitiinisa.—Mako 10:13-15; Luka 9:11.

Oku Abakristaayo barikutwaza: Abakristaayo nibagamba n’abandi omu muringo gw’embabazi; tibarikugamba kubi nari kujuma abandi. (Abaefeso 4:29, 31, 32) Nibafayo aha bandi kandi nibasherura oburyo bw’okubahwera.—Abagalatia 6:10.

Abakristaayo nibahamira aha bu bari nabo omu bushwere

Eki Yesu yaagambire: “Eki Ruhanga yaateeraine hamwe, omuntu atarikitaanisa.”—Mako 10:9.

Eki Yesu yaakozire: N’obu Yesu araabe ataragiire mu bushwere, akahiga abari omu bushwere kuhamira aha bakundwa baabo. (Matayo 19:9) Akarabura aha bikorwa ebirikubaasa kushenya obushwere.—Matayo 5:28.

Oku Abakristaayo barikutwaza: Abakristaayo nibeetantara ebikorwa ebirikubaasa kushiisha obushwere bwabo. (Abaheburaayo 13:4) Abashweraine nibatwarizana omu muringo gwa rukundo n’ekitiinisa.—Abaefeso 5:28, 33.