Niki Ekirikwija Kuhika aha Diini?—Eki Baibuli erikugamba
Otamirwe ediini kandi obundi noozireeba nk’ekirikunungwa? N’obu ediini eraabe ehweraire abantu omu bicweka bitari bimwe, ereetsireho oburemeezi bwingi. Ekitabo Encyclopedia of Religion and War nikigira kiti: “Entaro ezirikukirayo obubi omu byafaayo zikareetwaho emiteekateekyere y’ediini.” Abeebembezi b’amadiini nibakira kukoresa ediini kwenegyeza eby’obutegyeki omu mwanya g’okushagika okuramya. Kandi abandi nibashwekyerera ebihagaro by’obushambani n’obushuma.
Ku oraabe otamirwe ediini, noobaasa kuba nooyebuuza oku Ruhanga arikwehurira ahabw’ediini. Baibuli neeyoreka ngu Ruhanga naayanga amadiini agarikukira obwingi ahabw’ebi barikukora. Kandi erimu obunabi oburikworeka eki arikwija kukorera amadiini ago. Baibuli neegamba omuringo gw’akamanyiso ngu juba Ruhanga naija kugira eki yaakorera amadiini ag’omu nsi yoona ekitakabahonga.
Baibuli neegamba ki aha kiraahike aha madiini omu biro by’omumaisho?
Obunabi: Ekitabo ky’Okushuuruurwa nikigamba ahari maraaya orikwetwa Babulooni Orukuru. Maraaya ogwo ashutami aha nyamaishwa erikutukura. Kwonka bwanyima, enyamaishwa neeyehindukana maraaya ogwo emwita.—Okushuuruurwa 17:3, 5, 16.
Amakuru: Maraaya, Babulooni Orukuru, nirujwekyera amadiini goona ag’ebishuba agarikwanga Ruhanga.a Enyamaishwa erikutukura neejwekyera Amahanga Ageeteeraine (UN).b Maraaya ogwo okushutama aha nyamaishwa erikutukura nikyoreka ngu ediini z’ebishuba niziteeraho kutaahataaha omu nshonga z’eby’obutegyeki. Enyamaishwa okwita maraaya nikyoreka ngu UN n’amahanga agarikugishagika nigaija kwehindukana ediini zoona ez’ebishuba ez’omu nsi kandi gazicwekyerereze kimwe.
Ediini z’ekishuba niziija kucwekyerezibwa zita?
Obunabi: ‘Amahembe ikumi agu waareeba hamwe n’enyamaishwa nibaija kwanga maraaya ogwo atsigare wenka ajwaire busha . . . bamwokyeze kimwe n’omuriro. Ruhanga akakita omu mitima yaabo [omu mitima y’abagabe b’ensi] ngu bahikiirize enaama ye, ahabw’okugira omutima gumwe okuha enyamaishwa egyo obushoboorozi bw’okutegyeka obugabe bwabo . . . ebibonaboneso ebyo nibiija kurugwaho omu izooba rimwe, rufu n’amaganya n’enjara, rwokibwe n’omuriro, ahabw’okuba [Yehova]c Ruhanga orikugicwera orubanja n’ow’amaani.’—Okushuuruurwa 17:16, 17; 18:8.
Amakuru: Ruhanga naija kuta ekiteekateeko kye omu mitima y’amahanga. Naija kugareetera kuha obugabe bwabo n’amaani gaabo ekibiina ky’Amahanga Ageeteeraine. Bwanyima, ekibiina ekyo nikiija kucwekyereza amadiini g’ebishuba omu nsi yoona. Ebyo byona nibiija kuba nk’ebyabaho ahonaaho “omu izooba rimwe” kitaraariire.—Okushuuruurwa 18:21.
Ahabw’enki ediini z’ebishuba ziine kucwekyerezibwa?
Obunabi: “Ebibi byarwo bituumire byahika ahaiguru munonga, kandi Ruhanga aijukire eby’okushiisha byarwo.”—Okushuuruurwa 18:5.
Amakuru: Amadiini g’ebishuba gakozire ebintu ebirikunugwa Ruhanga kumara emyaka mingi. Yetegyereze bimwe aha “bibi” ebireetaire Ruhanga kugacwera orubanja:
Okwejumba omu by’obutegyeki. Yesu Kristo akeegyesa abakuratsi be kuteejumba omu by’obutegyeki kureka bate amatsiko gaabo omu Bukama bwa Ruhanga niyo gavumenti ey’omu iguru eraije kwihaho gavumenti z’abantu.d (Danieli 2:44; Matayo 6:9, 10; Yohaana 6:15; 18:36) Kwonka amadiini g’ebishuba gakozire erikuhikaana n’ekigyendererwa kya Ruhanga. Ahabw’okugira ngu nigeejumbira kimwe omu nshonga z’eby’obutegyeki omu mwanya gw’okuhamira ahari Ruhanga, obunabi oburi omu Okushuuruurwa amadiini ago kihikire kugeeta “maraaya omukuru” ahabw’okwejumba omu by’obushambani.—Okushuuruurwa 17:1, 2; Yakobo 4:4.
Obutabanguko. Amadiini g’ebishuba nigagambwaho ngu eshagama ya ‘boona abaitsirwe omu nsi ekashangwa omurizo.’ (Okushuuruurwa 18:24) Amadiini maingi garemirwe kwegyesa abakuratsi baazo kuba ab’obusingye kandi nigashagika entaro n’ebikorwa by’obuzahambuki.
Omururu. Amadiini g’ebishuba garengyesereize omu kujarama. (Okushuuruurwa 17:4; 18:7) Amadiini maingi gaakoreise obushoboorozi bwago n’okurangaanwa kubaasa kurundaana eby’obugaiga oburengyesereize. Omururu ogwo tigurikushemeza Ruhanga.—Tito 1:7.
Ebishuba. Amadiini g’ebishuba nigenegyeza enyegyesa n’ebikorwa ebirikutaana n’amazima agari omu Baibuli.e Ahabw’okugira ngu ediini z’ebishuba nizo bukomooko bw’enyegyesa n’ebikorwa ebirikuhabisa abantu kandi ebitarikuhaisa Ruhanga ekitiinisa nizeetwa “nyina wa baamaraaya n’ebihagaro by’ensi.”—Okushuuruurwa 17:5; 18:23.
Mbwenu shi amadiini g’ebishuba goona nigaija kucwekyerezibwa?
Ngaaha. Ahakuba ekitabo ky’Okushuuruurwa nikigamba aha bantu baingi kuruga omu mahanga gatari gamwe abarikwetwa “omutwe muhango.” (Okushuuruurwa 7:9) Baibuli neegira ngu abantu abo “bajwaire ebijwaro birikwera” ekirikumanyisa ngu nibaramya Ruhanga omu bwesigwa barikukuratira emitindo ye. Abantu abo nibaija kuhonokaho aha kubonabona kwingi, obwire obu Baibuli erikugira ngu amadiini g’ebishuba n’abazigu ba Ruhanga boona baraacwekyerezibwe. (Okushuuruurwa 7:13, 14; 19:11, 19-21) Omutwe muhango ogwo ogw’abantu abajwaire ebirikwera bari omu diini y’amazima eraije kugumaho ebiro byona.f
Omutwe muhango gw’abantu abarikuramya Ruhanga omu mazima nibaija kuhonokaho amadiini g’ebishuba ku garaacwekyerezibwe
Okucwekyerezibwa kw’ediini z’ebishuba nikukukwataho kuta?
Noobaasa kugira obusingye waamanya ngu Ruhanga tarikusiima ebintu bibi ebi amadiini garikukora. Noobaasa kugirira ekihika ebiro by’omumaisho, obu Ruhanga araacwekyereze amadiini goona ag’ebishuba agatarikumuhaisa ekitiinisa kandi agarikureetera abantu obusaasi.
Noobaasa n’okugira obwesigye ngu nikibaasika kuramya Ruhanga omu muringo ogurikumushemeza. Baibuli neegira ngu ‘abaramya ab’amazima nibaija kuramya Isheboona omu mwoyo n’omu mazima, ahakuba Isheboona asherura abari nk’abo kumuramya.’ (Yohaana 4:23) Naabagira ati: “Mururugyemu [Babulooni Orukuru] imwe bantu bangye ‘mwe, mutakaakwatanisa narwo omu bibi byarwo, mukaheebwa ekifubiro ky’ebirikwija kurubonabonesa.” (Okushuuruurwa 18:4, 5) Eego, Ruhanga naayeta abantu kumuramya omu mazima. (1 Timoseo 2:3, 4) Naaraganisa abarikwikiriza okweta okwo ngu nibaija kutunga amagara agatahwaho.—1 Yohaana 2:17.
a Kubaasa kwega aha nshonga ina ezirikutuhwera kumanya Babulooni Orukuru, shoma ekicweka “Babulooni Orukuru Niki?”
b Kubaasa kumanya enshonga mukaaga eziraakuhwere kumanya enyamaishwa, shoma ekicweka “What Is the Scarlet-Colored Beast of Revelation Chapter 17?”
c Yehova n’eiziina rya Ruhanga. (Zaaburi 83:18) Reeba ekicweka “Yehova n’Oha?”
d Kubaasa kumanya ebirikukiraho, reeba vidiyo Obukama bwa Ruhanga Niki?
e Kubaasa kureeba eby’okureeberaho, reeba akabokusi “Mbwenu shi amadiini g’Ekikristaayo goona nigatwarirwa omu Babulooni Orukuru?”
f Kubaasa kumanya oku Baibuli erikubaasa kukuhwera kumanya ediini y’amazima, shoma ekicweka “How Can I Find the True Religion?”