Obutumwa Kuruga omu Kigambo kya Ruhanga—Amatsiko g’Empungi!

Buri mwaka, abantu nyamwingi nibagyemwa kuhunga omu maka gaabo. Mbwenu shi naiwe ori omu mbeera nk’egyo? Kyaba nikwo kiri, gira obwesigye ngu toine kuraba omu mbeera egyo wenka—Ruhanga naatuha amatsiko ga nyentsya nungi, agu orikubaasa kwega omu Byahandiikirwe Ebirikwera.

Christos Stylianides omujwekyerwa wa European Uniona akagira ati: “Empungi hamwe n’abo abaihirwe omu maka gaabo nibeetenga obuhwezi bwaitu, kwonka nabwo nibenda . . . n’amatsiko g’omu biro by’omumaisho.”b Abantu abaine amatsiko nibaba baine enshonga nungi y’okuguma baine emiteekateekyere mirungi aha mbeera ei boorekyereire. Kwonka, oyihireho empungi kugira amatsiko, nibaba nibenda n’okuhuumurizibwa kugira ngu babaase kukira omu nyehurira.

“Obu naabaire nyine kuhunga kuruga omu ihanga ryangye nkatsigaho eka yangye, nkeehurira kubi kandi nkaba ntarikuteekateeka ngu nimbaasa kugumisiriza embeera egyo. Nkatiina munonga, naagira obusaasi n’amaganya.”—Emmanuel, Haiti.

Mbwenu shi naiwe nikwo orikwehurira? Ku oraabe oraahungireho okatsigaho eka yaawe, nooyetenga ahu orikubaasa kutunga okuhuumurizibwa n’amatsiko. Ekigambo kya Ruhanga, nikibaasa kukuhwera kita?

Okuhuumurizibwa kuruga omu Kigambo kya Ruhanga

Baibuli neegira eti: ‘Yehovac . . . naakunda omunyaihanga.’—Eky’Ebiragiro 10:17, 18.

Baibuli neegira eti: ‘[Yehova] ari haihi na boona abarikumutakira.’—Zaaburi 145:18.

Baibuli neegira eti: ‘Nikikabure Ruhanga okukora ebitahikire . . . Ow’obushoboorozi bwona tarikwita manja.’—Yobu 34:10, 12.

Eki nikimanyisa ngu Ruhanga tiwe arikukureetera kubonabona. Tariyo naakufubira kandi tariyo naakugyeza arikugumisa embeera yaawe.

Amatsiko kuruga omu Kigambo kya Ruhanga

Baibuli neeyoreka eki Ruhanga arikwija kutukorera omu biro by’omumaisho. Yetegyereze oku amatsiko aga gariyo nigahwera abahungire omu maka gaabo.

Baibuli neegira eti: ‘[Ruhanga] naija kuragaza amarira goona aha maisho gaabo, tiharibaho kufa bundi, n’obu kwakuba okucura nari okurira nari obusaasi.’—Okushuuruurwa 21:4.

Eki nikimanyisa ngu okubonabona nikwija kuhwaho. Ruhanga naaraganisa kwihaho oburemeezi bwona oburikureetera abantu kutagira amatsiko obunaku obu.

“Juba, Ruhanga naija kwihaho obutari buringaaniza n’ebintu bibi ebirikubaho. Amatsiko ago nigampwera kuguma ninteekateeka aha bwire obu okubonabona kwona kuraabe kutakiriho.”—Karla, El Salvador.

Baibuli neegira eti: ‘Ebya ira tibirikwija kwijukwa, n’obu kwakuba okuteebwaho omutima.’—Isaaya 65:17.

Eki nikimanyisa ngu titurikwija kuguma nitwijuka ebintu bibi ebi twarabiremu. Ruhanga naija kuhamya ngu ti waaguma nooteganisibwa ebiteekateeko bibi ahabw’ebintu bibi ebi waarabiremu enyima.

“Baibuli neeraganisa ngu titurikwija kwijuka na kakye obusaasi obu twarabiremu n’ebi twafeereirwe. Amatsiko nk’ago nigampwera kwemera embeera mbi ei ndimu hati ahakuba niimanya ngu juba buri kimwe nikiija kuhinduka.”—Natalia, Ukraine.

Baibuli neegira eti: “Ruhanga w’omu iguru naija kutaho obundi bugabe . . . oburaije kwatagura obwo bugabe bwona.”—Danieli 2:44.

Eki nikimanyisa ngu gavumenti ehikiriire ey’omu iguru neija kutegyeka ensi. Juba, Ruhanga naija kwihaho gavumenti z’abantu zoona ateho gavumenti ye erikutegyekyera omu iguru. Gavumenti egyo neija kureetaho obusingye obwabuzima, oburinzi, oburingaaniza kandi ereetere n’abantu boona kuba gye.—Miika 4:3, 4.

“Nintunga amaani ahabw’okumanya ngu oburemeezi nk’okubonabonesibwa, okushoroorwa, okuteekateekwaho kubi, n’okushoroorwa omu rangi n’ebya kaanya kakye—juba, Obukama bwa Yehova nibwija kwihiraho kimwe oburemeezi obu bwona.”—Mustafa, Middle East.

Obwengye kuruga omu kigambo kya Ruhanga

Obwengye bw’omu Baibuli nibubaasa kukuhwera waaba noogumisiriza ebi kuhikireho. Nibubaasa n’okuhwera kwemera embeera ei orimu hati, otwariiremu n’okufeerwa ebintu byawe. Yetegyereze oku emisingye egi eriyo neegasira empungi:

Baibuli neegira eti: “Amagara g’omuntu tigari mu bwingi bw’ebintu ebi aine.”—Luka 12:15.

Oku ebigambo ebi eby’obwengye birikubaasa kukuhwera kugumisiriza: Noobaasa kuba nooyehurira kubi kandi oine obusaasi ahabw’okufeerwa ebintu byawe. Kwonka waatwara akaire okateekateeka aha ku amagara gaawe gari ag’omuhendo, nikibaasa kukuhwera kugira emiteekateekyere eringaniire aha bintu ebi ofeereirwe.

“Amagara n’ag’omuhendo munonga okukira eby’obugaiga. Omu mbeera ezimwe, eby’obugaiga nari esente tibirikubaasa kukuhwera.”—Natalia, Ukraine.

Baibuli neegira eti: “Otagira oti: Ahabw’enki ebiro bya ira nibihita ebya hati?”—Omubuurizi 7:10.

Oku ebigambo ebi eby’obwengye birikubaasa kukuhwera kugumisiriza: Noobaasa kuba ori omu mbeera egumire munonga hati, kwonka waateeraho kwetantara kugigyeragyeranisa n’ei waabaire orimu enyima, nikiija kukuhwera kuteehurira kubi.

“Ahabw’okugira ngu nkaikiriza embeera ei ndimu, kikampwera kuguma nyine emiteekateekyere eringaniire.”—Eli, Rwanda.

Baibuli neegira eti: “Ku turaabe twine eby’okurya n’eby’okujwara, ebyo bigume bitumare.”—1 Timoseo 6:8.

Oku ebigambo ebi eby’obwengye birikubaasa kukuhwera kugumisiriza: Teeraho kumarwa n’ebyo ebirikwetengyesa. Waamarwa n’ebi oine, torikwija kwerarikirira munonga, kandi ekyo nikibaasa kukuhwera kuguma oikaikaine.

“Baibuli neetuhwera kureeba ebintu omuringo gw’omutaano, titurikuta omutima aha bi twafeereirwe. Nyowe n’omukazi wangye tushemereirwe ahabw’okugira ngu tukiriho kandi turi omu mwanya ogurimu oburinzi.”—Ivan, Ukraine.

Baibuli neegira eti: “N’ahabw’ekyo byona ebi mwenda ngu abantu babagirire, naimwe mube nikwo mwabagirira.”—Matayo 7:12.

Oku ebigambo ebi eby’obwengye birikubaasa kukuhwera kugumisiriza: Noija kubaasa kukwatanisa gye n’abandi waakora ekirikubaasika kubagumisiririza kandi okabagirira embabazi. Waakora ekyo, ab’omu kicweka eki orimu nibabaasa kutakushoroora kandi bakutwarize gye.

“Abantu baingi nibashemererwa waabatwariza omu muringo gw’ekitiinisa, ogw’embabazi, n’ogwa rukundo. Eki nikikureetera kugira emikago mirungi n’abantu b’omu kicweka eki orimu.”—Angelo, Sri Lanka.

Baibuli neegira eti: ‘Mumanyise Ruhanga ebi murikwetenga omu kushaba . . . Kandi obusingye bwa Ruhanga . . . nibwija kurinda emitima yaanyu n’obwengye bwanyu.’—Abafilipi 4:6, 7.

Oku ebigambo ebi eby’obwengye birikubaasa kukuhwera kugumisiriza: Shaba Ruhanga omugambire oku orikwehurira, ebi orikwenda, ebirikukutiinisa, n’ebirikukwerarikiriza. Okushaba nk’okwo nikubaasa kukwikaikanisa kandi kukuhwere kwetantara kwerarikirira ekirenga aha mbeera yaawe.

“Ninshaba Ruhanga buri kugira oburemeezi, kandi naangarukamu. Ebi nyegire omu Baibuli bimpaire obusingye obwabuzima obw’omu biteekateeko.”—Yol, South Sudan.

“Obuhabuzi burungi oburi omu Baibuli nibumpwera kugira obusingye bw’omu mutima ekirikumbaasisa kugumisiriza embeera egi egumire.”—Valentina, Ukraine.

“Nikingumya kumanya ngu Yehova naaraganisa nyentsya nungi.”—Emmanuel, Haiti

Okaayenzire kumanya ebirikukiraho aha bikwatiraine n’ebiraganiso by’omu Baibuli ebirikukwata aha kuhuumuriza n’amatsiko, n’enshonga ahabw’enki orikubaasa kubyesiga? Shaba Abajurizi ba Yehova kuguma nibakutaayaayira. Nibaija kushemererwa kukuhwera.