Oburemeezi bw’Eihamba Kweyongyera—Eki Baibuli Erikugamba

Kurugiirira aha ripoota y’ensi yoona,a omuntu omwe ahari bana naaba aine eihamba.

• “Okwetaanisa aha bandi n’oburemeezi bw’abantu boona, ab’emyaka yoona, buri hamwe.”—Bikagambwa Chido Mpemba, omuhwezi wa ceyamaani w’Ekitongore ky’Eby’amagara eky’Okuhikaanisa Abantu.

Okutaana n’eki abantu baingi barikubaasa kuba nibateekateeka, eihamba tiririkuteganisa abantu bakuru bonka nari abarikwetaanisa aha bandi, beitu n’abato, abaine amagara marungi, abasinguzi, n’abari omu bushwere. Okwetaanisa aha bandi n’eihamba nibibaasa kureetera omuntu kugira amagara mabi n’enyehurira mbi.

• “Eihamba nirikira aha kugira enyehurira mbi,” bikagambwa Dr. Vivek Murthy, omuri U.S. Naayongyeraho ati: “Akabi akarikureetwaho okwetaanisa aha bandi, n’ak’amaani kwingana n’akarikureetwaho okureetsa tsigara 15 buri izooba.”

Eki Baibuli erikugamba

Omuhangi tarikwenda ngu twetaanise aha bandi. Ruhanga atwire naayenda ngu abantu bagire abanywani barungi, kandi abarikubareetera kuhurira baine okumarwa.

• Omusingye gwa Baibuli: ‘Ruhanga akagira: Ti kirungi omuntu kuguma wenka.’—Okutandika 2:18.

Ruhanga naayenda ngu tugire omukago murungi nawe. Naaraganisa kutwirira haihi twagira eki twakora kumwirira haihi.—Yakobo 4:8.

• Omusingye gwa Baibuli: Baine okushemererwa abarikufayo aha kyetengo kyabo eky’eby’omwoyo, ahabw’okuba obukama bw’omu iguru n’obwabo.—Matayo 5:3.

Ruhanga naayenda ngu tumuramize hamwe n’abandi. Eki twakikora, nituhwerwa omu nyehurira.

• Omusingye gwa Baibuli: “Ka tuteekateekye oku twakwezirikisana kukundana n’okukora ebirungi, tutarikureka kuteeranira hamwe, . . . kureka tugumyane.”—Abaheburaayo 10:24, 25.

Okumanya ebirikukiraho ahabw’enki ni kikuru kwetantara eihamba, shoma ekicweka, “Eihamba Rikanyire—Noobaasa kurisingura Ota?”