Okutunga Amatsiko omu 2024—Baibuli Neegamba Ki?

Baingi nibareeba ngu tihariho ekiraagonjoore oburemeezi oburaabeho omu nsi omu 2024. Kwonka, nitubaasa kutunga amatsiko g’ebiro by’omumaisho. Nkahi?

Baibuli neeha amatsiko

Baibuli neeraganisa ngu Ruhanga naija kugonjoora oburemeezi oburikutureetera kutagira amatsiko hati. Juba, Ruhanga naija ‘kuragaza amarira goona aha maisho [gaitu], tiharikwija kubaho kufa bundi, n’obu kwakuba okucura, nari okurira, nari obusaasi.’—Okushuuruurwa 21:4.

• Okwega ebirikukiraho aha biraganiso bya Baibuli eby’ebiro by’omumaisho, shoma ekicweka “Amatsiko Genyini Aga Nyentsya Nungi.”

Oku Baibuli erikubaasa kukuhwera hati

Baibuli neeha amatsiko aha biro by’omumaisho agarikubaasa kukuhwera kurwanisa enyehurira mbi, reero okagira emiteekateekyere mirungi. (Abarooma 15:13) Obuhabuzi bwa Baibuli oburikukora nabwo nibubaasa kukuhwera kugumisiriza omu buremeezi obu oine, nk’obworo, obutari buringaaniza, n’endwara.

• Manya oku amatsiko ga Baibuli gaahweraire omushaija omwe kutunga obusingye n’okushemererwa n’obu araabe yaakuriire omu bworo. Reeba vidiyo, Juan Pablo Zermeño: Yehova Akampwera Kuba ow’Omugasho.

• Yetegyereze oku Baibuli erikubaasa kukuhwera kusingura enyehurira z’okweshinja, enaku, okwerarikirira, n’okufeerwa. Shoma ekicweka, “Nimbaasa Kutunga Ebigambo Birikuhuumuriza omu Baibuli?”

• Reeba oku omukazi owaabaire arugire omu mahe owaayegambireho “nk’omuntu onunguriirwe kandi otarikufayo” yaatungire amatsiko omu Baibuli. Reeba vidiyo, I Put Down My Rifle.

Reetera omwaka 2024 kukubeera murungi n’ab’eka yaawe. Yega ebirikukiraho oku Baibuli erikubaasa kukuhwera. Yejumbe omu mushomo gwaitu gwa Baibuli otashashwire ogw’okuhikaanisa ebiteekateeko. Manya oku Ruhanga arikubaasa kukuha ebiteekateeko by’obusingye hati n’amatsiko ga nyentsya.—Yeremia 29:11.