Noobaasa Kusingura ota Ebirikuhuzya?

1-2. Ekintu eki turikutwara nka kikuru nikibaasa kutureetera kita kuhuga?

HAINE obu waateeraho kusingura ebirikukuhuzya? Obundi haine ekyakureetaire kwiha omutima aha ki waabaire nookora reero kyakwetengyesa kucwamu ekirikukira obukuru. Nk’eky’okureeberaho, teera akashushani ngu haine owaakuteerera esimu oriyo noovuga. Naabaasa kuba aine enshonga nkuru ei arikwenda kukugambira, kwonka oyetegyereza ngu esimu egyo neebaasa kukuhuzya. Ni kikuru kuta omutima aha kuvuga ahabw’okuba waahuga noobaasa kutunga butandu.

² Twine bingi eby’okukora, kandi ebikuru. Kwonka nitumanya ngu ekirikukira obukuru n’okwebembeza okuheereza Yehova, kandi tukahamira aha ntebeekanisa yaitu y’eby’omwoyo.a (Mat. 6:33) Abaheereza ba Yehova bari nk’abavugi abeegyendesereza. Nibateeraho kumanya ebirikubaasa kubareetera kuhuga baaba bataire omutima aha kuheereza Yehova.—Enf. 4:25; Mat. 6:22.

3. Ekicweka eki nikiija kutuhwera kita kusingura ebirikuhuzya?

³ Tihaine n’omwe ahariitwe orikwenda ngu hagire ekyamuremesa kuguma ataire omutima aha by’omwoyo. Kwonka nabwo butoosha twena nituhikwaho embeera ezirikubaasa kutuhuzya. (Luk. 21:​34-36) N’ahabw’ekyo kubaasa kuguma tutaire omutima aha kuheereza Yehova, ka tushwijume (1) ebintu ebirikubaasa kutuhuzya, (2) oku Yesu yaasingwire ebirikuhuzya, kandi (3) n’oku naitwe turikubaasa kusingura ebirikuhuzya obunaku obu.

NI BINTU KI EBIRIKUBAASA KUTUHUZYA?

4-6. Ni bintu ki ebirikubaasa kutuhuzya?

⁴ Twena twine ebintu bingi ebi twine kutaho omutima omu magara gaitu aga butoosha. Nk’eky’okureeberaho, nitubaasa kuba twerarikiriire ahabw’amagara gaitu, nari haine ebi turikwenda kukorera ab’eka yaitu. N’ekyabuzima ebintu ebyo ni bikuru kandi twine kubiha obwire. Kwonka nibibaasa kutureetera kuhuga. Na munonga twabiteekateekaho kumara obwire, nibibaasa kutureetera kutata omutima aha nshonga ezindi.

⁵ Ekindi, baingi ahariitwe nitubaasa kuteganisibwa obutabanguko omu by’obutegyeki, oburemeezi omu by’entaatsya, endwara n’entaro ebirikubaho omu biro ebi eby’emperu. (2 Tim. 3:1) Twahikwaho ebintu ebyo nitubaasa kwerarikirira munonga kitureetere kuguma nitubiteekateekaho buri kaire.

⁶ Obundi nitumanya abamwe abateganisiibwe oburemeezi nk’obwo. Buzima nibaba baine enshonga nungi erikubareetera kugira amaganya n’okwerarikirira. Abantu titurahangirwe kwemera amaganya kumara obwire buraingwa. N’ahabw’ekyo tikirikututangaaza abamwe baateekateeka ngu tibarikwesiimira amagara nk’oku barikwenda ahabw’embeera zigumire ezo. N’ekirugiremu, abamwe nibateeraho kumara obwire bwingi omu by’okweshemeza kugira ngu babaase kweyihaho amaganya. Mbwenu shi nitubaasa kukora ki twayeshanga omu mbeera nk’ezo? Ka tureebe eki turikubaasa kwegyera ahari Yesu ekiraatuhwere kusingura ebirikutuhuzya bikaturemesa kwebembeza okuramya Yehova.

YESU AKASINGURA ATA EBYABAIRE NIBIBAASA KUMUHUZYA?

7. Ni bintu ki ebyabaire nibibaasa kuhuzya Yesu?

⁷ Yesu akaba naabaasa kuhugibwa ebintu bingi nk’eby’obutegyeki n’embeera ezi abantu baabaire nibatuuramu. Omu bwire bwe, abantu baingi bakaba bari abooro kandi baine amagara mabi. (Mat. 14:14; Mak. 14:7) Abarooma hamwe n’Abayudaaya bataahi baabo bakaba nibabatwariza omu muringo ogutari gw’oburingaaniza. Abantu ku baareebire ngu Yesu akaba aine amaani n’okubaasa kw’okukora eby’okutangaaza, bakenda kumuhindura omugabe. (Yoh. 6:​14, 15) Ekindi, Sitaane akagyeza Yesu kandi yaateeraho kumushendashenda ngu amuhindure omugabe w’ensi. (Mat. 4:​8, 9) Kandi entumwa Petero omwe ahari banywani be b’ahamara akamuhiga kwesaasibwa arikugira ati: “Nikikabure, Mukama wangye!”—Mat. 16:​21, 22.

8. Yesu akasingura ata ebyabaire nibibaasa kumuhuzya?

⁸ Yesu akasingura ata ebyabaire nibibaasa kumuhuzya? Akakikora omu miringo eshatu. Ogw’okubanza, akagira emiteekateekyere nk’eya Yehova. (Yoh. 8:28; 14:9) Ogwa kabiri, akaguma aine bingi by’okukora omu bintu eby’omwoyo. (Mat. 9:35) Kandi ogwa kashatu, akaguma ataire omutima aha byabaire nibikira obukuru. (Yoh. 4:34) Akangira okugyezibwa kwa Sitaane, kandi taraikiriize kubeihwabeihwa ebigambo bya Petero eby’okwegirira embabazi ezitahikire. (Mat. 4:10; 16:23) Yesu taraikiriize ebigambo by’abantu, ebikorwa byabo n’ebi baabaire nibamuteekateekaho kumuremesa kuta omutima aha kigyendererwa kya Ruhanga. N’amazima obunaku obu hariho ebintu bingi ebirikubaasa kutuhuzya ebitarikushushana n’ebya Yesu. Kwonka twateeraho kutooreza Yesu, naitwe nitubaasa kusingura ebirikuhuzya.

NITUBAASA KUSINGURA TUTA EBIRIKUHUZYA?

9. ‘Okumanya ebi [Yehova] arikwenda’ nikimanyisa ki? (Abaefeso 5:17)

⁹ Yega kuteekateeka nka Yehova. Twakora ekyo nikituhwera “kumanya ebi [Yehova] arikwenda.” (Shoma Abaefeso 5:17.) Nitubaasa kwega ebirikushemeza Yehova turikushoma Ekigambo kye, kandi tukakiteekateekaho. Ekyo nitubaasa kukikora n’obu Baibuli yaakuba etarikugamba butunu aha mbeera yaitu. Tuta shi? Turikuteeraho kumanya emiteekateekyere ya Yehova, kandi tukaba niyo twagyenderaho.

10. Nitubaasa kwega tuta emiteekateekyere ya Yehova?

¹⁰ Nitubaasa kwega emiteekateekyere ya Yehova twayega Baibuli, kandi tukashwijuma oku arikutwariza abantu. (Yer. 45:5) Twaba nitushoma Baibuli twine kwebuuza ebibuuzo nk’ebi: ‘Ebi nibinyegyesa ki ahari Yehova? Nimbaasa kubikoresa nta kuhikaanisa emiteekateekyere yangye n’eya Yehova?’ N’ekyabuzima, emiteekateekyere ya Yehova neekirira hare eyaitu. (Isa. 55:9) N’ahabw’ekyo nitumushaba kutwegyesa oku turikubaasa kukora ebi arikukunda. (Zab. 143:10) Kandi nitumushaba kutuhwera kwetegyereza gye emiteekateekyere ye n’oku turikubaasa kugihikaanisa n’eyaitu.—1 Yoh. 5:14.

11. Yehova naayenda ngu tukore ki?

¹¹ Twayega kuteekateeka nka Yehova, nitwetegyereza ngu naayenda twetantare kuhuga kugira ngu tube tweteekateekiire emperu y’entebeekanisa y’obusingye obu. (Mat. 24:44) Kandi tarikwenda ngu turengwe amaganya. (Mat. 6:​31, 32) N’ahabw’ekyo, twayerarikirira aha bikwatiraine n’amagara gaitu, emirimo, nari ahabw’amaka gaitu, twijukye ngu Yehova naayenda kutuha obuhwezi oburikwetengyesa. Twamushaba, naija kutuha obwengye n’amaani kubaasa kugumisiririza oburemeezi.—Zab. 55:22; Enf. 3:​5-7.

12. Niki ekirikubaasa kutuhwera kugumisiriza twayerarikirira ahabw’ebirikubaho omu nsi? (Matayo 5:3)

¹² Guma oine bingi by’okukora omu kuheereza Yehova. Twena nitwerarikirira ahabw’ebintu ebirikubaho omu nsi kwonka titurikubaasa kubimaraho. N’ahabw’ekyo twine kuguma tutaire omutima aha by’omwoyo omu mwanya gw’okuhugibwa ebi tutaineho bushoboorozi. Yehova akatuhanga twine ekyetengo ky’eby’omwoyo, kandi nitushemererwa twateeraho kwigutsya ekyetengo ekyo. (Shoma Matayo 5:3.) Nitubaasa kwigutsya ekyetengo ekyo turikuteeraho kumanya Yehova kurabira omu Kigambo kye Baibuli, kandi tukakora kyona eki turikubaasa kumuramya omu miringo yoona ey’obuheereza ei turikubaasa. Twakora ekyo, nitushemeza Yehova ahabw’okuba nituba nitukoresa gye obwire bwaitu.—Enf. 23:15.

13. Niki ekirikubaasa kutuhwera ‘kutafiisa busha’ obwire?

¹³ Twena twine kumariirira ‘kutafiisa busha omwanya’ nari obwire. (Efe. 5:​15, 16) Nitumanya ngu Baibuli terikugamba aha ku twine kukoresa obwire bwaitu aha nshonga eza buri izooba kyonka. Kureka, neetuhiga kushwijuma n’obwegyendesereza oku turikukoresa obwire bwaitu Yehova atakahendeire entebeekanisa y’ensi egi embi. Mbwenu shi nitubaasa kukoresa gye tuta obwire bwaitu? Twamara obwire bwingi turikureeba amakuru mabi agarikubaho buri izooba, nitubaasa kuhuga, tuhwemu amaani, kandi omujinya gwaitu gw’okuramya Yehova gutuube. Ka ni kirungi ahabwaitu kweteeraho obugarukiro kyahika aha makuru agu turikureeba nari agu turikushoma! Ekyo nikiija kutuhwera kuguma twine bingi by’okukora omu kuheereza Yehova, kandi tituraije kuhwamu amaani. Kandi n’eky’obwengye twateekateeka aha kwongyera aha buheereza bwaitu nk’oku turikubaasa, nk’okugira abantu baingi b’okugarukira omu kubuurira. Nitumanya ngu ni kikuru kukoresa buri kagisha kuhwera abantu kugira ngu “bajunwe, bamanyire kimwe amazima.”—1 Tim. 2:4.

14. Ni muringo ki oku turikugasirwa twaguma twine bingi by’okukora omu kuheereza Yehova? (Reeba n’ekishushani.)

¹⁴ Twaguma twine bingi by’okukora omu kuheereza Yehova, nitwija kuguma twine emiteekateekyere eringaniire aha bwire obu turimu. Tituraije kuhwamu amaani twareeba obutabanguko omu by’obutegyeki, oburemeezi omu by’entaatsya, n’okujanjaara kw’endwara ezitari zimwe. Ebintu ebyo nitubireeba nk’obuhame oburikworeka ngu obunabi bwa Baibuli buriyo nibuhikiirira. Omu mwanya gw’okurengwa obwoba tukahuga, twine obwesigye omu kigyendererwa eki Yehova atwiniire ekiraahikiirizibwe omu biro by’omumaisho. Nitubaasa kuguma twikaikaine twine obwesigye ngu Yehova naija kugumizamu naatuhwera kugumisiririza embeera ezi ezigumire.—Zab. 16:8; 112:​1, 6-8.

15. Kurugiirira ahari 1 Petero 4:​7, twine kukora ki, kandi ekyo nikitwariramu ki?

¹⁵ Guma noijuka ebirikukira obukuru. Abantu baingi obunaku obu bataire omutima aha by’okweshemeza omu mwanya gw’okuguta aha kiro kya Yehova ekiri haihi kubaho. N’obu kiraabe kitari kibi kwejumba omu by’okweshemeza, twine ‘kuhuguuka’ kubaasa kwetantara emiteekateekyere y’ensi. (Shoma 1 Petero 4:7.) Ekyo nikimanyisa ki? Nikitwariramu okugira emiteekateekyere eringaniire kyahika aha by’okweshemeza, kandi tukacwamu omu muringo gw’obwengye. Ebi turikucwamu biine kworeka emiteekateekyere ya Yehova, kandi bikooreka ngu nitumanya ebi twine kutwara nka bikuru.—2 Tim. 1:7.

16. Obu Yesu yaabaire ari haihi kwitwa, akata omutima ahari ki?

¹⁶ Yesu akaguma naijuka ebirikukira obukuru. Nangwa n’obu yaabaire ari haihi kwitwa, akata omutima aha kuguma ari omwesigwa n’okuhikiiriza ekigyendererwa kya Ruhanga. N’ahabw’enshonga egyo, akashaba munonga. Kwonka okutaana na Yesu, abeegi be bakagwejegyera. Bakaba barengirwe amaganya.—Luk. 22:​39-46; Yoh. 19:30.

17. Ahabw’enki abantu baingi nibakoresa emikura y’empurizana, kandi neebaasa kuba eta oruhuzyo? (Reeba n’ekishushani.)

¹⁷ Naitwe obumwe nitubaasa kurengwa amaganya nk’oku kyabaire aha beegi ba Yesu. Nitubaasa kwerarikirira ahabw’ebintu ebirikubaho ebirikworeka ngu turi omu biro by’aha mperu. Baingi obunaku obu nibateeraho kweyebesa oburemeezi barikuza aha mikura y’empurizana. Nibagikoresa kuhurizana n’abanywani, abanyabuzaare abari omu bicweka bitari bimwe, kubagana nabo amakuru, okutsindikirana ebishushani n’ebindi. Kandi nibagikoresa kureeba za vidiyo n’okuzaaniraho emizaano. Kwonka abantu abo nibahendera barikuhurira batamazirwe, ahabw’okumara obwire bwabo n’amaani gaabo barikuteeraho kureeba ebisya ebitairwe aha mikura y’empurizana. Kubaasa kukoresa gye emikura y’empurizana, nitubaasa kwebuuza tuti, ‘Ebi ndikureeba aha mikura y’empurizana buzima nibindeetera kwehurira gye nari nibindeetera kuhuga reero ndemwa kuteekateeka gye aha birikukira obukuru?’

18. Ahabw’enki twine kwegyendesereza twaba nitucwamu eby’okweshemeza ebi turaayejumbemu?

¹⁸ Twine kukoresa okwetegyereza twaba nitureeba za vidiyo, obuzaano bw’aha tiivi nari bwa vidiyo obw’edakiika nkye obw’aha mikura y’empurizana nari kuzaana emizaano ey’aha simu. Ebintu ebyo nibibaasa kutushemeza, kandi bitureetere kwikaikana. Kwonka twine kwegyendesereza twaba nitucwamu ekika ky’eby’okweshemeza ebi turaayejumbemu n’obwire obu turaabimaremu. Emikura ey’okureeberaho vidiyo neekira kutaho ebintu bisya, kandi neebaasa kureetera abarikugikoresa kureeba eby’obushaarizi n’obushambani. Ekyo nikyo kyabaire aha w’eishe-emwe omwe ow’omuri Asia. Akatandika arikureeba bwa vidiyo obw’edakiika nkye aha mukura gumwe ogw’empurizana. Ku yaagumiizemu naareeba bwa vidiyo obwo obu baabaire nibataho, akahendera arikureeba vidiyo ezitashemeire. Empereruka akatandika kureeba ebirikwitsa enshoni. Ekirungi akatunga obuhwezi oburikwetengyesa kuruga aha bareeberezi n’abanywani be, kandi yaagira eki yaakora arikwiha emikura egyo omu simu ye, kandi yaataho obugarukiro kyahika aha kukoresa esimu ye. Eky’okureeberaho ekyo nikyoreka ahabw’enki twine kwegyendesereza twaba nitucwamu eby’okweshemeza ebi turaayejumbemu.

19. Niki ekirikubaasa kubaho twayebembeza eby’okweshemeza?

¹⁹ Twine kwegyendesereza kyahika aha by’okweshemeza. Twena nitwetenga kuhuumuraho aha mirimo yaitu ya butoosha ahakuba ni kirungi, kandi nikituhwera kugira amagara marungi. Kwonka twata omutima aha by’okweshemeza, nibibaasa kututwarira obwire obu twakubaire nitukoresa ebintu ebikuru. (Fil. 1:10) Twine kwecweramu ebi twine kukora n’obwire obu twine kumara turikubikora. Waaba noocwamu aha nshonga ezo, yebuuze oti: ‘Obwire obu ndikumara omu by’okweshemeza nibworeka ngu nyine okwetegyereza? Niinyoreka ngu niimanya ebirikukira obukuru, kandi nyetebeekanisiize “emperu y’ebintu byona”?’

20. Nitugasirwa tuta twasingura ebirikuhuzya?

²⁰ Nitugasirwa munonga twateeraho kutahuga aha by’omwoyo. (Isa. 48:17) Ahabw’obuhwezi bwa Yehova, nitwija kugumisiririza oburemeezi. Tituraije kwerarikirira ekirenga ahabw’ebirikubaho omu nsi. Kandi nitwija kwetantara kwebembeza eby’okweshemeza. N’ahabw’ekyo, ka tumariirire kugira emiteekateekyere nk’eya Yehova, tugume twine bingi by’okukora omu kumuheereza, kandi tugume nitwijuka ebirikukira obukuru. Twakora ekyo, nitwija kusingura ebirikuhuzya, kandi ‘tutunge amagara agaabuzima.’—1 Tim. 6:19.