Ebibuuzo Kuruga omu Bashomi

Ni ryari obu amahanga garaije kuranga ngu “n’obusingye tihariho kabi”?

Nk’oku kyayorekirwe omu kicweka “Ebibuuzo Kuruga omu Bashomi” eky’omu Munaara gw’Omurinzi ogwa Novemba 2025, omu bwire butari bwa hare Yehova naaza kuta ‘ekiteekateeko kye’ omu mitima “y’amahembe ikumi” (nari gavumenti zoona) kugira ngu zihe “enyamaishwa [erikutukura]” nikyo Kibiina ky’Amahanga Ageeteeraine amaani gaazo n’obushoboorozi bwazo. Enyamaishwa egyo neegaruka eyeetwa “ekishushani ky’enyamaishwa.” (Kush. 13:​14, 15; 17:​3, 16, 17) Bwanyima “amahembe ikumi” n’enyamaishwa ensya eraabe ehairwe amaani niziija kwihaho ediini y’ebishuba omu nsi yoona. Mbwenu shi amahanga nigaija kurangiirira ngu “n’obusingye tihariho kabi”a gatakacwekyereize ediini z’ebishuba, nari bwanyima y’okuzicwekyereza?—1 Tes. 5:3.

Amazima gari ngu, titurikumanya obwire bwenyini obu amahanga gararangirire ngu “n’obusingye tihariho kabi.” Ku ogire ngu nitumanya byona oku biraabeho, tikyakwetengyeise ‘kuguma nitureeba.’ Kwonka Yesu akarabura abakuratsi be emirundi mingi ‘kuguma nibareeba.’ (Mat. 24:42; 25:13; 26:41) Hati ka twetegyereze gye obunabi obu Ruhanga yaahweraire entumwa Paulo kuhandiikira Abatesalonika.

Paulo akahandiika ati: “Ku bariba nibagira ngu, n’obusingye, tihariho kabi, obwo nibwo okucwekyerera kuribagwaho.” (1 Tes. 5:​2, 3) Ebitabo byaitu bitwire nibishoboorora ebigambo bya Paulo biti: Okurangirira ngu “n’obusingye tihariho kabi” nikwija kukorwa harikuburayo akaire kakye okubonabona kwingi kukatandika obu Babulooni Orukuru nari amadiini g’ebishuba garaacwekyerezibwe. Tutwire nitumanya okurangirira okwo nk’akamanyiso k’aha muheru akaraije kworeka ngu okubonabona kwingi kwaza kutandika.

Kwonka bwanyima y’okuteekateeka aha nshonga egi n’obwegyendesereza, nikireebeka hariho enshoboorora endiijo ei tutarikubaasa kwehuzya. Obundi okurangirira ngu “n’obusingye tihariho kabi” nikubaasa kwija kubaho bwanyima y’okucwekyerera kw’ediini z’ebishuba. Ahabw’enki nitugira tutyo? Ka tushwijume ebibuuzo ebi.

Ediini z’ebishuba zitwire ziine bujunaanizibwa ki omu ntaro ezirikubaho omu nsi? Baibuli neeshoboorora eti: ‘Eshagama ya baanabi n’abarikwera n’eya boona abaitsirwe omu nsi ekashangwa omuri orwo rurembo [“maraaya omukuru,” Babulooni Orukuru].’ (Kush. 17:​1, 5; 18:24) Ebyafaayo nibyoreka ngu maraaya omukuru ashagikire entaro z’amahanga kandi naakira kwenegyeza ebikorwa by’obuzahambuki. N’ahabw’ekyo omu mwanya gw’okushagika obusingye omu nsi, amadiini g’ebishuba garetsireho entaro n’emihondano. Eki nikireetaho ekibuuzo eki: Babulooni Orukuru ku ruraacwekyerezibwe nibwo haraabeho okurangirira ngu “n’obusingye tihariho kabi”? Nikibaasa kuba kityo, kwonka titurikubaasa kukihamya.

Niki ekiraakurateho bwanyima y’okurangirira ngu “n’obusingye tihariho kabi”? Paulo akagira ati: “Obwo nibwo okucwekyerera kuribagwaho.” (1 Tes. 5:3) Nikwija kubaho kitaraariire kandi tihaine oraabaase kuhonokaho. Amahanga ku garaaheze kurangirira ngu “n’obusingye tihariho kabi” bwanyima y’okwihaho amadiini g’ebishuba, obwo okuhwerekyerera kw’ago nikwija kukurataho kitaraariire.

Abaheereza ba Yehova nibaija kutwaza bata ebintu ebyo byatandika kubaho? Paulo akagira ati: “Kwonka imwe b’eishe-emwe, timuri mu mwirima, ekiro ekyo kubagwaho nk’omushuma.” (1 Tes. 5:4) Teekateeka ahari eki: Okurangirira ngu “n’obusingye tihariho kabi” ku kuraabeho bwanyima y’okucwekyerera kw’ediini z’ebishuba, abaheereza ba Yehova nibaija kumanya ngu amahanga gari haihi kucwekyerezibwa. Kwonka amahanga go tigaraije kukimanya, n’ahabw’ekyo okucwekyerera kwago nikwija kugabaho kitaraariire nk’omushuma wa nyekiro.

Mbwenu shi niki eki twineho obuhame? Omu bwire butari bwa hare “amahembe ikumi” n’enyamaishwa eraabe ehairwe amaani niziija kucwekyereza ediini z’ebishuba. Egi niyo eraabe entandikiro y’okubonabona kwingi. Kandi nitumanya ngu haine obu amahanga garaarangirire ngu “n’obusingye tihariho kabi.” Kwonka shi ekyo nikiija kubaho ryari? Twagamba aha bintu bibiri ebirikubaasa kubaho. Eky’okubanza: Okurangirira ngu n’obusingye tihariho kabi nikibaasa kubaho ediini z’ebishuba zitakacwekyereziibwe. Ekya kabiri: Okurangirira ngu n’obusingye tihariho kabi nikibaasa kwija kubaho bwanyima y’amahanga kucwekyereza ediini z’ebishuba. Nitwija kutegyereza tureebe ekiraabeho. Obunabi bwa Baibuli obwingi nibukira kwetegyerezibwa gye bwaba nibuhikiirira, nari bwaheza kuhikiirira.—Gyeragyeranisa Yohaana 12:16.

Kwonka ekirikukira obukuru obunaku obu, ti bwire obu okurangirira oku kuraabeho, kureka okuguma turi abeesigwa ahari Ruhanga. N’ahabw’ekyo twine “kuguma nitureeba” kugira ngu tugume tweteekateekiire byona ebiraabeho obunabi obwo bwaba nibuhikiirira.—1 Tes. 5:6.