Tiina Ruhanga nka Obadia

Obadia akaba naareeberera enju y’omugabe mubi Ahabu owaikiriize okuramya Baali kwijura omuri Israeli. Kwonka Obadia akaguma naatiina Yehova omu muringo ogushemeire kuruga ‘omu buto bwe.’ (1 Bag. 18:​1-13) N’ahabw’ekyo omugabekazi Yezebeeli ku yaaragiire ngu baanabi ba Yehova boona baitwe, Obadia akeetegyereza ngu aine kuba emanzi kubaasa kuzibira ekikorwa kibi ekyo kubaho. Okushereka nabi omwe kikaba kiri eky’akabi munonga, kwonka Obadia akashereka baanabi 100 kandi yaaguma naabaha eby’okurya omu bwire bw’enjara y’amaani. Teekateeka aha ku kyabaire kigumire kukikora bwesherekye ahabw’okugira ngu hakaba hariho baanabi b’ebishuba baingi abaabaire nibaheereza omugabe n’omugabekazi.—1 Bag. 18:19.

Nitubaasa kwegyera ki aha mushaija ogwo owaabaire naatiina Ruhanga? Akaba naatiina munonga Ruhanga kukira oku yaabaire naatiina Ahabu. Ekyo kikamuha obumanzi bw’okuta amagara ge omu kabi kubaasa kurinda beene ishe. Okuramya okw’amazima kwazibirwa omu kicweka eki orikutuuramu noobaasa kworeka ngu nootiina Ruhanga. Okutiina okwo nikwija kukuhwera kugira obumanzi bw’okushagika ab’eishe-emwe bagyenzi baitu abaine embeera zigumire n’okubagumya.