Oyetebeekanisiize Oburemeezi Oburikubaasa Kubaho Bwanyima y’Okubatizibwa?

1-2. Twine kukora ki kwetebeekanisiza oburemeezi oburikubaasa kubaho bwanyima y’okubatizibwa? Ha eky’okureeberaho.

NITUMANYA ngu nitubaasa kutunga oburemeezi omu nsi egi eya Sitaane. Yesu akarabura abakuratsi be ati: ‘Ebirikugwisa [nari ebirikuteeza entsibo] tibiribura kwija.’ (Mat. 18:7) Okurabura okwo nikutuhwera kumanya ngu twine kwetebeekanisiza oburemeezi otwariiremu n’okugira obutaikirizana n’ab’eishe-emwe bagyenzi baitu.

² Teekateeka aha ky’okureeberaho eki. Abaheereza ba Yehova batwire nibahigwa kwetebeekanisiza ebihikiirizi. Mbwenu shi eki nitukikora tuta? Eky’okubanza, nituteeraho kwetegyereza ebihikiirizi ebirikubaasa kubaho omu kicweka kyaitu. Ekyo nikiba kiri kikuru na munonga twaza omu mwanya musya. Twaheza kumanya ebihikiirizi ebirikubaasa kubaho omu kicweka kyaitu, nituba twine kumanya eki turikubaasa kukora kubyetebeekanisiza. (Enf. 21:5) Nikyo kimwe, twine kuteeraho kumanya oburemeezi oburikubaasa kutuhikaho bwanyima y’okubatizibwa kugira ngu tube twetebeekaniise bwatuhikaho. Twakora ekyo, oburemeezi obwo tiburaashiishe omukago gwaitu na Yehova, kandi nikiija kutworobera kubwemera. (Zab. 17:5) N’ahabw’ekyo, ka tugambe aha buremeezi bw’emiringo eshatu oburikubaasa kubaho n’oku turikubaasa kubwetebeekanisiza.a

OW’EISHE-EMWE NARI MUNYAANYAZI-ITWE YAAKUGWISA KUBI

3. Ni bureemezi ki oburikubaasa kutuhikaho omu kibiina?

³ Noijuka oku waayehuriire obu waaza omu nteerane z’Abajurizi ba Yehova omurundi gw’okubanza? Noobaasa kuba waareebire rukundo ei baabaire niboorekana. Mbwenu shi ekyo kikakuhamiza ngu oboine amazima? (Yoh. 13:35; Kol. 3:12) Okwo nikwo Blancab yaayehuriire. Kwonka, bwanyima y’okubatizibwa, akahikwaho embeera ei yaabaire atarikuteekateeka. Naagira ati: “Munyaanyazi-itwe omwe akantwariza kubi. Kandi nketegyereza ngu akaba naagambuura abandi. Nkaba ntarikumanya ngu ekyo nikibaasa kubaho, ahakuba nkaba nyegire ngu Abajurizi ba Yehova nibateeraho kuba ab’obusingye kandi abarikukundana.” Amazima gari ngu, ab’eishe-emwe na banyaanyazi-itwe nibateeraho kuboneza emitwarize yaabo y’Ekikristaayo, kwonka ti bahikiriire. (Efe. 4:​23, 24; 1 Yoh. 1:8) N’ahabw’ekyo obumwe nibabaasa kugamba nari bakore ekintu ekirikubaasa kukugwisa kubi. (Yak. 3:8) Eky’obusaasi, oburemeezi nk’obwo bureeteire abamwe kurekyera aho kuheereza Yehova.

4. Niki ekiraakuhwere kumanya oku oraatwaze ow’eishe-emwe nari munyaanyazi-itwe yaakugwisa kubi? (Abaefeso 4:32)

⁴ Noobaasa kumanya ota oku oraatwaze ow’eishe-emwe nari munyaanyazi-itwe yaakugwisa kubi? Teeraho kugyendera aha buhabuzi oburi omu Abaefeso 4:32. (Kishome.) Waateeraho kugirira abandi embabazi, noija kwetantara oburemeezi bwingi. Haagira owaakutwariza kubi, musaasire otataireho bushonshorekye. Niki ekirikubaasa kukuhwera? Teekateeka aha mirundi ei orikushaba Yehova ngu akusaasire buri izooba n’oku arikukusaasira ayekundiire. (Mat. 6:12) Waata omutima aha ku arikukusaasira, nikiija kukworobera kusaasira abandi.

5. Ni musingye ki ogurikubaasa kukuhwera hagira owaakugwisa kubi? (Enfumu 14:29) (Reeba n’ebishushani.)

⁵ Shoma Enfumu 14:29. Baibuli neegira ngu twaguubwa kubi, okwetegyerezac nikubaasa kutuubya ekiniga kyaitu. Omusingye ogu guhweraire Rima, owaabatiziibwe emyaka mikye enyima. Naagira ati: “Ab’eishe-emwe na banyaanyazi-itwe baangwisa kubi, ninyijuka ngu Baibuli neegira ngu okwetegyereza nikubaasa kutuhwera kutegyeka ekiniga kyaitu. Ninteekateeka aha mbeera ezi barikurabamu n’ezi baakuriiremu, kandi nteeraho kumanya ahabw’enki nibatwaza omu muringo ogwo. Ekindi, niinteeraho kukora nabo omu kubuurira. Okukora ekyo nikimpwera kwehurira gye.” Obwo n’obuhabuzi burungi. Noobaasa kuteeraho kumanya ab’eishe-emwe na banyaanyazi-itwe. Ku orikwongyera kubamanya nikikuhwera kwongyera kubasaasira baakugwisa kubi.

6. Niki ekirikubaasa kutuhwera kugira emikago mirungi omu kibiina?

⁶ Niki eki orikubaasa kukora kugira emikago mirungi omu kibiina? Waaba nooteeraho kumanya ab’eishe-emwe na banyaanyazi-itwe, ta omutima aha mitwarize yaabo emirungi. (Gyeragyeranisa Enfumu 10:12; Rom. 12:10; Fil. 2:​2, 3) Yetegyereze oku ekyo kyahweraire ow’eishe-emwe Mark obu yaabaire aherize kubatizibwa. Ku yaatandikire kumara obwire bwingi n’ab’eishe-emwe na banyaanyazi-itwe omu kibiina kye, akatandika kureeba obweremwa bwabo. Niki ekyamuhweraire kutateerwa entsibo ahabw’obweremwa obu yaareebire omu b’eishe-emwe? Naagira ati: “Nketegyereza ngu enshobe zaabo zikaba ziri nkye waazigyeragyeranisa n’ebibi by’amaani ebikanyire omu nsi ya Sitaane. Nketegyereza ngu tinyine kuguma ninta omutima aha butahikiirira bw’Abakristaayo bagyenzi bangye. N’ahabw’ekyo, nkatandika kuta omutima aha mitwarize yaabo emirungi.” Naiwe waakora otyo, noija kutunga emikago mirungi omu kibiina.

WAATANDIKA KWEGOMBA EBY’ENYIMA

7. Niki ekirikubaasa kukureetera kwegomba ebi waatsigire enyima?

⁷ Ku waayegire amazima, hatariho kubangaanisa okaba oyeteekateekire kutsigaho ensi ya Sitaane embi. N’ahabw’ekyo nikibaasa kukugumira kwikiriza ngu omuntu naabaasa kugaruka ayegombe ebi yaatsigireho enyima. Kwonka waahikwaho oburemeezi, kyorobi kutandika kwijuka nari kwegomba ebintu ebi waatsigireho kubaasa kuheereza Yehova. (Gyeragyeranisa Okubara 11:​4-6.) Nk’eky’okureeberaho, ab’eishe-emwe abamwe nibabaasa kuba baacwiremu kutsigaho omurimo gw’esente nyingi ahabw’okugira ngu gukaba nigutwara obwire bwingi. Abandi ku baatandikire kwega Baibuli, banywani baabo bakabatsigaho. Kandi abandi nibabaasa kuba baabaire baine omuze ogugumire eicwa kwonka ogwabaire nigubashemeza. Buzima ka n’eky’obusaasi Omukristaayo kwikiriza ebi yaatsigireho enyima kumureetera kuruga ahari Yehova! Noobaasa kukora ki kugira ngu hatagira ekintu kyona ekyakureetera kwegomba ebi waatsigire enyima?

8. Nitwegyera ki ahari Abrahamu na Saara?

⁸ Baibuli erimu abaheereza Yehova abeesigwa abaabaire nibabaasa kutandika kwegomba ebi baatsigire enyima. Nk’eky’okureeberaho, Abrahamu na Saara bakoorobera ekiragiro kya Yehova batsigaho orurembo Uri baaza kutuura omu mahema. (Heb. 11:​8, 9) Hatariho kubangaanisa, obumwe nibabaasa kuba baabaire bateekateeka aha mbeera nungi ezi baatsigire omuri Uri. Kwonka ‘kuri [baagumire] nibaijuka ensi egyo ei baarugiremu’ nari bakeegomba eby’enyima, bakaba nibabaasa kwenda kugarukayo. Omu mwanya gw’ekyo, bakata omutima aha by’omumaisho.—Heb. 11:​15, 16.

9. Entumwa Paulo akaba areeba ata ebintu ebi yaatsigireho? (Abafilipi 3:​7, 8, 13)

⁹ Entumwa Paulo akakora empinduka z’amaani kubaasa kuheereza Yehova. Atakabaire Omukristaayo akaba ayegyesiibwe Gamalieli owaabaire ari omutendeki mukuru omu by’Ebiragiro. (Byak. 22:3) Ekyo kikaba nikiija kumureetera kutunga omwanya mukuru omu diini y’Ekiyudaaya. (Gal. 1:​13, 14) Kwonka, ku yaikiriize amakuru marungi, ebyo byona akabitsigaho. Mbwenu shi akatwarizibwa ata ku yaahindukire Omukristaayo? Akateerwa, yaateebwa omu kihome, kandi Abayudaaya bagyenzi be baamwanga. (2 Kor. 11:​23-26) Ku ogire ngu akata omutima aha buremeezi obwo kandi yaagyeragyeranisa embeera ei yaabaire naarabamu n’ei yaabaire arimu enyima, akaba naija kuteekateeka ngu obu yaabaire atakabaire Omukristaayo akaba ari gye. Kureka, akata omutima aha bujunaanizibwa bukuru bw’okuheereza Kristo n’emigisha ei yaabaire naija kutunga omu biro by’omumaisho. Paulo akaba naahamiza kimwe ngu emigisha ei yaatungire ekaba neekirira kimwe ebi yaatsigireho enyima.—Shoma Abafilipi 3:​7, 8, 13.

10. Twine kuguma nituteekateeka ahari ki? (Mako 10:​29, 30) (Reeba n’ebishushani.)

¹⁰ Nitwega eishomo ki? Waatandika kwegomba ebi waatsigireho enyima, teeraho kwijuka ekyakureeteire kubitsigaho. (Mub. 7:10) Gyeragyeranisa ebi waatsigireho n’emigisha ei otungire ahabw’okwija omu mazima. Nk’eky’okureeberaho, oine omukago murungi na Yehova Rukira Boona. (Enf. 3:32) Oine eka mpango ey’eby’omwoyo erikukukunda. (Shoma Mako 10:​29, 30.) Kandi oine nyentsya nungi. (Isa. 65:​21-23) Waaguma nooteekateeka aha migisha erikuruga omu kuheereza Yehova, nikiija kukuhwera kutegomba ebi waatsigire enyima.

11. Nooyegyera ki ahari Rosemary?

¹¹ Yetegyereze eki munyaanyazi-itwe Rosemary owaabatiziibwe aine emyaka nka 50 yaakozire kugira ngu atakayegomba ebi yaatsigireho enyima. Naagira ati: “Omu kubanza, nkaba ninyegomba kukuza Noiri, ahakuba bukaba buri obwire bw’okushemererwa n’eka yaitu. Nkaba ninkunda kuha abanyabuzaare bangye ebiconco, kandi kikaba nikinshemeza kureeba abaana bato beemereire haihi n’omuti gwa Noiri n’okubareeba bashemereirwe barikukomorora ebiconco.” Niki ekyahweraire Rosemary? Naagira ati: “Mboine omuringo ogundi gw’okushemererwa n’abanyabuzaare bangye. Buri mwaka niinteeraho kuba n’eka yangye, mbaha ebiconco kandi mbashoboororera ahabw’enki nimbakunda.” Kwonka Rosemary akahikwaho oburemeezi obundi. Naagira ati: “Ku naayegire amazima, banywani bangye aba ira bakantsigaho. Obumwe, nkaba mbagirira orushusho kandi mpurira nyine eihamba.”d Niki ekyamuhweraire? Akatandika kugira entebeekanisa y’okukora na banyaanyazi-itwe batari bamwe omu kubuurira. Naagira ati: “Omu kukora ekyo, mbaasize kutunga abanywani b’omuhendo kandi abu ndikukunda munonga.” Mbwenu shi niki eki orikubaasa kumwegyeraho? Waayegomba ekintu ekyabaire nikikushemeza otakeegire amazima, gira ekindi eki waakora ekirikukureetera okushemererwa. (Fil. 4:​8, 9) Kandi ijuka eki: Butoosha Yehova naakuha ebirikukira ebi waayefeerereize.

ABANDI BAARUGA AHARI YEHOVA

12. Ni mbeera ki egumire erikubaasa kubaho omu kibiina?

¹² Ku waahindukire Omujurizi wa Yehova, okatunga oburuhuuko ahabw’okutsigaho ensi ya Sitaane, kandi hati nookwatanisa n’abantu abarikwegyesa amazima kandi abarikukora ekihikire. (Isa. 65:14) Kwonka obumwe, omu kibiina nihabaasa kugira owaakora ekibi ky’amaani kandi obumwe omuntu ogwo naabaasa kwihwa omu kibiina. (1 Kor. 5:13) Yetegyereze oku ekyo kyakwatsire ahari munyaanyazi-itwe orikwetwa Samar. Naagira ati: “Ku naaherize kubatizibwa, omureeberezi akakora ekibi ky’amaani kandi yaihwa omu kibiina. Nkaba ndi haihi kuteerwa entsibo ahakuba nkaba ntarikukiikiriza ngu omureeberezi naabaasa kucumura ahari Yehova n’ekibiina.” Amazima gari ngu, butoosha twine kugira obwesigye ngu ab’eishe-emwe na banyaanyazi-itwe nibakunda Yehova kandi nibenda kumuhamiraho. (1 Kor. 13:​4, 7) Kwonka nabwo, buri mwaka hariho bamwe abarikwihwa omu kibiina. Kandi nikibaasa kukusaasa omuntu obaire ari munywani waawe nari ou orikwesiga yaihwa omu kibiina.

13. Nitubaasa kukora ki kutateerwa entsibo munywani waitu yaaruga omu kibiina?

¹³ Noobaasa kwetebeekanisa ota kugira ngu otakateerwa entsibo munywani waawe yaaruga ahari Yehova? Gumizamu noohamya omukago gwawe na Yehova. (Yak. 4:8) Otakaikiriza omukago gwawe na Yehova kwegamira aha bwesigwa bw’omuntu ondiijo. Nk’eky’okureeberaho, n’obu turaabe nituramya Yehova nk’eka nari nk’ekibiina, buri aine kweteeraho entebeekanisa y’okushaba n’okushoma Baibuli.—Zab. 1:2; 62:8.

14. Nitwegyera ki aha ntumwa Petero? (Yohaana 6:​66-68)

¹⁴ Nitubaasa n’okwegyera aha ku entumwa Petero yaatwarize obu abeegi abarikukira obwingi baarekyera aho kukuratira Yesu. Omu bwire obwo, Petero naabaasa kuba yaashobeirwe. Kwonka yetegyereze ebi yaagambire ebiri omu Yohaana 6:​66-68. (Kishome.) Omu mwanya gw’okuta omutima aha bi abandi baabaire nibakora, akaguta aha bigambo by’amazima ebi Yesu yaamwegyeise. N’ekyarugiremu, Petero taratairwe ntsibo. Nikyo kimwe obunaku obu, ebi abandi barikukora tibirikuhindura amazima g’omuhendo agu oyegire orikuhwerwa ekibiina kya Ruhanga. N’ahabw’ekyo hamira aha mazima ago. Samar, owaaba yaagambirweho, naagira ati: “Butoosha ninyeijutsya ngu enshobe z’omuntu tizirikujwekyera ekibiina kya Yehova nari emitwarize ye.”

15. Nitwegyera ki aha byahikire ahari Emily?

¹⁵ Teekateeka aha ky’okureeberaho kya Emily. Bwanyima ya saabiiti emwe aherize kubatizibwa, nyina akatsigaho eka yaabo, kandi yaihwa omu kibiina. Emily naagira ati: “Nkaba ntakateekateekahoga ngu ekyo nikibaasa kubaho. Ekyo kikangumira munonga, kandi nyiniire maawe orushusho.” Mbwenu shi niki ekyahweraire Emily? Naagira ati: “Nti ndi nyenka. Ahakuba nyine obushagiki bwa tata n’abandi omu kibiina abahindukire nk’eka yangye. Buri muheereza wa Yehova aine embeera egumire ei arikurabamu. Niyo nshonga ahabw’enki twine kuguma haihi n’ab’eishe-emwe bagyenzi baitu, kandi tukabagumya.” (1 Pet. 5:9) Toine kutegyereza oburemeezi kubaho reero okabona kuhamya omukago gwawe nabo. Oine kukikora hati. Waakora otyo, kyona ekiraabeho toraije kwehurira nk’ori wenka.

16. Twine kwijuka ki? (Reeba n’ekishushani.)

¹⁶ Ijuka ngu Yehova naahana abarikukunda. (Heb. 12:6) Naayenda ngu boona abaihirwe omu kibiina baamugarukire. (2 Pet. 3:9) N’ahabw’ekyo gira obwesigye ngu munywani waawe yaihwa omu kibiina, abareeberezi nibaija kukora kyona eki barikubaasa kumuhwera kugarukira Yehova.—2 Tim. 2:​24, 25.

17. Nitubaasa kugira bwesigye ki?

¹⁷ Twareeba bumwe aha buremeezi obu orikubaasa kugira bwanyima y’okubatizibwa. Obumwe nibubaasa kuba bugumire munonga, kwonka toshemereire kutiina. Hariho bingi ebi orikubaasa kukora kwetebeekanisa. Kandi ijuka ngu oine omuhwezi orikukirayo, niwe Yehova Ruhanga. Atwire naakuhwera kandi naayenda kugumizamu naakuhwera ebiro byona! (1 Pet. 5:10) Naija kukuha amaani kandi akuhwere kugumisiriza oburemeezi bw’emiringo yoona. Waikiriza Yehova kukuhwera, tihaine ekiraakuremese kuguma omuhamiireho.—Zab. 119:165; Rom. 8:​38, 39.