Gamba Amazima ga Baibuli omu Muringo gw’Embabazi

1. Twine kukora ki kubaasa kuba bamwe aha b’eka ya Yehova?

WAABUGANA Omukristaayo mugyenzi waawe omurundi gw’okubanza, kimwe aha bibuuzo ebi orikukira kumubuuza n’eki, “okeega ota amazima agarikukwata ahari Yehova?” Abamwe nibagarukamu ngu “bakakurira omu mazima” kandi abandi ngu nibwo baherize “kwija omu mazima.” Nitugarukamu tutyo ahabw’okugira ngu amazima g’Ekigambo kya Ruhanga gakatuhwera kukora empinduka omu mbeera zaitu. Ahabw’enki? Ahakuba nitumanya ngu kubaasa kuba omwe aha ka ya Yehova twine kworeka ngu nitukunda amazima, kandi nitugagyenderaho. Ekyo nikitwariramu okuba ab’amazima omu bi turikugamba n’ebi turikukora.—Zab. 15:​1-3.

2. (a) Abantu bakaba nibamanya ki ahari Yesu? (b) Amazima agu Yesu yaayegyeise abantu gakaba nigaija kubakwataho gata?

² Yesu akaba naakira kugamba amazima. Abazigu be bakeetegyereza ngu akaba naagamba amazima n’obu bamwe baabaire batarikukunda ebi yaabaire naayegyesa. (Mat. 22:16) Yesu akagamba oku ebi yaabaire naayegyesa byabaire nibiija kukwata aha bantu arikugira ati: “Nkaija kutaanisa omwojo na ishe, omwishiki na nyina, omukazi na nyinazaara.” (Mat. 10:35) Yesu akaba atarikwenda ngu abantu baguubwe kubi ahabw’obutumwa obu yaabaire naabuurira n’entumwa ze, kwonka akaba naamanya ngu ekyo nikiza kubaho. (Mat. 23:37) Akaba naamanya ngu obutumwa bwe nibwija kubaganisa abarikukunda amazima ga Baibuli n’abatarikugakunda.—2 Tes. 2:​9-11.

3. Nituza kugamba ahari ki omu kicweka eki?

³ Nka Yesu, nituteeraho kugamba amazima obwire bwona, n’obu okukora ekyo kyakuba kitarikushemeza abandi. Nitubuurira kandi twegyesa amazima ga Baibuli n’obu abamwe baakuba nibaguubwa kubi ahabw’ebi turikwegyesa. Mbwenu shi eki nikimanyisa ngu titushemereire kuteekateeka aha ku twine kugamba amazima n’obu twine kugagamba? Ngaaha buzima! Omu kicweka eki, nituza kubanza kugarukamu ekibuuzo kikuru eki: Nitubaasa kwiha nkahi amazima? Bwanyima nituza kugarukamu ebibuuzo ebi: Ahabw’enki twine kugamba amazima? Twine kugagamba tuta, kandi ryari? Eby’okugarukamu by’ebibuuzo ebyo nibiija kutuhwera kugamba amazima omu muringo gw’embabazi, ogw’obwengye kandi omu bwire obuhikire .

NITUBAASA KWIHA NKAHI AMAZIMA?

4. Ahabw’enki nitubaasa kugira ngu Yehova niwe bukomooko bw’amazima?

⁴ Yehova niwe bukomooko bw’amazima, kandi buri kimwe eki arikugamba nigaba gari amazima. Nk’eky’okureeberaho, ebi arikugamba aha kihikire n’ekigwire nibyesigwa. (Zab. 19:9; 119:​142, 151) Byona ebi arikugamba aha biro by’omumaisho nibihikiirira. (Isa. 55:​10, 11) Kandi naahikiiriza ebi arikuraganisa. (Kur. 23:19) Nangwa, Yehova tarikubeiha. (Heb. 6:18) Niyo nshonga ahabw’enki naamanywa nka “Ruhanga orikwesigwa [nari ow’amazima]”.—Zab. 31:5.

5. Ahabw’enki kitagumire kusherura Ruhanga w’amazima? Shoboorora. (Ebyakozirwe 17:27)

⁵ Oyihireho eki abantu abamwe barikugamba, tikigumire kusherura Yehova, Ruhanga w’amazima. Ebyahangirwe ebitwetooroire nibituhamiza ngu ariho. (Rom. 1:20) Obu entumwa Paulo yaabaire naagamba n’abantu abashomire munonga omuri Aseene, akagira ngu Ruhanga naayenda tumusherure kandi ngu ‘tari hare n’omuntu weena omuriitwe.’ (Shoma Ebyakozirwe 17:27.) Nangwa, Yehova naayeyiriza haihi abantu abacureezi abarikusherura amazima.—Yoh. 6:44.

6. Ni mazima ki agari omu Baibuli, kandi okugamanya nikikureetera kwehurira ota?

⁶ Gumwe aha miringo erikutuhwera kumanya ebirikukwata ahari Yehova n’okwega Baibuli. Abashaija abaahandiikire Baibuli bakahwerwa omwoyo gwa Ruhanga ogurikwera. (2 Pet. 1:​20, 21) N’ahabw’ekyo byona ebiri omu Baibuli n’eby’amazima, kandi twine kubyesiga. Nk’eky’okureeberaho, nitubaasa kwesiga ebi Baibuli erikugamba aha bukomooko bw’eiguru n’ebintu ebiine amagara. (Kut. 1:​1, 26) Kandi nitubaasa kwikiriza ebi erikugamba ahabw’enki nitushiisha, n’enshonga ahabw’enki hariho okubonabona kwingi n’okufa. (Rom. 5:12; 6:23) Nitubaasa kwesigira kimwe eki erikugamba aha ku Yehova araakorese Omwana we kwihaho oburemeezi bwona obureetsirweho Sitaane “ishe w’ebishuba.” (Yoh. 8:44; Rom. 16:20) Kandi nitubaasa kwesiga eki Baibuli erikuraganisa ngu Yesu naija kucwekyereza ababi, azoore abaafiire, ahindure ensi Paradiso, kandi atuhwere kuba abahikiriire. (Yoh. 11:​25, 26; 1 Yoh. 3:8) Yehova atwegyeise amazima, kandi yaatuha omugisha gw’okugagambira abandi. (Mat. 28:​19, 20) Obwo ka n’obujunaanizibwa bw’omuhendo!

AHABW’ENKI NITUGAMBA AMAZIMA?

7-8. Niki ekiine kutuhiga kugamba amazima? Ha eky’okureeberaho. (Mako 3:​11, 12) (Reeba n’ebishushani.)

⁷ Nk’oku kyaba kyagambirwe, twine kugamba amazima kubaasa kuba omu ka ya Yehova. Kwonka kubaasa kumushemeza, twine kukora ekirikukira aha kugamba amazima. Yehova naafayo aha nshonga erikutureetera kugamba amazima. Teekateeka aha kyabaireho obu Yesu yaabaire naabuurira omu nsi. (Shoma Mako 3:​11, 12.) Obu yaabaire naabuurira haihi n’enyanja ya Galilaaya, abantu baingi bakaija ahu yaabaire ari. Omuribo hakaba harimu abaabaire bariho baadaimoni abaagwire omu maisho ge, reero baataka barikugira bati: “Ori Omwana wa Ruhanga.” Ahabw’enki baadaimoni baagambire amazima agarikukwata ahari Yesu? Nibabaasa kuba baabaire nibenda ngu abaabaire babahurikiize babeesigye reero babaase kubaiha aha kuheereza Yehova. Eki baagambire gakaba gari amazima, kwonka ekigyendererwa kyabo kikaba kiri eky’okweyendeza. Tibarabaasize kubeihabeiha Yesu nari kumushemeza. N’ahabw’ekyo akaragiira baadaimoni abo kutagambira abantu ebirikumukwataho.

⁸ Ekyo nikitwegyesa eishomo ki? Enshonga ezirikutureetera kugamba amazima ni nkuru ahari Yehova. N’ahabw’ekyo enshonga erikutureetera kwegyesa amazima eshemereire kuba eri nungi, kandi ey’okuhwera abu turikwegyesa kuha Yehova ekitiinisa omu mwanya gw’okuba niitwe baakiha.—Mat. 5:16; gyeragyeranisa Ebyakozirwe 14:​12-15.

9. Twine kwetantara kukora ki, kandi ahabw’enki?

⁹ Teekateeka aha mbeera endiijo ahu twine kwetantara kwesherurira ekitiinisa. Ka tugire ngu ow’eishe-emwe oine obujunaanizibwa yaatugambira ekihama, reero naitwe tukatandika kukigambira abandi. Abantu abu turikukigambira baamanya ngu tubagambiire amazima, nibabaasa kuteekateeka ngu nitumanya ebihama bingi. Kandi ekyo nikibaasa kubareetera kutureeba nk’ab’amaani, kwonka Yehova tarikutureeba atyo. (Enf. 11:13) Ahabw’enki? Ahakuba n’obu twakuba tugambire amazima, nituba tugambire ebihama ebi tutashemereire kugamba kandi twine ekigyendererwa kitahikire.

OKU TWINE KUGAMBA AMAZIMA

10. “Ebigambo eby’embabazi” nibimanyisa ki? (Abakolosai 4:6)

¹⁰ Shoma Abakolosai 4:6. Entumwa Paulo akaijutsya Abakristaayo omuri Kolosai ngu ebigambo byabo “bigume biri eby’embabazi.” Akaba naamanyisa ki? Ekigambo ky’Orugriika eki yaakoreise nikimanyisa ngu ebigambo byaitu bishemereire kuba nibigasira abarikubihurira, kandi birikushemeza.

11-12. Ahabw’enki twine kwegyendesereza twaba nitwegyesa amazima? Ha eky’okureeberaho. (Reeba n’ebishushani.)

¹¹ Tushemereire kugyendera aha buhabuzi bwa Paulo turikukoresa ebigambo by’embabazi twaba nitwegyesa abandi amazima. Baibuli neegyeragyeranisa amazima gaayo na rurara y’obwogi erikubaasa kutaanisa amagara gaitu n’omwoyo. Ekirikumanyisa ngu neebaasa kusheeshuura enyehurira zaitu ez’omu mutima n’ebigyendererwa byaitu. (Heb. 4:12) Kwonka twaba tutakoreise Baibuli omu muringo gw’obwengye, nitubaasa kureetera abantu kuguubwa kubi nari kuteera empaka ahu kitarikwetengyesa. Ekyo nikibaasa kubaho kita?

¹² Teekateeka ahari eki. Ka tugire ngu omu kubuurira twabugana omushaija orikuramya ebishushani, kandi orikukunda kukuza Noiri na Paasika ari n’eka ye. Nitubaasa kukoresa Baibuli kumworeka ngu n’eky’obushema kuramya ebishushani ebitaine magara, kandi ngu Paasika na Noiri n’emikoro y’ekikaafiire. (Isa. 44:​14-20; 2 Kor. 6:​14-17) Kwonka twakora ekyo aha kugaaniira nawe omurundi gw’okubanza, nituba twagamba amazima, kwonka nituba twaremwa kukoresa Ekigambo kya Ruhanga omu muringo gw’obwengye.

13. Nitubaasa kukoresa tuta ebigambo ebiri nk’ebirimu omwonyo?

¹³ Paulo akagaruka yaagira ngu ebigambo byaitu biine kuba nibishemeza nk’ebirimu omwonyo. Akaba atarikumanyisa ngu twine kubuzabuza amazima nari kugashereka. Kureka, akaba ariyo naatuhiga kukoresa ebigambo ebiri nk’ebirimu omwonyo kubaasa kwegyesa abantu amazima omu muringo oguraabareetere kwenda kuhurikiza. (Yob. 12:11) Tikyorobi kukora ekyo. Aha bikwatiraine n’eby’okurya ebya butoosha, obumwe nitubaasa kuteekateeka ngu abandi baine kurya eby’okurya ebi turikukunda. Nikyo kimwe, nitubaasa kuteekateeka ngu omuringo ogu turikugambamu gwine kushemeza buri omwe. Kwonka tikwo kiri. Nk’eky’okureeberaho, abantu ab’entwaza emwe nibabaasa kuba nibagamba eki barikuteekateeka batarikutsiintsina, n’obu baakuba nibagamba n’abantu abarikubakira. Kwonka ab’entwaza endiijo nibabaasa kuba nibareeba emigambire egyo nk’etarikwikirizibwa nari nk’erikugwisa kubi. Paulo akagira ngu twine ‘kumanya oku tushemereire kugarukamu [buri] muntu.’ Ekyo nikimanyisa ngu ebi turikugamba tibiine kwegamira aha bi turikukunda nari entwaza yaitu, kureka aha ki orikutuhurikiza arikukunda.

OBU TWINE KUGAMBA AMAZIMA

14. Ahabw’enki Yesu obu yaabaire ari omu nsi, ataregyeise abeegi be byona ebi arikumanya? Shoboorora.

¹⁴ Yesu akaba agambira abakuratsi be omu muringo gw’embabazi, kandi abeegyesa ebintu bingi. (Mak. 6:34) N’obu araabe yaabaire aine bingi by’okubeegyesa, tarateireho kubibeegyesa mukono gumwe. Ahabw’okugira ngu akaba naamanya obugarukiro bwabo, akeetegyereza ngu bukaba butari bwire burungi bw’okubeegyesa amazima agamwe. Nangwa, akagira ngu bakaba batarikubaasa kwemera amazima ago. (Yoh. 16:12) Ekyo nikitwegyesa ki?

15. Mbwenu shi twine kwegyesa abeegi ba Baibuli buri kimwe eki turikumanya omurundi gumwe? Shoboorora. (Enfumu 25:11) (Reeba n’ekishushani.)

¹⁵ Eky’okureeberaho kya Yesu nikitwegyesa ngu titwine kwegyesa omuntu amazima goona agu turikumanya omurundi gumwe. Mbwenu shi nitubaasa kumutooreza tuta? Twine kuteekateeka aha mbeera ei omuntu arimu. Garuka oteekateekye aha mushaija orikukunda kukuza Noiri na Paasika ari n’eka ye. Nitumanya ngu emikoro egyo neekomooka omu migyenzo y’ekikaafiire, kandi terikusiimwa Ruhanga. Kwonka ka tugire ngu waatandika kumwegyesa Baibuli harikuburayo saabiiti emwe nari ibiri Noiri ekahika. Mbwenu shi nituba nitugamba omu muringo gw’embabazi twamworeka eki Baibuli erikugamba aha kukuza emikoro egyo y’ekikaafiire, kandi tukateekateeka ngu naija kureka kugikuza ahonaaho? N’eky’amazima, abeegi ba Baibuli abamwe nibarahuka kugyendera aha bi barikwega, kwonka abandi nikibatwarira obwire kuhindura ebikorwa byabo n’emiteekateekyere yaabo. Nitubaasa kuhwera abeegi baitu kutunguuka twabagambira ebi baine kumanya omu bwire obu barikubaasa kubiikiriza.—Shoma Enfumu 25:11.

16. Nitubaasa kuhwera tuta abeegi ba Baibuli kugumizamu “nibagyendera omu mazima”?

¹⁶ Okuhwera abandi kwega ebirikukwata ahari Yehova ni kimwe aha bintu ebirikukirayo kutureetera okushemererwa. Nitubaasa kubahwera kugumizamu “nibagyendera omu mazima” turikukora ebi: Turikubateeraho eky’okureeberaho kirungi. (3 Yoh. 3, 4) Turikuhamya ngu ebi turikukora nibyoreka ngu nitwikiririza omu biraganiso ebiri omu Kigambo kya Ruhanga. Turikugamba amazima n’ekigyendererwa kirungi. Turikugamba omu muringo gw’embabazi, ogw’obwengye kandi omu bwire obuhikire twaba nitwegyesa amazima. Kandi twine kuhimbisa Yehova omu mwanya gw’okwehimbisa. Waakora otyo, noija kworeka ngu ori aha rubaju rwa Yehova, Ruhanga w’amazima.