Ebirikutiinisa Ebirikubaho omu Rutaro
Omu rutaro nihabamu ebintu bibi munonga ebirikukwata aha baserukare n’abantu baabutoosha. Abantu abo nibamanya eki ekyo kirikumanyisa
ABASERUKARE
“Nihabaho ebintu bibi munonga, nk’eky’okureeberaho nooreeba abantu barikuhutaara, barikufa. Kandi nooba oyerarikiriire buri kaire.”—Gary, Britain.
“Bakanteera amasasi omu mugongo n’aha maisho, kandi nkareeba abantu baingi nibaitwa otwariiremu abaana n’abakaikwire. Orutaro nirukureetera kutagira saasi.”—Wilmar, Colombia.
“Baarasha omuntu omu maisho gaawe, torikubaasa kwebwa ekyabaho. Nooguma noijuka okuboroga n’okutaka kwe. Buzima kigumire kwebwa omuntu ogwo.”—Zafirah, United States.
ABANTU ABAABUTOOSHA
“Nkeehurira nk’otarigaruka kugira okushemererwa. Nooba otiinire kufeerwa amagara gaawe, kwonka okukira munonga ag’ab’eka yaawe n’abanywani baawe.”—Oleksandra, Ukraine.
“Nikitiinisa munonga kwemerera omu runyiriri otegyereize eby’okurya kuruga shaaha munaana z’ekiro kuhika shaaha itaano z’ekiro ekindi kandi orikumanya ngu eshaaha yoona noobaasa kuteerwa eisasi kitagyendereirwe.”—Daler, Tajikistan.
“Abazaire bangye bakafeera omu rutaro. Nkatsigara ndi efuuzi ntaine w’okundeeberera n’okumpuumuriza.”—Marie, Rwanda.
N’obu entaro ziraabe nizireeta obusaasi, abantu abaagambwaho aha ruguru hati baine obusingye. Kandi nibahamiza kimwe ngu entaro zoona n’obutabanguko biri hakye kuhwaho. Omunaara gw’Omurinzi ogu niguza kushoboorora oku ekyo kiraabeho.