‘Yeteekateekyere Omurimo Gwona Omurungi’
1 Yesu ku yaatandikire kampeyini nsya y’okubuurira, akatwara obwire yaatendeka entumwa ze. (Mat. 10:5-14) N’obu twena turaabe twine bingi eby’okukora, okugira edakiika nkye tuketebeekanisa tutakagiire kubuurira enju aha ndiijo nikiija kurugamu ebirungi.—2 Kor. 9:6.
2 Oku Turikubaasa Kwetebeekanisa: Okwetebeekanisa okurungi nikutandika n’okumanya ebiri omu bitabo ebi turikwenda kugaba. Kandi tushemereire kuteekateeka aha bantu abari omu kicweka eki turikubuuriramu. Baine buremeezi ki nari n’enki ebirikubeerarikiriza? Ni nyikiriza ki eziri omu kicweka ekyo? Nitubaasa kureeba n’enyanjura eziri omu Obuheereza Bwaitu obw’Obukama hamwe n’eziri omu katabo Reasoning From the Scriptures okureeba oku twakutandika kugaaniira n’abantu.
3 Okuta omutima aha by’okureeberaho ebirikuheebwa omu Ruteerane rw’Obuheereza nakyo nikiija kutuhwera. Twamanya kukoresa gye enyanjura zaitu, nitwija kuba nitukoresa obwire bukye kutebeekanisa. Kwonka butoosha tutakagiire omu kubuurira, twatunga akiire tukateekateeka aha bi turikuza kugamba kandi tukagumizamu kuboneza enyanjura zaitu, nitwija kwongyera kuba ababuurizi barungi. Kandi tushemereire kuhamya ngu twine ebitabo byona ebi turikuza kukoresa omu kubuurira.
4 N’enki ekirikwija kutuhwera kwijuka enyanjura zaitu? Okuzeegyezamu omu iraka ririkuhurirwa n’ekintu kimwe ekirikutuhwera okuguma nitwijuka ebi turikwenda kugamba. Abamwe nibakunda kwegyeza omu nyanjura zaabo bari omu kushoma kwabo okw’amaka. Abamwe nibashanga kirikuhwera okuhandiika omu bugufu enyanjura zaabo aha kapapura reero bakareebaho batakahikire aha nju.
5 Enshonga Ahabw’enki Nikuhwera: Okwetebeekanisa gye nikutuhwera kwongyera kubuurira gye n’okutunga okushemererwa omu kubuurira. Nikutuhwera kutatiina twaba nitubuurira. Nikutubaasisa kuta omutima aha u turikubuurira omu mwanya gw’okuguta aha bi turikugamba. Ekindi, okumanya ebiri omu bitabo nikiija kutuhwera kugira omuhimbo twaba nitubigaba.
6 Ebyahandiikirwe nibituhiga ‘kweteekateekyera omurimo gwona omurungi.’ (Tito 3:1) Tihariho murimo murungi ogurikukira ogw’okubuurira amakuru marungi. Twaba twetebeekaniise gye, nitworeka ngu nituha ekitiinisa ou turikubuurira owaikiriza kuhurikiza, hamwe na Yehova, Ruhanga ou turikujwekyera.—Isa. 43:10.