Yeyongyere Kukora Gye omu Kubuurira Kwawe
1 Tataitwe ow’omu iguru naashemererwa abaheereza be ku barikweyongyera kukura omu by’omwoyo. Eki nikitwariramu okweyongyera kukora gye nk’omubuurizi w’amakuru marungi. Paulo akahiga omureeberezi Timoseo okuguma naataho omutima kushoma n’okwegyesa kugira ngu okweyongyera kwe kukora gye kubaase kureebwa. (1 Tim. 4:13-15) Twena tushemereire kuteeraho kuboneza omuringo ogu turikubuuriramu, nangwa n’abo abamazire obwire buraingwa nibabuurira.
2 Yeteereho Ebigyendererwa: Okubaasa kweyongyera kukora gye omu kubuurira, nikyetengyesa okweteeraho ebigyendererwa. Ni bigyendererwa ki ebimwe ebi turikubaasa kweteeraho? Nitubaasa kuteeraho kweyongyera kukoresa gye Baibuli. (Efe. 6:17) Obundi hariho omuringo gw’okubuurira ogu turikwetenga kubonezamu, ka tugire nk’okubuurira aha nguuto, kubuurira turikukoresa esimu, nari okubuurira omu myanya erikushuuburirwamu. Nari nitubaasa kwongyera kutamu amaani omu kugurukayo ahari abo abarikwenda kumanya ebirikukiraho. Ekindi kigyendererwa kirungi nikibaasa kuba okwongyera kuboneza oku turikutandika kwegyesa abantu Baibuli.
3 Ebiraatuhwere: Enteerane z’ekibiina, n’okukira munonga Eishomero ry’Obuheereza n’Oruteerane rw’Obuheereza bitebeekanisiibwe kutuhwera kweyongyera kukora gye omu kubuurira. Ku turaate amaani omu kwetebeekanisiza enteerane ezi n’okuziijamu, kandi tukata n’omu nkora obuhabuzi obu turikuheebwa, nitwija kugasirwa munonga.—2 Kor. 9:6.
4 Kandi nitwetenga kuhwerahwerana okubaasa kukora gye omu kubuurira. (Enf. 27:17) Okuhurikiriza gye enyanjura ez’abo abu turikuba nitubuurira nabo nikiija kutuhwera kweyongyera kuboneza omu nyanjura zaitu. Ekindi, orikwebembera okushoma ekitabo okw’ekibiina naabaasa kutebeekanisa kugira ngu buri omwe atungye obuhwezi obu arikwetenga. Ka n’omugisha kutunga payoniya nari omubuurizi ondiijo weena omazire obwire buraingwa arikubuurira kutuhwera kubuurira gye kandi tukatunga amashemererwa omu murimo gw’okubuurira! Omu bu turikushoma nabo ekitabo, harimu omubuurizi omusya? Nitubaasa kumushaba kubuuriraho nawe.
5 Omurimo ogurikukirayo obukuru ogurikukorwa obunaku obu n’okubuurira okw’Ekikristaayo. Turikuha Yehova “ekitambo ky’okusiima,” nitwenda kumuha ekirikukirayo oburungi. (Heb. 13:15) Ku turikuteeraho kweyongyera omu maisho omu kubuurira, nitwija kuba abakozi ‘abatashemereire kukwatwa nshoni, abarikushoboorora gye ekigambo ky’amazima.’—2 Tim. 2:15.