“Mube Abarikusiima”
1 Obu Yesu yaatambira ababembe ikumi, omwe wenka niwe yaagarukire kumwebaza. Yesu akabuuza ati: “Abaashemezibwa t’ikumi? Omwenda barahi?” (Luka 17:11-19) Ka ni kikuru itwe okuba abarikusiima kandi tukeebaza ahabwa buri kiconco kyona ekirungi hamwe n’omugisha ogurikutuheebwa Tataitwe wa rukundo ow’omu iguru, Ruhanga Yehova!—Kol. 3:15; Yak. 1:17.
2 Tushemereire kwebaza ahabwa bintu ki ebimwe? Nitwebaza ahabw’ekitambo, ekiconco ekirikukirayo eki Ruhanga yaahaire abantu. (Yoh. 3:16) Kandi nitusiima Ruhanga ahabw’okutweyiriza haihi. (Yoh. 6:44) Obumwe bwaitu obw’Ekikristaayo n’enshonga endiijo eshemereire kutureetera kwebaza. (Zab. 133:1-3) Hatariho kubangaanisa, noobaasa kuteekateeka aha biconco ebindi ebi Yehova arikutuha. Titurikwenda kuba nk’Abaisraeli entasiima abaayebirwe ebi Yehova yaabakoreire!—Zab. 106:12, 13.
3 Yoreka Okusiima: N’obu ababembe ikumi boona baraabe baasiimire eki Yesu yaabakoreire, omwe wenka niwe yaayorekire ngu yaasiima. (Luka 17:15) Naitwe nitworeka okusiima turikwejumbira kimwe omu kubuurira. Buzima twaba nitusiima byona ebi Tataitwe ow’omu iguru akozire, nikiija kutuhiga kutooreza rukundo ye n’embabazi ze turikugambira abandi ebirikumukwataho. (Luka 6:45) Kandi twaba nitugambira abandi ebirikukwata aha ‘mirimo ya Yehova hamwe n’oku arikututeekateekaho,’ okusiima na rukundo ei twiniire Yehova nibiija kweyongyerera.—Zab. 40:5.
4 Higa Abandi Kworeka Okusiima: Tushemereire kusherura emiringo ei twakuhweramu abaana baitu hamwe n’abu turikwegyesa Baibuli kugira omutima gw’okusiima. Abazaire nibabaasa kukora eki nka baaba nibareeba ebihangwa bya Yehova bari n’abaana baabo. (Rom. 1:20) Twaba nitwegyesa omuntu Baibuli, nitubaasa kumubuuza, “Eki nikitworeka ngu Yehova aine mitwarize ki?” Okusiima kw’omwegi ku kurikweyongyera, na rukundo ei ainiire Yehova hamwe n’okumariirira kwe kumushemeza nibiija kweyongyera.
5 Omu biro ebi eby’emperu, abantu baingi n’entasiima. (2 Tim. 3:1, 2) Ka nikishemeza Yehova yaareeba abaheereza be abehaireyo nibooreka okusiima barikwejumbira kimwe omu kubuurira!—Yak. 1:22-25.