Akagyenda na Ruhanga

ENOKA akaba naamanya eki kirikumanyisa okwehurira nk’otsigirweho. Akaba naataana n’abantu abandi omu bunaku bwe. Enoka niwe mushaija wenka ou Baibuli erikugambaho ngu ‘akaguma naagyenda na Ruhanga’ omu bwire obwo. Eki kikabaasika kita aha muntu buntu orikutuura omu nsi? Kandi nitwegyera ki ahari Enoka aha bikwatiraine n’obumanzi?

Enoka akagyenda na Ruhanga ow’amazima omu miringo nk’ebiri, ahabw’ebi yaayangire kukora n’ebi yaakozire. Akanga kushushana n’abantu abatarikuheereza Ruhanga abu yaabaire naatuuramu. Akaba ari ow’obusingye bwa mushanju kuruga ahari Adamu na Haawa. Omu bwire obwo, Adamu akaba akihuriire kwonka akuzire munonga. (Reeba okukuratana kw’obwire, “Okuruga aha Bashaija ba Ira Okuhika aha Baramuzi.”) Obugomi bw’abazaire baitu ab’okubanza bukaba bujanjaire omu bantu boona. Mutabani waabo Kaini akaita omurumuna Abeeli, omuntu owaabandize kworeka okwikiriza. Bamwe aha baana ba Kaini n’abaijukuru bakaba bari enshaarizi nk’ishebo, nari n’okukiraho. (Kut. 4:​23, 24) Enoka akagira obumanzi yaayanga kuba enshaarizi nk’abantu b’obunaku bwe. Akaguma ari omushaija w’obusingye, kandi eki kikashemeza Ruhanga.

Omu busingye bw’enyima Enoka atakazairwe, ‘abantu bakatandika kutakira eiziina rya’ Yehova. (Kut. 4:26) Nikireebeka bakaba nibaritakira omu muringo gw’okurogota nari gw’okurishiisha, ekyarugiremu ediini y’ebishuba. Enoka akanga kubeegaitaho. Akaba naakunda eiziina rya Yehova eririkwera kandi arikuriha ekitiinisa, n’ahabw’ekyo akaguma ari ow’omutaano ahari bagyenzi be.

Enoka akaba aine n’okwongyera kugira obumanzi kubaasa kukora ebi Yehova arikumwenza. Ruhanga akaha Enoka obuheereza bw’omutaano obw’okukora nka nabi. Akaba aine kumanyisa abantu obutumwa abaabaire nibataanira kimwe nawe. Obutumwa bukaba nibugira buti: ‘Reeba, [Yehova] akaija n’abarikwera be [nyamwingi], okucwera boona orubanja, n’okurusingisa boona abatarikutiina Ruhanga ahabw’eby’okutamutiina ebi baakozire bakamucumuraho, kandi n’ebigambo [birikuhemurana] byona ebi abasiisi abatarikutiina Ruhanga baamugambireho nibamurwanisa.’

Yetegyereze ngu obunabi bwa Enoka bukagambwa orikushusha ngu Ruhanga akaba yaaherize kucwa orubanja kandi byahikiriire. Obu bukaba buri obuhame bw’amaani ngu ebigambo bya Enoka nibiteekwa kuhikiirira. Kandi obutumwa obu bukaba buri orubanja rw’amaani. Omu butumwa bwa Enoka obu, ebigambo ‘abatarikutiina Ruhanga’ akabigarukamu emirundi eshatu! Ebigambo ebyo buzima bikacumita abantu abaahuriire Enoka naabuurira. Kwonka, akagira obumanzi yaabagambira ebi Yehova yaabaire naayenda ngu bahurire.

Abantu bakatwaza bata? Baibuli terikukigamba butunu, kwonka neeyoreka ngu obwire bukahika Enoka yaayeshanga ari omu kabi k’amaani. Nitukimanya tuta? Nitushoma omu Baibuli tuti: ‘Akabura, ahabw’okuba Ruhanga akamutwara.’ Hakabaho ki? Nikireebeka Enoka akahiiganisibwa abantu babi ab’obunaku obwo. Yehova omu mwanya gw’okubaikiriza kukora kubi munywani we Enoka nari kumwita, akooreka rukundo yaamufurura yaamwiha omu kabi yaafa omu muringo gw’obusingye. Omu muringo ogu, Enoka akaba naija kuguma omu biteekateeko bya Yehova, ahu hataine n’omwe owaabaire naabaasa kumukora kubi.

Kwonka, Yehova akabanza kuha Enoka ekiconco ky’omutaano. Nitushoma omu Baibuli tuti: “[Enoka] ku yaabaire atakatwairwe, akahamibwa ku ashemeize Ruhanga.” Obundi Yehova akaha Enoka okworekwa kumanya embeera nungi y’obusingye ei yaabaire naija kubamu omu biro by’omumaisho omu paradiso omu nsi! Enoka atakaikize ogw’aha muheru, akaba naahamiza kimwe ngu, Yehova naamukunda, ahabw’okwikiriza kwe kw’amaani n’obumanzi bwe bwingi!

Shoma omu Baibuli ebirikumukwataho:

• Okutandika 5:​21-24

• Abaheburaayo 11:5

• Yuda 14, 15

Eky’okugaaniiraho:

Enoka akooreka obumanzi mu miringo ki?

Yongyera Kucondooza

1. 1. Abantu nibabaasa kuba baatandikire bata “kutakira eiziina rya” Yehova? (Kut. 4:26; w01 9/15 29 kacw. 3-wcgr)

   Eky’okugarukamu kyawe

2. 2. Enoka niwe yaabandize kuba nabi wa Ruhanga. Akakora ki? Akabaasa ata kuhikiiriza obuheereza bwe? (w01 9/15 31 kacw. 5-wcgr)

   Eky’okugarukamu kyawe

3. 3. Enoka atakatandikire kugamba obunabi, ahabw’enki arikubaasa kuba yaabaire naamanya ngu obumanzi bwe nibwija kugyezibwa? (w06 10/1 19 kacw. 13-14-wcgr) A

   Eky’okugarukamu kyawe

   

4. 4. Noobaasa kushoboorora ota ngu Enoka taratwirwe omu iguru, nk’oku abandi barikuteekateeka? (Yoh. 3:13; Heb. 11:​5, 13)

   Eky’okugarukamu kyawe

Teekateeka aha Mashomo

• Ni ryari obu turikuba twine kugira obumanzi bw’okubuurira? Kurugiirira aha ky’okureeberaho kya Enoka, niki ekirikubaasa kutuhwera? B

  Eky’okugarukamu kyawe

  

• Yehova naayehurira ata twagyenda nawe twine obumanzi? (Enf. 27:11; Heb. 11:5)

  Eky’okugarukamu kyawe

• Noobaasa kworeka ota obumanzi nka Enoka?

  Eky’okugarukamu kyawe

Teekateeka aha Nshonga Enkuru

• Ebirikukwata ahari Enoka nibikwegyesa ki ahari Yehova?

  Eky’okugarukamu kyawe

• Ebirikukwata ahari Enoka nibihikaana bita n’ekigyendererwa kya Yehova?

  Eky’okugarukamu kyawe

• Nooyenda kubuuza ki Enoka ku araazooke?

  Eky’okugarukamu kyawe

Yega Ebirikukiraho

Eky’okureeberaho kya Enoka nikibaasa kukuhwera kita omu bwire bw’obushaarizi?

Tooreza Abaabaire Baine Okwikiriza, Batari Abaabaire Batakwine—Enoka, Atari Lameka (2:53)

Yetegyereze ekyahweraire Enoka kugira okwikiriza.

“Gyenda na Ruhanga omu Bwire Bugumire Obu” (w05 9/1 13-17-wcgr)