2 NOA
Akasingisa Ensi Orubanja
BWANYIMA y’omurembe gwa Enoka, hakabaho obugomi omu iguru omu baana ba Ruhanga ab’omwoyo. Baamaraika abaagomire bakagira ekyetengo ky’okuteerana baayetaho omubiri gw’abantu baija omu nsi baatunga abakazi boona abu baabaire nibenda. Bakazaara abaana abatari ba butoosha, abaabaire bari ebihanda, bari bahango munonga barikwetwa Abanefuri. N’ekyarugiremu, abantu omu nsi bakaba babi munonga. Ruhanga akareeba ngu abantu barungi abu yaabaire ahangire omu nsi, bakaba basiisikaire. Kwonka omushaija omwe akaba ari ow’omutaano. Akaba ari Noa mwijukuru wa Enoka.
Nka Enoka, Noa nawe akaba ari omushaija otaine kamogo. Nitushoma omu Baibuli tuti: ‘Noa akaguma naagyenda na Ruhanga.’ Bwanyima akatunga omukazi, kandi we n’omukazi we bakegyesa batabani baabo bashatu kworobera Yehova. Eki kikareetera eka ya Noa kuba ey’omutaano aha maka agandi.
Eizooba rimwe, Yehova akagambira Noa ngu akaba acwiremu kucwekyereza ababi boona omu nsi. Kwonka Yehova akaha Noa amatsiko. Noa akaba naija kwombeka emeeri mpango kugira ngu ebiine amagara ebimwe bicungurwe. Noa akaba atakareebaga Omwegyemure nk’ogu Yehova yaagizire ngu nigwija kubaho. Kandi akaba atakombekahoga emeeri mpango. Kwonka akeesiga ebiraganiso bya Yehova, yaatandika kukora omurimo ogu yaahairwe.
Noa n’eka ye bakaba baine abazigu barikutiinisa abaabaire nibanga obutumwa bwabo n’omurimo gwabo
Noa n’ab’eka ye bakaba baine kugira obumanzi bw’okukora omurimo ogu. Nibabaasa kuba baatungire abantu baingi abarikubahakanisa n’okubashungisa. Baamaraika abaataireho emibiri y’abantu buzima bakaba bari abazigu abarikutiinisa, kandi abaana baabo bakaba bari ebihanda endahuzi. Kwonka Noa, omukazi we omwesigwa, batabani baabo bashatu, n’abakazi baabo, boona hamwe munaana, bakagumizamu nibakora. Bakagumizamu nibakora emeeri kumara emyaka mingi, obundi nka 50 nari n’okurengamu. Mporampora omurimo gukagumizamu nigugyenda omu maisho.
Omu bwire obwo, Noa taragumire ahunami. Omushaija omwesigwa ogwo bwanyima akeetwa omubuurizi “w’okuhikiirira.” Nk’omutwe gw’eka, akeebembera eka ye omu kurabura abantu ahabw’ekyo ekyabaire nikiija kubaho. Kwonka tihaine n’omwe aheeru y’eka ye owaahurikiize. Nikireebeka nangwa na baingi aha banyabuzaare be bakanga kumuhurikiza n’okugira eki baakora. Abantu bakaba batarikwenda kuhindura emitwarize yaabo mibi. Noa omushaija w’okwikiriza akaba naataanira kimwe aha bantu b’ensi abu yaabaire naatuuramu. Tikirikutangaaza kureeba ngu Baibuli neegamba ahari Noa eti: ‘Ahabw’okwikiriza, akasingisa ensi orubanja.’
Emeeri ekarugaho yaahwa. Hati Noa n’ab’eka ye bakaba baine kurundaana eby’okurya ebyabo n’eby’enyamaishwa zoona ezi baabaire nibaija kureeta omu meeri. Bwanyima, hakabaho ekintu kirikushemeza. Enyamaishwa ez’emiringo yoona, enshaija n’enkazi, zikatandika kwija kutaaha omu meeri! Zeekundiire, ‘hakataahamu ibiri-ibiri, zaashanga Noa omu meeri, enshaija n’enkazi.’
Ruhanga akaba agambiire Noa kutaatsya eka ye omu meeri, ahakuba enjura ekaba neija kugwa omu biro mushanju. Noobaasa kuteera akashushani eka erikumariiriza omurimo gw’okurundaana eby’okurya omu meeri n’ebindi ebyabaire nibyetengyesa omu meeri. Obundi abantu bakoongyera kubashekyerera munonga. Kwonka ku baaherize kuta buri imwe omu meeri nabo bakataahamu, Yehova akakiinga orwigi. Eki nikibaasa kuba kyahunamiise abasheki. Bwanyima enjura ekatandika kugwa! Amaizi g’omwegyemure gakaguma nigeeyongyera. Gakaguma nigeeyongyera kumara ebiro 40, okuhitsya obu gaashweka n’enshozi. N’ahabw’ekyo, Yehova akahezaho ebikorwa bibi omu nsi.
Noa n’eka ye bakaguma omu burinzi bw’emeeri kumara obwire oburengire omwaka. Bwanyima y’obwire obwo, amaizi g’omwegyemure gakaguma nigatuuba mporampora. Empereruka, emeeri ekeemerera aha nshozi, kandi bwanyima Yehova akagambira Noa ngu aheeru hakaba hatakiriyo kabi. Eka yoona ku yaarugire omu meeri, bakaramya Yehova barikumusiima ahabw’okubajuna. Yehova akaraganisa kutagaruka kureetaho omwegyemure nk’ogwo, arikuha abantu akamanyiso k’omuhanganzima, nari obuhame bw’okuraganisa kwe.
Buri muntu ohuriire hati, akakomooka aha ka ya Noa. Twine enshonga ehikire ey’okubasiima ahabw’okugira ngu bakagira obumanzi bw’okuba ab’omutaano, omu nsi eyaabaire esiisikaire munonga!
Shoma omu Baibuli ebirikumukwataho:
Okutandika 6:1–8:22; 9:8-19
Abaheburaayo 11:7
2 Petero 2:5
Eky’okugaaniiraho:
Noa akooreka obumanzi mu miringo ki?
Yongyera Kucondooza
1. Ensi ekaba neeshusha ki omwegyemure gutakabaireho? (w02 3/1 5 kacw. 3–6 kacw. 4-wcgr)
2. Noa akagambirwa ryari kwombeka emeeri? Akamanya ryari obu Omwegyemure gwabaire nigwija kutandika? (w12 4/15 23 kacw. 5-8-wcgr)
3. Ahabw’enki turikubaasa kwikiriza ngu buzima Omwegyemure gukabaho? (ijwbq ekicweka 156 kacw. 2-5, akabokusi-wcgr) A
Historic Collection/Alamy Stock Photo
Ekishushani A : Ekitebyo ky’Abahindu nikigamba aha mushaija owaayombekire eryato kubaasa kuhonoka aha omwegyemure gw’ensi yoona. Bwanyima y’omwegyemure, akahayo ekitambo reero yaaba ishenkuru w’abantu boona
4. Niki ekyabaireho bwanyima y’emyaka erengire igana Omwegyemure guherize kubaho, kandi nikibaasa kuba kyakwatsire kita aha mugurusi Noa? (it “Noa” Na. 1 kacw. 12-wcgr) B
Ekishushani B
Teekateeka aha Mashomo
Obwire bwaitu nibushushana buta n’ebiro bya Noa? (Mat. 24:36-39)
Eky’okureeberaho kya Noa nikikwegyesa ki aha bukuru bw’okuba . . .
oyetebeekaniise gye? C
Ekishushani C
omukozi omweziriki? D
Ekishushani D
omugumisiriza? E
Ekishushani E
Noobaasa kworeka ota obumanzi nka Noa?
Teekateeka aha Nshonga Enkuru
Ebirikukwata ahari Noa nibikwegyesa ki ahari Yehova?
Ebirikukwata ahari Noa nibihikaana bita n’ekigyendererwa kya Yehova?
Nooyenda kubuuza ki Noa ku araazooke?
Yega Ebirikukiraho
Reeba oku omutwe gw’eka arikuteeraho kutooreza Noa.
Tooreza Abaabaire Baine Okwikiriza, Batari Abaabaire Batakwine—Noa, Batari Bataahi Be (2:57)
Hwera abaana baawe kwegyera ahari Noa.