EISHOMO 05
Baibuli Erimu Obutumwa Obu Ruhanga Yaatuhaire
Yehova akatuha ekiconco ky’omuhendo, niyo Baibuli mpango erimu ebitabo bikye 66. Kwonka noobaasa kwebuuza oti: ‘Baibuli ekaruga nkahi? N’oha owaagihandiikiise?’ Kubaasa kugarukamu ebibuuzo ebi, ka tushwijume oku twatungire obutumwa bwa Ruhanga oburi omu Baibuli.
1. Baibuli neeba eta Ekigambo kya Ruhanga, obwo yaahandiikirwe abantu?
Baibuli ekahandiikwa abahandiiki nka 40 kumara emyaka nka 1,600, kuruga 1513 Y.A. kuhika nka 98 Y.A.K. Kandi bakaba baine obukomooko butarikushushana. Kwonka nabwo, ebiri omu Baibuli byona nibiikirizana. Eki nikibaasika kita? N’ahabw’okugira ngu Ruhanga niwe yaahandiikiise Baibuli. (Shoma 1 Abatesalonika 2:13.) Abaagihandiikire tibarahandiikire ebiteekateeko byabo. Omu mwanya gw’ekyo, ‘bakaba nibagamba ebirikuruga ahari Ruhanga, nibakoresibwa’ omwoyo gurikwera.a (2 Petero 1:21) Ruhanga akakoresa omwoyo gwe gurikwera kuhiga nari kureetera abashaija abo kuhandiika ebiteekateeko bye.—2 Timoseo 3:16.
2. Ni baahi abarikubaasa kutunga Baibuli?
Abantu ‘b’amahanga goona, n’enganda zoona, n’endimi’ zoona nibabaasa kugasirwa omu makuru marungi agari omu Baibuli. (Shoma Okushuuruurwa 14:6.) Ruhanga akahamya ngu Baibuli yaashohozibwa omu ndimi nyingi kukira ekindi kitabo kyona omu byafaayo. Haihi buri muntu naabaasa kutunga Baibuli. Aga n’amazima ahakuba nibabaasa kugitunga hoona ahu barikutuura n’obu baakuba nibagamba rurimi ki.
3. Yehova arinzire ata Baibuli?
Baibuli ekahandiikwa aha bintu ebirikurahuka kusiisikara, nk’empu n’ebikozirwe omu bifunjo. Kwonka abashaija abaabaire nibakunda Baibuli bakaguma nibagikopoorora emirundi mingi n’engaro zaabo. N’obu abantu b’amaani baraabe baateireho kugicwekyereza, abandi bakaba beeteekateekire kwoga amagara gaabo kugirinda. Tihariho omuntu weena nari ekintu kyona ekibaasize kuremesa Yehova kuhurizana naitwe. Baibuli neegira eti: ‘Ekigambo kya Ruhanga waitu nikigumaho ebiro byona.’—Isaaya 40:8.
SHWIJUMA GYE
Yongyera kwega oku Ruhanga yaahigire abashaija kuhandiika Baibuli, oku yaagirinzire, n’oku abaasiise abantu kugitunga.
4. Baibuli neeyoreka Owaagihandiikiise
Zaana VIDIYO. Kandi shoma 2 Timoseo 3:16, kubaasa kugarukamu ebibuuzo ebirikukurataho.
Ahabw’enki Baibuli neeyetwa Ekigambo kya Ruhanga, kandi obwo yaahandiikirwe abantu?
N’eky’obwengye shi kwikiriza ngu Ruhanga akaha abaahandiikire Baibuli ebiteekateeko bye?
Karaani naabaasa kuhandiika ebaruha, arikuhandiika ebi mukama we arikumuha. Nikyo kimwe, abantu nibo baahandiikire Baibuli, kwonka obutumwa bwayo bukaruga ahari Ruhanga
5. Oku Baibuli yaarinzirwe kutacwekyerezibwa
Ahabw’okugira ngu Baibuli neeruga ahari Ruhanga, akagirinda kuhitsya na hati. Omu byafaayo byona, abantu b’amaani bakateeraho kucwekyereza Baibuli. Abeebembezi b’ediini bakateeraho kugishereka. Kwonka abamwe n’obu baraabe baahiiganisiibwe kandi bakatiinatiinisibwa kwitwa, bakooga amagara gaabo kurinda Baibuli. Kumanya omwe aha bashaija nk’abo, zaana VIDIYO, kubaasa kugarukamu ebibuuzo ebirikukurataho.
Ahabw’enki okumanya ngu abantu bakateeraho munonga kurinda Baibuli kirikukureetera kwenda kugishoma?
Shoma Zaaburi 119:97, kubaasa kugarukamu ekibuuzo eki:
Niki ekyahigire abantu baingi kwoga amagara gaabo kuvunuura Baibuli n’okugijanjaaza?
6. Baibuli n’ekitabo ky’abantu boona
Baibuli niyo erikukirayo kuvunuurwa n’okujanjaazibwa omu byafaayo. Shoma Ebyakozirwe 10:34, 35, kubaasa kugarukamu ebibuuzo ebi:
Ahabw’enki Ruhanga naayenda ngu Ekigambo kye kivunuurwe omu ndimi nyingi, kandi kijanjaare munonga?
Niki ekirikukushemeza ahari Baibuli?
Haihi abantu
100%
omu nsi yoona
nibabaasa kutunga Baibuli omu ndimi ezi barikwetegyereza
Eriho omu ndimi ezirikurenga
3,000
yoona nari bimwe aha bitabo byayo
Nikiteeberezibwa ngu hashohoziibwe Baibuli nka,
5,000,000,000
kukira ekitabo ekindi kyona
ABAMWE NIBAGIRA NGU: “Baibuli n’ekitabo kya ira ekyahandiikirwe abantu.”
Iwe nooteekateeka ki?
Ni buhame ki oburikworeka ngu Baibuli n’Ekigambo kya Ruhanga?
OMU BUGUFU
Baibuli n’Ekigambo kya Ruhanga, kandi akahamya ngu abantu baagitunga.
Okweijutsya
Nikimanyisa ki kugira ngu Ruhanga akakoresa omwoyo gurikwera kuhiga abashaija kuhandiika Baibuli?
Niki ekirikukushemeza aha ku Baibuli yaarinzirwe, n’oku erikujanjaara?
Okumanya ngu Ruhanga akateeraho munonga atyo kuhurizana naiwe, nikikureetera kwehurira ota?
JUMBURA EBINDI
Shoma aha byafaayo bya Baibuli omu bihandiiko ebya ira n’envunuura ez’obunaku obu.
Yetegyereze oku Baibuli yaarinzirwe ebintu bishatu ebyabaire nibibaasa kugicwekyereza.
“Oku Baibuli Yaarinzirwe Kutacwekyerezibwa” (Omunaara gw’Omurinzi Na. 4 2016)
Yetegyereza oku abantu baayogire amagara gaabo kuvunuura Baibuli.
Baibuli ekakopoororwa kandi yaavunuurwa emirundi mingi. Noobaasa kuhamya ota ngu obutumwa bwayo tibuhindwirwe?