Ekicweka 6
Enshonga ahabw’Enki Ruhanga Arekireho Okubonabona
1, 2. Abazaire baitu ab’okubanza bakashiisha bata entandikiro nungi ei Ruhanga yaabaire abateeraireho?
N’ENKI ekyashobire? N’enki ekyabaireho ekyasiisire entandikiro nungi ei Ruhanga yaabaire ahaire abazaire baitu ab’okubanza omu Paradiso omuri Edeni? Ahabw’enki, omu mwanya gw’okubaho obusingye n’obumwe eby’omu Paradiso hatwire hariho obubi n’okubonabona kumara enkumi n’enkumi z’emyaka?
2 N’ahabw’okugira ngu Adamu na Haawa bakakoresa kubi obugabe bwabo obw’okwecweramu. Bakeebwa ngu bakaba batarikubaasa kuba gye batoorobeire biragiro bya Ruhanga. Bakacwamu kwetaanisa ahari Ruhanga, barikuteekateeka ngu eki kikaba nikiija kureetera amagara gaabo kwongyera kuba marungi. Batyo baarenga ahu Ruhanga yaabaire abaikiriize kugarukira omu kukoresa obugabe bwabo obw’okwecweramu.—Okutandika, eshuura 3.
Enshonga y’Obutegyeki
3-5. Ahabw’enki Ruhanga ataracwekyereize Adamu na Haawa akahanga abandi bantu?
3 Ahabw’enki Ruhanga ataracwekyereize Adamu na Haawa, akahanga abandi bantu? N’ahabw’okuba obushoboorozi bwe obw’okutegyeka ensi yoona, nibwo bugabe bwe obw’okutegyeka, obutashemereire kuhakanisibwa, bukahakanisibwa.
4 Ekibuuzo kikaba kiri ngu: N’oha ohikire kutegyeka, kandi n’obutegyeki bw’oha obuhikire? Eky’okugira ngu n’ow’obushoboorozi bwona kandi ngu n’Omuhangi w’ebihangirwe byona nikiha Ruhanga obushoboorozi okubitegyeka. Obu aine obwengye bwingi munonga, obutegyeki bwe nibwo burikukirayo oburungi ahabw’ebihangirwe byona. Kwonka obutegyeki bwa Ruhanga bukahakanisibwa. Haine ekyabaire kishobire aha kihangwa kye—omuntu? Nitwija kushwijuma oku obwesigwa bw’omuntu burikutwarirwamu.
5 Okwetaanisa kw’abantu ahari Ruhanga kukareetaho ekindi kibuuzo: Abantu bakaabaire gye batarikutegyekwa Ruhanga? Buzima Omuhangi akaba naamanya eky’okugarukamu, kwonka omuringo murungi ogu abantu baabaire nibabaasa kukyetegyereza kukaba kuri okubareka bakagira obugabe bwona obu baabaire nibenda. Bakeecweramu kwetegyeka, na Ruhanga yaabareka.
6, 7. Ahabw’enki Ruhanga arekire abantu kwetegyeka okumara obwire buraingwa?
6 Okureka abantu kukoresa obugabe bwabo nk’oku barikwenda, Ruhanga akaba naija kworeka gye yaaba abantu nibabaasa kuba gye batari hansi y’obutegyeki bwe. Obwire obu yaakubahaire bukaba nibwija kuba buraingwa ekirikumara kubaasisa abantu kuhika aha ki bo baakwetsire entunguuka erikukirayo omu by’obutegyeki, eby’amakorero, ebya sayansi hamwe n’omu by’obushaho.
7 N’ahabw’ekyo, Ruhanga arekire abantu kwetegyeka kuhitsya omu bunaku obu, okworekyera kimwe gye yaaba nibabaasa kuba gye batari hansi y’obutegyeki bwe. N’ahabw’ekyo, abantu babaasize kwecweramu yaaba baba abanyambabazi nari abainazi, yaaba bagira rukundo nari rwango, okuhikiirira nari okutahikiirira. Kwonka kandi omuntu ahikirweho ebirugire omu kucwamu kwe: oburungi n’obusingye nari obubi n’okubonabona.
Obugomi bw’Ebihangirwe eby’Omwoyo
8, 9. (a) Obugomi bukatandika buta omu iguru? (b) Oyihireho Adamu na Haawa, ni bihangirwe ki ebindi ebi Sitaane yaareetaire kugoma?
8 Hariho enshonga endiijo ei tushemereire kuteekateekaho. Abazaire baitu ab’okubanza tibo bonka abaagomeire obutegyeki bwa Ruhanga. Kwonka shi ni baahi abandi abaabaire bariho omu bunaku obwo? N’ebihangirwe eby’omwoyo. Ruhanga atakahangire abantu, akabanza kuhanga baamaraika baingi kutuura omu iguru. Nabo bakahangwa n’obugabe bw’okwecweramu hamwe n’ekyetengo ky’okworobera obutegyeki bwa Ruhanga.—Yobu 38:7; Zaaburi 104:4, NW; Okushuuruurwa 5:11.
9 Baibuli neeyoreka ngu obugomi bukatandikira omu iguru. Ekihangirwe kimwe aha by’omwoyo kikaba nikyenda obugabe kukora eki kirikwenda kyona. Kikaba nikyenda ngu abantu bakiramye. (Matayo 4:8, 9) Ekihangirwe eki eky’omwoyo kikakora kihango omu kureetera Adamu na Haawa kugoma, kirikubeiha ngu Ruhanga akaba abaimire ebintu birungi. (Okutandika 3:1-5) N’ahabw’ekyo nikyetwa Omuregi (Omubeihi) kandi Sitaane (Omuzigu). Bwanyima akabeihabeiha n’ebihangirwe ebindi eby’omwoyo kugoma. Bikeetwa baadaimoni.—Eky’Ebiragiro 32:17; Okushuuruurwa 12:9; 16:14.
10. N’enki ekyarugire omu kugoma kw’abantu hamwe n’okw’ebihangirwe eby’omwoyo?
10 Omu kugomera Ruhanga, abantu bakaikiriza Sitaane na baadaimoni be kubategyeka. Egi niyo nshonga ahabw’enki Baibuli neeyeta Sitaane “ruhanga w’ensi egi,” ‘ohumize emitima y’abatarikwikiriza.’ N’ahabw’ekyo, Ekigambo kya Ruhanga nikigira ngu “ensi yoona . . . eri omu butegyeki bw’Omubi.” Yesu we wenka akagira ngu Sitaane ‘n’omutegyeki w’ensi egi.’—2 Abakorinso 4:4; 1 Yohaana 5:19; Yohaana 12:31.
Enshonga Ibiri
11. Sitaane akahakanisa Ruhanga aha nshonga ki endiijo?
11 Sitaane akareetaho enshonga endiijo. Sitaane akagira ngu Ruhanga akakora enshobe omu muringo ogu Yaahangiremu abantu kandi ngu tihariho n’omwe orikugumizamu naakora ekihikire yaagyezibwa. Buzima, akagira ngu abantu baagyezibwa, nibabaasa kwehakana Ruhanga butunu. (Yobu 2:1-5) Omu muringo ogu, Sitaane akareetaho okubangaanisa aha bwesigwa bw’abantu.
12-14. Okureka obwire buraingwa kuhinguraho kukaba nikwija kworeka ki aha nshonga ibiri ezi Sitaane yaareetsireho?
12 N’ahabw’ekyo, Ruhanga arekire obwire buraingwa kuhinguraho kugira ngu ebihangwa bye ebiine obwengye byona bireebe oku enshonga egi hamwe n’ey’obutegyeki bwa Ruhanga ziraashobororwe. (Gyeragyeranisa na Okuruga 9:16.) Ebyakurugire omu byafaayo by’omuntu bikaayorekire amazima agarikukwata aha nshonga ezo zombi.
13 Eky’okubanza, okureka obwire buraingwa kuhinguraho kikaba nikiija kworeka ki aha bikwatiraine n’obutegyeki bwa Yehova, ngu niwe ohikire kutegyeka byona? Abantu bakaba nibabaasa kwetegyeka gye batarikutegyekwa Ruhanga? Haine obutegyeki bw’abantu bwona obwakureetsireho ensi etarimu ntaro, bihagaro, n’obutari buringaaniza? Hariho obutegyeki bwona obwakuheriizeho kimwe obworo kandi bukareetaho obugwa gye? Hariho obwakuherizeho endwara, bukuru na rufu? Obutegyeki bwa Ruhanga bukateebwaho kuhikiiriza ebyo byona.—Okutandika 1:26-31.
14 Aha bikwatiraine n’enshonga ya kabiri, okureka obwire buraingwa kuhinguraho kukaba nikwija kworeka ki aha bikwatiraine n’omuringo ogu abantu bahangirwemu? Ekaba eri enshobe Ruhanga okuhanga abantu omu muringo ogu yaabahangiremu? Hakaabaireho omuntu weena owaakugumizamu kukora ebihikire yaagyezibwa? Hakaabaireho abantu abaakworekire ngu nibenda obutegyeki bwa Ruhanga omu mwanya gw’obutegyeki bw’abantu?
[Ekishushani ekiri aha rupapura 13]
Ruhanga arekire abantu kuhika aha ki bo barikweta entunguuka erikukirayo
[Ebigambo Ebirikworeka oburugo bw’Ekishushani Ekitateirwe Bajurizi ba Yehova]
Shuttle: Based on NASA photo