Enkora ya Karibwengye n’Omugisha Nari n’Omukyeeno?—Baibuli Neegamba Ki?

Omu biro ebi, abategyeki omu nsi, abanyasaayansi, n’abahangu omu bwengye bagambire aha maani ga karibwengye. Bagambire aha migasho yaayo, kwonka nabwo baayoreka ngu karibwengye neebaasa kukoresibwa kubi.

• “Karibwengye nikyo kikoreso ky’entunguuka ekirikukirayo hati, ekirikubaasa kuhindura abantu kuba gye . . . Kwonka nabwo, karibwengye neebaasa kuba ey’akabi k’amaani aha burinzi bw’abantu, obugabe bwabo, n’enaama zaabo, kandi ereetere n’abantu kuteesiga eby’obutegyeki.”—Kamala Harris, omuhwezi wa purezidenti wa United States, Okwakataano 4, 2023

• “N’obu karibwengye eraabe neija kuhwera munonga omu by’obujanjabi, kwonka nabwo n’ey’akabi aha magara g’abantu omu miringo mingi,” bikahandiikwa ekibiina ky’abashaho n’ab’eby’obujanjabi abaabaire beebembeirwe Dr. Frederik Federspiel, omu kicweka ekyashohoziibwe Okwakataano 9, 2023, omu katabo BMJ Global Health.a

• “Karibwengye neebaasa kuba obukomooko bw’amakuru agarikuhabya. Juba, neebaasa kwija kureetera abantu kuburwa emirimo. Abahangu omu by’obwengye nibatiina ngu neebaasa kwija kuba ey’akabi aha bantu.”—Orupapura rw’amakuru New York Times, Okwakataano 1, 2023

Okuhinguraho kw’obwire nikwija kworeka yaaba karibwengye neija kukoresibwa kurungi nari kubi. Baibuli neegamba ki?

Ekirikureetera abantu kukora ebitaine buhame burikumara

Baibuli neeyoreka ahabw’enki abantu batarikubaasa kuhamya ngu entunguuka zaabo omu by’obwengye niziija kukoresa omu muringo murungi gwonka.

1. 1. Nangwa n’obu abantu barikuba baine ebigyendererwa birungi, nibabaasa kutareeba kare ebibi ebiraarugye omu bi barikukora.

   • “Hariho omuhanda ogu omuntu ayeta murungi, kwonka omuheru gwagwo guri omuhanda gw’okufa.”—Enfumu 14:12.

2. 2. Omuntu tarikubaasa kutegyeka oku abandi baraakorese eki akozire, yaaba kurungi nari kubi.

   • ‘[Ebi nkozire] ninyija kubitsigira oraampungurire. Mbwenu n’oha orikumanya yaaba naija kuba omunyabwengye nari omushema? Kwonka niwe araabe mukama wa byona ebi naafeereire kubi ninkoresa obwengye bwangye ahansi y’eizooba.’—Omubuurizi 2:18, 19.

Ebitaine buhame burikumara ebi nibituhwera kumanya ahabw’enki Omuhangi niwe aine kutuhabura.

Ahu turikubaasa kuta obwesigye bwaitu

Omuhangi waitu naaraganisa ngu tarikwija kwikiriza abantu nari entunguuka y’obwengye bw’abantu kucwekyereza ensi nari abantu.

• ‘Ensi yo neegumaho obutwire bwona.’—Omubuurizi 1:4.

• ‘Abahikiriire nibaija kuhungura ensi, bagituuremu ebiro byona.’—Zaaburi 37:29.

Omuhangi waitu naatuha obuhabuzi kurabira omu Baibuli, oburaatubaasise kugira nyentsya y’obusingye n’oburinzi. Okwongyera kwega eki Baibuli erikugamba, shoma ebicweka “Hariho Ekirikwesigwa Ekirikuhitsya Ahari Nyentsya Nungi?” na “Amatsiko Genyini Aga Nyentsya Nungi.”